Read Bafia ÀPÒKÀLIƁSƐ̀ 18 Bible Online

ÀPÒKÀLIƁSƐ̀ 18 - Bafia bible

ÀPÒKÀLIƁSƐ̀ 18

¹Ajɛ̀m ìnɛn nnɛ ǹghɛngà di ŋwaà-fìtom adɛŋ a sɛnsɛn yi aɗyoo, nyi rì coo itèɗ wu rilàmì, kìtɛɛtɛn ki ɓi rìkem ɗii ki kpeŋzì zi bimiɗ.

²Nni à làmɓɛ̀ngà jɛ̀ɛ̀ aɗyoo lɛ: Baɓilon àgwey a kpìi, Baɓilon àgwey a kpìi! À ghali mɛɛ mɛ ɓiɓeɓtàg ɓi mɛghay, rì ǹnyamzɛn wu mɛghay mɛ ɓeɓtɛn mɛkuu mɛ̀cèm, rì wu ɓìɓeɓtàg ɓi tììlì ɓi ɓi ti ɓi ɓeɓkì ɓum,

³ɓisuulɛ ɓìlɔ̀ŋ ɓìcèm ɓi nnɔɔ mɛ̀rɔ̀g mɛ cɛɓ kii ki tifin ki ki ri koŋnyoo; rì tì lɛ mɛ̀fòm mɛ ɓi ziinɛ mɛ nkìkii tìsɔ̀mɔ̀g ri nyi, ɓɛ̀kìì-dùne ɓɛ ɓi ziinɛ ɓɛ kum, lɛ coo gɛn à ìkum wiì.

⁴Nni fɔɔnnɛ ǹwokà di jɛ̀ɛ̀ ìdɛŋ ì rìì aɗyoo lɛ: Mìni ɓɔn ɓɛm, pɛ̀sɛɛna ɓi bàn ìnɛn, di kɛ̀ ɓi teɗ gàɓ ɓi kìɓe ki yɔ̀, fɔɔnnɛ ɓyàa ɓa ɓi ri gàɓ ɓi mɛ̀tɔɓ mɛ yɔ̀.

⁵Ɓisuulɛ ɓìɓe ɓi yɔ̀ ɓi mɛ saɓtàg à kɛ̀n kì kpaŋì aɗyoo, nni Bɛ̀ll àa n-yitii mɛ̀kìkìì mɛ yɔ̀ mɛ ɓeɓtɛn.

⁶Kìina nyi yɛ̀ɛ à kìghà mìni, ɓì lèɓ nyi rìkì ɗii gɛ̀n yiɓɛɛ̀ ɓi ɓeŋ ànɛ à fogà mìni mɛ̀rɔ̀g mii miì; càɓina nyi mɛ̀rɔ̀g miì gɛ̀n yiɓɛɛ̀.

⁷Faana bàn ìnɛn ǹtɔɓ, ɓì ki cuusi yɔ̀ lèg ànɛ yɛ̀ɛ rìkem ɗi kɔngà yɔ̀, bas rì ìkum, ɓisuulɛ bàn ìnɛn yɛɛ̀ kpaakpaa ɓi nɗem ɓi ɗùm lɛ: Ǹkɔ̀kɔrii lɔŋ yɛ̀ɛ giɓ anɛ à rì rìfòm a kɔ̀ràg, ǹ-yin nkpɔɓ, rìwu ɗyaa tanɛɛ gɛ ɓi mɛ.

⁸Kìɓan kiǹ kɛɛ̀ki mɛ̀tɔɓ mii mɛ ri yù lɔŋ ŋwos bog, mɛ ɓa lɛ: ɗì rìwu, ɗì ɓìlɛ̀ɓì, rì zày, ɗuu ɗi ki rì nyi ɓiì ɗigsii. Ɓisuulɛ Kan Bɛ̀ll ànɛ àa n-yɔ̀mi kìɓan kii a rì rì ìtèɗ.

⁹Mɛ̀fòm mɛcèm mɛ ɓi ziinɛ, mɛ mɛ ɓaghà ɓi fìsɔ̀mɔ̀g ɗì nyi, mɛ ki nɔ̀ɔnɔɔ̀tì ìkum wii, mɛ ri ɓiì rènɗeni, mɛ ki seeghseèghkɛ̀n ɓisuu kiɓan kii, yɛ̀ɛ ɓɛ ri ghɛn di fìsilì fi ɗuu ɗi ɗyɛɛ̀ ɗiighɗigsì nyi fyɛɛ̀ syoosyòò.

