Read Bafia ÀPÒKÀLIƁSƐ̀ 17 Bible Online

ÀPÒKÀLIƁSƐ̀ 17 - Bafia bible

ÀPÒKÀLIƁSƐ̀ 17

¹Fɔɔnnɛ kìbog ki ɓi ɓum ɓɛ titom taàɓɛ̀ɛ̀ ɓɛ ɓɛ ɓanɓàngà ɓɛ̀ɓeŋ ɓɛ kitaàɓɛ̀ɛ, ki yughày ki kpaa mɛ̀ lɛ: Yu, nɗesi wɔ̀ lannɛ ɓɛ ri ɓiì pɔnɔsii coo giɓ a rìɓàmɓà ànɛ à kɔ̀kɔri ɓi bèn yi ɓɛrìɓày ɓɛgwey.

²Rì nyi nnɛ mɛ̀fòm mɛ ɓi ziinɛ mɛ ɓaghà ɓi fìsɔ̀mɔ̀g, ɓumɓɛ ɓi ziinɛ ɓɛ ŋwaŋ rìnɔ ɗi mɛrɔ̀g mɛ ɓi cɛɓ kii ki tifin kìn.

³Nni ŋwaà-fìtom anɛ̀n à tekà mɛ̀ ɓi nghay à kɛ̀n ɗì mɛ̀ ɓireɓ. - Fɔɔnnɛ ǹghɛngà giɓ adɛŋ ǹkɔ̀kɔriyɛn ɓi nyàm ìdɛŋ fɛlɛ m̀ɓàŋ, nyàm ìnɛn rì mii mɛ mɛɛ̀ feefengì Bɛ̀ll nyoo bimiɗ, ì ki ɓa ri mɛ̀to taàɓɛ̀ɛ̀, mɛ̀tɔŋ ǹtɛ̀ɗ.

⁴Giɓ anɛ̀n à waatɛ̀ngà ɓìlàà lɛ, rì ɓi ɓàŋ lɛ pɔŋŋ, rì ɓi ɓàŋ lɛ ɓùlùg-ɓùlùg, à ki waatɛn lɛ rì mɛ̀rɛ̀ŋ mɛ gol, rì mɛ ɓɛ kiì rì gɔ̀g yi ŋwèrim ŋwèrim, rì tìcaka. À ɓaghà rì ɓeŋ à gol ɓi càg, ànɛ à ɓaghà lɛ rì ɓìɓeɓtàg ɓi ɓiɓan, rì tìfin ti kiɓeɓtàg kii ki cɛɓ.

⁵Ɗii ɗidɛŋ ɗi ɓaghà nyi ɗìkànɛn ɓisu; azi anɛ ɓi ɗii ɗìn à ɓaghà kìɓan ki a rìnyam; ɗii ɗìn ɗi ɓaghà lɛ Baɓilon àgwey, à jɛɛ ɓɛ̀yiɓ ɓɛ riɓàmɓà rì ɓìɓan ɓi ɓeɓtɛn ɓi ɓi ziinɛ.

⁶Fɔɔnnɛ ǹghɛngà giɓ anɛ̀n ǹŋwaŋɛn lɛ rì bwaɓ yi ɓɛgherɛ̀n, rì yi ɓɛwusìnɛ̀ɗ ɓɛ Yeesus. Yɛ̀ɛ ǹghɛngà nyi, ǹkuuràg lɛɛ̀gwey.

⁷Ŋwaàfìtom a tɔg mɛ̀ lɛ ɓisuucɛ nnɛ ù kuuraagh? Ǹɗì wɔ̀ ɓiì kalii ɓɛ̀azi ɓɛ a rìnyam ɓɛ ɓi giɓ anɛ̀n rì nyàm ìnɛ ì tɛ̀tɛɛgh nyi, ìnɛ ì rì mɛ̀to taàɓɛ̀ɛ̀ rì mɛ̀tɔŋ ǹtɛ̀ɗ.

⁸Nyàm ìnɛ wàa ghɛɛ, ì ɓaghà nni ì yiìdi. Ì rì ɓiì kpaŋìì ɓi coo riɓee ɗi rimɛn, ì kɛ̀n kì ɗyaŋì. Nni ɓumɓɛ ɓi ziinɛ, ɓɛ mii maa mɛ ɓaghà ɓi mɛ kànɛn ɓi kaàtà à cɛɓ, à tumɛ̀n yɛ̀ɛ ziinɛ ì kìlɛ̀ngà, ɓɛ ri kuuràg di ɓɛ ghɛɛ nyàm ìnɛn, ɓisuulɛ ì ɓaghà, nni ì yiìdi, nni ì ki rì ɓiì sugtii yi tì.

