Read Bafia ÀPÒKÀLIƁSƐ̀ 14 Bible Online

ÀPÒKÀLIƁSƐ̀ 14 - Bafia bible

ÀPÒKÀLIƁSƐ̀ 14

¹Nni ǹseesèèghà, ǹghɛn Man à jɔ̀ɔ̀ ǹɗɛrɛliyɛn ɓi dòn ì Siyon, ǹɗaŋ ri ɓum ɓɛ̀tɔɔsìm mɛ̀tin taàɓɛ̀ɛ̀ rì ɓum ɓɛ̀tɔɔsìm ɓɛnin; ɓi mɛ̀su mɛ ɓumɓɛ̀n ɗii ɗii, rì ɗii ɗi Seŋi mɛ ɓaghà mɛ̀ kànɛn.

²Fɔɔnnɛ ǹwokày jɛ̀ɛ̀ aɗyoo di yɛɛ̀ wɔ̀ɔ̀wɔɔ yi yɛ̀ɛ ɓìkus ɓi riɓày, ì pisɛ̀n tì coo gom ì baàbàn; gom ìnɛ ǹwokà ìnɛ̀n ì ɓaghà fɛlɛ yɛ̀ɛ fìloŋ fyɛɛ̀ fi ɓum ɓɛɛ̀ ɓoɓòg.

³Ɓumɓɛ̀n ɓɛ kɛkɛ̀ghìghà fyem fi nyɔn di ɓɛ rɛrɛlii asu wu ikɔ̀ɔ̀ wu rilàmì, rì nyàm yi kinìn, rì asu wu ɓɛsɛ̀ɛ̀mɛn ɓɛ ɓum. Ŋwaàdɛŋ à ɓaghà ɓi lɛ à yilàg fyem fìn, i ki yin lɛ ɓum ɓɛ̀tɔɔsìm mɛ̀tin taàɓɛ̀ɛ̀ rì ɓum ɓɛ̀tɔɔsìm ɓɛnin ɓɛ à kwèɗkà ɓi ziinɛ.

⁴Ɓumɓɛ̀n ɓɛɛ tɔɓɓɛ̀ngà ɓi tifin rì ɓɛyìɓ; ɓɛ ri ɓumɓɛ ɓɛ yii ɓi ɓɛyìɓ; ɓɛɛ̀ nɔ̀ɔnɔɔ̀tì Man à jɔ̀ɔ̀ jàŋ bimiɗ ìnɛ à kɛ̀ɛ. Ɓɛ ɓaghà ɓɛ̀kòrɛn ɓi nyìinyìm à ɓum lɛ ɓɛɛ ɓa fɛlɛ yɛ̀ɛ ɓumɓɛ ɓɛ ri ɓìɗùn ɓi ǹtonto ɓisuu Bɛ̀ll rì ɓisuu Man à jɔ̀ɔ̀,

⁵fɔɔnnɛ ŋwɔm wu roàdɛŋ wu kpaaghà ɓi kiɓan ki ɓɛpwàà; ɓɛ ri ɓumɓɛ ɓɛ ri kɛ̀ɛ̀ bɛ̀lɛn.

⁶Fɔɔnnɛ ǹghɛngà ŋwaà-fìtom adɛŋ di a lɛŋlɛŋ ɓi ɗyoo ɓi ɗùm, à ɓaghà rì Syeesyee à Ɓɔlɛ à fìɗyàɓ fikɔ̀ɔ̀ ànɛ lɛ a ghagsi ɓum ɓɛ̀cèm ɓɛ ɓi ziinɛ, ɓumɓɛ ɓi ɓìlɔ̀ŋ ɓìcèm, rì mɛ̀pwìɗ mɛ̀cèm, rì ɓìtòkì ɓìcèm, rì mɛ̀kuu mɛ̀cèm.

⁷À lààlàmɓɛ̀ngà jɛ̀ɛ̀ aɗyoo lɛ: Risiina Bɛ̀ll, ɓì fa nyi rìkem ɓisuu cààmɛ̀n ki ɓɛyɔ̀m ɓii ki ki kpaŋi; ɓaaghna mɛ̀ɗu ɓi zi ɓi mis mɛ roànɛ à kìghà lɛ rì ɗyoo rì zi, ɗì rìɓày à kìkòn rì ɓɛ̀ǹsim ɓɛ mɛnig ɓɛ̀cèm.

⁸Nni ŋwaà-fìtom adɛŋ, ànɛ à ɓɔ̀ɓkày roà ǹtonto, à yùghà di a kpaakpaa lɛ: Baɓilon àgwey a kpìi, Baɓilon àgwey a kpìi; nnyɛɛ nɔsìghà ɓìlɔ̀ŋ ɓìcèm mɛ̀rɔ̀g mɛ ɓi cɛɓ kii ki tifin ki ki ri koŋnyòò.

