Read Bafia ÀPÒKÀLIƁSƐ̀ 16 Bible Online

ÀPÒKÀLIƁSƐ̀ 16 - Bafia bible

ÀPÒKÀLIƁSƐ̀ 16

¹Fɔɔnnɛ ǹwokà di coo jɛ̀ɛ̀ ì rìì ɓi naà-Bɛ̀ll, ì kpaakpàà ɓum ɓɛ titom lɛ: Kɛ̀ɛna kìsùùrii kitaàɓɛ̀ɛ̀ ki ɓɛɓeŋ ɓɛ bim i ɗi Bɛ̀ll ɓi zi.

²Nni ŋwaà-fìtom a ǹtonto à kɛ̀ngà, à sùùrì ɓeŋ wìì ɓi zi; fɔɔnnɛ ɓum ɓɛ̀cèm ɓɛ ɓɛ ɓaghà rì kìrèmzɛnà ki nyàm, ɓɛ ki ɓɔɔɓɔgsì kìfèèghrɛnà ki yɔ̀, ɓɛ roɓkàkà rìkuu ɗi kiɓɛɛ ɗiɗɛŋ ɗi mum kɛ̀ɛ yi yɛ̀ɛ ɗi kɛɛ̀kɛɛ yì, ɗi ki kɛŋ yɛ̀ɛ mɛ̀nɔ̀ɓɔ̀.

³Nni ŋwaà-fìtom a kìɓɛ̀ɛ̀ a sùùrìghà ɓeŋ wìì ɓi rìɓày à kìkòn, rìɓày à lɔ̀ɔ̀ghrɛ̀n bwaɓ, yɛ̀ɛ bwaɓ yi kiloŋ ki mum, fɔɔnnɛ ɓyom ɓìcèm ɓi ɓi ghɛghɛ̀ɓkà ɓi rìɓày à kìkòn ɓi cuughà.

⁴Ŋwaàfìtom a kìraa à sùùrì ɓeŋ wìì ɓi ɓɛ̀rìɓày ɓɛ zɛy rì ɓi ɓɛ̀ǹsim ɓɛ mɛnig, ɓyom ɓìn ɓìcèm ɓi lɔɔ̀ghrɛ̀n bwaɓ.

⁵Nni ǹwokà di ŋwaà-fìtom a mɛ̀nig a kpaa lɛ: Ù rì lɛ saaɗ, yɛ̀ɛ wɔ̀ɔ nɗeni lɛ kɛɛ ɓa fɔlɔɔ, wàànɛ ù rì ǹtɛnɛn, ùrì, ù ki ɓaghà.

⁶Ɓisuulɛ ɓɛ yogsìghà bwaɓ yi ɓɛgherɛ̀n rì yi ɓɛkpaŋzì-ɓìɓan, nni wɔ̀ɔ nfaa ɓɔ bwaɓ lɛ ɓɛɛ nɔ, ki ghɛɛ̀sɛɛ lɛ ɓɛɛ ki ɓɔ fɔlɔɔ.

⁷Nni ǹwokà di com ki ɓɛɛ̀ tɔ̀ngi ɓyom miì ɓi rìɓɔgsì ɗi Bɛ̀ll ki kpaa lɛ: Ɛ̀ɛ̀ Kan Bɛ̀ll à ìtèɗ wucèm, rìren ɗyɔɔ ɗi ɓiɓan ɗi ri miì, ɗi ki ɓa lɛ saaɗ.

⁸Fɔɔnnɛ ŋwaà-fìtom a kìnìn à sùùrìghà ɓeŋ wìì ɓi ŋwos, ŋwos a teɗ ìtèɗ wulɛ a ɗigsi ɓum rì ɗuu,

⁹nni coo ritɔ̀n ɗi syàn ɗiǹ ɗi ɗigsìghà ɓum, ɓɛ tum rìfengì ɗi ɗii ɗi Bɛ̀ll, ànɛ à làmii mɛ̀tɔɓ mɛ̀n ɓɛ̀ kɛɛ̀ lɔ̀ɔ̀ghrɛn mɛrem lɛ ɓɛɛ fa nyi rìkem.

¹⁰Fɔɔnnɛ ŋwaà-fìtom a kìtaǹ à sùùrìghà ɓeŋ wìì ɓi-kɔ̀ɔ̀ wu rilàmì wu nyàm, birìm ì sigtɛ̀n kìlɔ̀ŋ ki nyàm ìnɛn, ɓum ɓɛ kaŋkàm mɛ̀lemàg lɛ rìkɛŋ ɗi cee ɓɔ,

¹¹ɓɛ ki feefengì Bɛ̀ll ànɛ aɗyoo ɓisuu rikɛŋ ɗi ɓɛ wowòkà rì ɓisuu ɓiɓɛɛ̀ ɓyaa, kìɓan kifog ɓɛ̀ kɛɛ̀ ki lɔ̀ɔ̀ghrɛn mɛrem lɛ ɓɛɛ caɗ ɓìɓeɓtàg ɓyaa ɓi mɛkìkìì.