⁹Cààmɛ̀n ki lɛ mum a ɓa rì fèg ànɛ à rì rì ɗyomzɛ̀n kɛɛ̀ki. Mɛ̀to mɛ nyàm ìnɛn mɛ kitaàɓɛ̀ɛ̀, mɛ ri dòn taàɓɛ̀ɛ̀ yi giɓ anɛ̀n à kɔ̀kɔrii miì.

¹⁰Mɛ ri girig mɛ̀fòm taàɓɛ̀ɛ̀; mɛ̀fòm mɛtaǹ mɛ ɓi mɛ̀fòm mɛn mɛ mɛ kpì, ɗìfog ɗi kaka ɗi lalàmi, ɗimbog ɗi ka kpaŋ ɓi. Yɛ̀ɛ ɗi ri kpaŋ, ɗi ri kɔ̀ri maa cààmɛ̀n lɛsàg.

¹¹Nyàm ìnɛ ì ɓaghà, ìnɛ ì ki yiìdi inɛ̀n, yɛ̀ɛ ri rìfòm ɗi kitaàraa, ì ɓa tì kìbog ki ɓi mɛfòm mɛ kitaàɓɛ̀ɛ̀, ì ki rì ɓiì kɛ̀ɛ ki ɗyaŋì.

¹²Mɛ̀tɔŋ mɛ kiǹtɛ̀ɗ mɛ wàa ghɛɛ, mɛ ri mɛ̀fòm ǹtɛ̀ɗ mɛ mɛ ka tumɛn ɓi rilàmì; kìɓan kifog ɓɛ ri ɓiì rɛsɛɛ mɛfòm ɓɛ lamì hawò bog nɗaŋ ɗi nyàm.

¹³Mɛ̀fòm mɛǹ mɛ ri lɔŋ riyitì ɗìfog, lɛ ɓɛɛ teɗ lɛ rì ìtèɗ waa, rì kìlàmì kaa, ɓɛɛ fa rì nyàm ìnɛn.

¹⁴Ɓɛ ri ɓiì ɗùu ri Man à jɔ̀ɔ̀, Man à jɔ̀ɔ̀ à ki yag ɓɔ ɓi wɛ̀y ɓisuulɛ, à rì Kan ànɛ a ɓɛ̀kan, à ki ɓa ti rifòm ɗi mɛfòm. Man à jɔ̀ɔ̀ à rì ɓɔ ɓiì yaàgh ɓi wɛ̀y, ǹɗaŋ ɗi ɓumɓɛ à reŋìghà ɓɛ ɓɛ ri ɓɛ̀ɓɔ̀nɛn, ɓɛɛ ri ɓɛ̀gherɛ̀n ɓii ɓɛ ntyweeyi.

¹⁵Nni ŋwaà-fìtom a kpaatìghà mɛ̀ lɛ: Mɛ̀nig mɛ wàa ghɛɛ di giɓ a rìɓàmɓà à kɔ̀kɔrii wɔɔ, mɛ ri ɓumɓɛ ɓi mɛ̀kuu lɛ mɛ̀kuu, ɓìtuu lɛ ɓìtuu, ɓìlɔ̀ŋ lɛ ɓìlɔ̀ŋ, rì ɓìtòkì lɛ ɓìtòkì.

¹⁶Mɛ̀tɔŋ mɛ kiǹtɛ̀ɗ mɛ wàa ghɛɛ rì nyàm ìnɛn, ɓi ri ɓiì ɓèèzɛɛ giɓ a rìɓàmɓà ànɛ̀n, ɓi pumzì nyi, ɓi caɗ nyi kìtòn zɛy, ɓi ɗi mɛ̀mùù mii, ɓi ki tɔ̀n nyi ɓi ɗuu.

¹⁷Ɓisuulɛ Bɛ̀ll à fogà ɓɔ fèg ànɛ lɛ ɓɛɛ roòzi rìkɔ̀n ɗii ɓi mɛ̀rem; rìkɔ̀n ɗìfog ɗyɛɛri lɛ, ɓɛɛ teɗ rìlàmì ɗyaa, ɓɛɛ fa rì nyàm à kpaŋ yɛ̀ɛ ɓìɓan ɓi Bɛ̀ll à kpaaghà ɓi ri ɓiì kìlɛɛ.

¹⁸Nni giɓ anɛ wàa ghɛɛ, nnyɛɛ ri bàn ìgwey inɛ ì làmii mɛ̀fòm mɛ ɓi ziinɛ.