⁹Fɔɔnnɛ ŋwaà-fìtom a kìraa à nɔ̀ɔ̀tìghày di a kpaakpaa jɛ̀ɛ̀ aɗyoo lɛ: I mum à ɓɔgsii nyàm rì kìfèèghrɛnà ki yɔ̀ nsoò lɛ ɓɛ teɗ nyi kìrèmzɛnà ki nyàm ìnɛn ɓisu nsoò lɛ ɓi càg,

¹⁰di à rì girig ɓiì nɔɔ̀ mɛ̀rɔ̀g mɛ ribaŋì ɗi Bɛ̀ll, mɛ mɛ ri mɛ̀ɓèniyɛn ɓi ɓeŋ à bim yiì, mɛ̀ kɛɛ̀ ɓa mɛ ɓùtɛn ɗi com kidɛŋ; à ki rì ɓiì wowoogh ntɔɓ ɓi ɗuu, rì ɓi ǹdùsi, ɓi mis mɛ ɓum ɓɛ titom ɓɛ ɓɛ ri ɓɛ̀tɛnɛn, rì ɓi mis mɛ Man à jɔ̀ɔ̀.

¹¹Fìsilì fi ɗuu ɗi ɗyɛɛ̀ ɗiighɗigsì ɓɔ fyɛɛ̀ syoosyoo fiɗyàɓ fikɔ̀ɔ̀. Yɛ̀ɛ ìru yɛ̀ɛ ŋwos, rìfɔɔsɛ̀n ɗyaa ɓa ɓi ɓisuu ɓumɓɛ ɓɛ ɓɔgsìghà lɛ rì nyàm rì kìfèèghrɛnà ki yɔ̀, rì ɓisuu mum bimiɗ ànɛ à tekà kìrèmzɛnà ki ɗii ɗi nyàm ìnɛn.

¹²Cààmɛ̀n ki ɓɛ̀gherɛ̀n ɓɛ ɓɛɛ̀ ɓèŋɓeŋ ɓidɔ̀gsɛna ɓi Bɛ̀ll rì ǹtyweeyi wu yɛ̀ɛ Yeesus, ɓɛɛ siìrɛn kɛɛ ri lɛ̀.

¹³Nni ǹwokà di jɛ̀ɛ̀ ì rìì aɗyoo ì kpaa lɛ: Kàna kìɓan ki! Mààgh rì ɓìloŋ ɓi ɓi wii ɓi kìsay ki Kan, à tumɛ̀n ɓigomìnɛ. Ǹghay a kpaaghi lɛ: Ki ri fɔlɔɔ saaɗ, lɛ di ɓɛɛ fɔɔ̀sɛn ɓìsay ɓyaa, ɓisuulɛ mɛ̀kìkìì maa mɛɛ̀ nɔ̀ɔnɔɔ̀tì ɓɔ.

¹⁴Nni ǹseesèèghà, ǹghɛn kìkwìɗ ki puɓ; ɓi kìkwìɗ kiǹ mum à ɓaghà ǹkɔ̀kɔriyɛn yɛ̀ɛ man à mum, à ɓaghà rì tam à rìkem ɓi nto, ànɛ ɓɛ kiì rì gol, à ki ɓanɓan zɛ̀m i mpooyɛn ɓi càg.

¹⁵Nni ŋwaà-fìtom adɛŋ à kpagày ɓi naà-Bɛ̀ll, à kpaa ŋwaànɛ à ɓaghà ǹkɔ̀kɔriyɛn ɓi kìkwìɗ jɛ̀ɛ̀ aɗyoo lɛ: Pìgha zɛ̀m, u saŋ ɓyom, lɛ cààmɛ̀n à mɛ̀saŋ yɛɛ kpaŋi lɛ̀, ɓisuulɛ ɓyom ɓi ɓi ziinɛ ɓi mɛ tèɗ lɛ Bɛ̀ll a saŋ̀ ɓyɔ.

¹⁶Fɔɔnnɛ roànɛ à ɓaghà ǹkɔ̀kɔriyɛn ɓi kìkwìɗ à pìkà zɛ̀m, à saŋ ɓyom ɓi ɓi ziinɛ.

¹⁷Nni ŋwaà-fìtom adɛŋ à kpagày ɓi naà-Bɛ̀ll ìnɛ aɗyoo, à ɓaghà girig rì zɛ̀m i mpooyɛn ɓi càg;

¹⁸fɔɔnnɛ ŋwaà-fìtom adɛŋ ànɛ à làmìghà ɗuu, à kpagày ɓi com ki ɓɛɛ̀ tɔ̀ngi ɓyom miì ɓi rìɓɔgsì ɗi Bɛ̀ll, à kpaa roànɛ à ɓaghà rì zɛ̀m i mpooyɛn ɓi càg jɛ̀ɛ̀ aɗyoo lɛ: Pìgha zɛ̀m yɔɔ̀, u syaŋ ɓìjug ɓi viìnyɛ̀, ɓisuulɛ ɓìɗùn ɓi mɛ ɓàŋ.

¹⁹Fɔɔnnɛ ŋwaà-fìtom a pìkà zɛ̀m, à syagì viìnyɛ̀ bimiɗ ìnɛ ɓi ziinɛ, di a sùusuùrì yɔ̀ ɓi coo wayɗ wu bim i Bɛ̀ll.

²⁰Nni ɓɛ saɓkà ɓìɗùn ɓiǹ ɓi wayɗ wu wu ɓaghà fìràɓ ri bàn; fɔɔnnɛ ɓìrɛm ɓi bwaɓ ɓi ɓɛngàkày ɓi wayɗ, ɓi riɓì ɓɛ̀kòdò lɛ ɓɛ̀kòdò, ɓi ki rim, nunùg mɛɛtɛ̀rɛ̀ bog rì kìden.