¹²Nni ŋwaà-fìtom a kìtaàfog à sùùrìghà ɓeŋ wìì ɓi rìɓày ànɛ lɛ Efirat, mɛ̀nig mɛ miì mɛ ghemì lɛ mɛɛ nɛm̀ mɛ̀fòm mɛ ɓi jàŋ inɛ ŋwos a ti à kpagìì bee.

¹³Fɔɔnnɛ ǹghɛngà di ɓìɓeɓtàg ɓi mɛghay ɓiraa ɓyɛɛ̀ kpaŋkpaŋ yi lɛ rì ɓi ŋwɔm wu kinààgɔ̀n, rì ɓi ŋwɔm wu nyàm, rì ɓi ŋwɔm wu ǹkpaŋzì-ɓìɓan ɓi ɓɛpwàà; mɛ̀ghay mɛ̀n mɛ ɓaghà yɛ̀ɛ ɓìgbòri.

¹⁴Ɓi ri ɓìɓeɓtàg ɓi mɛghay ɓi ɓyɛɛ̀ kìki dàm, ɓi ki kɛ̀ngi a mɛ̀fòm mɛ ɓi ziinɛ bimiɗ, lɛ ɓyɛɛ taŋzɛn mɔ ɓisuu wɛ̀y wu wu ri ɓiì ɓaà ɓi coo gòn i Bɛ̀ll ànɛ à rì rì ìtèɗ wucèm.

¹⁵Ghɛna, n-yùyuy yɛ̀ɛ wiiwìì. Mààgh rì ŋwaànɛ à rì cem, à ki ɓèŋɓeŋ ɓilàà ɓii lɛ kɛ̀ɛ kɛ̀ɛ̀ghi kitòn zɛy lɛ a wog ǹtoòrìɗ di ɓum ɓɛ ghɛɛ nyi kìtòn zɛy.

¹⁶Mɛ̀ghay mɛ̀n mɛ taŋzɛ̀ngà mɛ̀fòm ɓi jàŋ inɛ ɓɛɛ̀ regi ɓi rì Ebìreegh lɛ Arimagedɔŋ.

¹⁷Nni ŋwaà-fìtom a kìtaàɓɛ̀ɛ̀ a sùùrìghà ɓeŋ wìì ɓi bɛ̀ɛ̀bɛ̀ɛ̀. Fɔɔnnɛ coo jɛ̀ɛ̀ ki kpagày ɓi naà-Bɛ̀ll, di ki riì ɓi-kɔ̀ɔ̀ wu rilàmì ki kpaa lɛ: Ki leègh!

¹⁸Fɔɔnnɛ ki kighà lɛ ŋwàaŋwàɗ à ŋwàŋwàɗ, gom yi woòghwòòghrɛ̀n, baàbàn ì ɓoɓòg, zi i ki nyɛ̀ŋɗɛ̀n lɛɛ̀gwey lèg ànɛ ì ka nyɛŋɗɛ̀ngà ɓi rikuu ɗìn, à tumɛ̀n yɛ̀ɛ ɓum ɓaà ɓa ɓi ziinɛ.

¹⁹Bàn ìgwey i lànɛ̀ngà ɓìlànà ɓiraa, bàn yi ɓilɔ̀ŋ ɓimbog ɓìcèm yi waàrɛ̀n, Bɛ̀ll à yitì Baɓilon àgwey lɛ a nɔsi nyi ɓeŋ à mɛ̀rɔ̀g mɛ ɓi coo bim yiì.

²⁰Ɓìrìŋ ɓi riɓày ɓìcèm ɓi ghɛŋɗàkà, dòn yɛ̀ kɛɛ̀ ghɛnɛn ti nsoò bog.

²¹Coo bol ì gɔ̀g ì kɔ̀sɛ̀ngày aɗyoo ì nɔ ɓum ɓi nyoo, gɔ̀g yi bol ìnɛ̀n yi ɓalàkà nunùg ɓɛ̀kilò mɛ̀tin mɛɓɛɛ̀; nni ɓum ɓɛ fengàkà Bɛ̀ll ɓisuu ntɔɓ wu ɓɛ ghɛngà wiǹ ɗì bol ì gɔ̀g, ǹtɔɓ wìn wu teèsɛ̀ngà wu ciɓ.