¹⁰Mɛ̀fòm mɛǹ mɛ ri rɛlag yi fìràɓ lɛ mɛɛ̀ ririsi ntɔɓ wu bàn ìnɛn, mɛ kpaakpàà lɛ: Nyìighnyìg, nyìighnyìg ɗì coo bàn ì Baɓilon, bàn ìnɛ ì rì kìtèetèɗ ki bàn; kìɓan kɔɔ ki yɔm̀ɓɛɛ lɔŋ ɓi hawò bog.

¹¹Ɓɛ̀kìì-dùne ɓɛ ɓi ziinɛ ɓɛ rènɗèn, ɓɛ ki waatɛn ɓilɛ̀ɓì ɓisu wii, lɛ mum à làgtii tì ɓi dùne yàà,

¹²dùne ìnɛ̀n ì rì ɓyom mɛ̀kuu mɛ̀kuu, lɛ rì gol, rì swiɗ à mɔ̀ɔ̀ni, rì gɔ̀g yi ŋwèrim-ŋwèrim, rì tìcaka, rì syeesyee à kìrimitì, rì ɓìlàà ɓi ɓàŋ lɛ pɔŋŋ, rì silig, rì ɓi ɓi ri ɓìɓàŋ lɛ ɓùlùg-ɓùlùg; rì mɛ̀ɓam mɛ ɓite ɓi ɓi kaarɛɛ rì ɓyom ɓìcèm ɓi ɓɛ syaagh rì mam mɛ zòg, rì ɓi ɓɛ soɓi rì ɓìte ɓi syeesyee, rì ɓìcèm ɓi ɓɛ kiì rì rìkuu ɗi swiɗ ɗidɛŋ nsoò lɛ rì bɔŋ nsoò lɛ rì gɔ̀g yi ɗyɔ̀ɔ̀ɗyɔ̀ɔ̀gh;

¹³ɓìɓaaɓaa ɓi kite ki lɛ kanèlìyee rì ɓyom ɓi nùnnumɛn, rì tìrààre, rì rìkuu ɗi firu ɗi lɛ miìr, rì fìru fi lɛ àŋsaŋ, rì mɛ̀rɔ̀g, rì mɔ̀ɔ, rì fàriǹ ɗì rìkuu ɗi gèŋ ɗi ɓɛɛ̀ kìlag bìrɛs miì, rì ɓɛ̀sanìnya, rì jɔ̀ɔ̀, rì zòm yi kimbɛ̀rɛ̀, rì ɓyalig, rì ɓɛkpàn rì ɓyɛɓ ɓi ɓum.

¹⁴Ɓyom ɓìcèm ɓi ǹɗem wɔɔ wu kɔnkɔ̀ngà, ɓi mɛ ràɓsɛn wɔ; ìkum wɔɔ, rì gìn yi ɓyom yi wɔ̀ɔ nɗi rì yɔ, ɓi ti ɓìɗimɛn ɓi san ànɛ a lɔ̀ŋkɔɔ, wàa ki ghɛɛ̀dii gɛ ɓi ɓyɔ.

¹⁵Ɓɛ̀kìì-dùne ɓɛ ɓɛ kumgà lɛ bàn ìnɛn, ɓɛ ri rɛlii fìràɓ, lɛ ɓɛɛ̀ ririsi ntɔɓ wu bàn ìnɛn; ɓɛ ri ɓiì rèni, ɓɛ waatɛ̀n ɓìlɛ̀ɓì;

¹⁶ɓɛ kpaa gɛ lɛ: Nyìighnyìg, nyìighnyìg rì coo bàn ìnɛ ìi nɗì ǹwaatɛn lɛ rì syeesyee à kìrimitì, rì ɓìlàà ɓi ɓàŋɓaŋɛn lɛ pɔŋŋ rì ɓi ɓàŋ lɛ ɓùlùg-ɓùlùg, yɔ̀ lɛ ri mɛ̀rɛ̀ŋ mɛ gol, rì mɛ ŋwèrim-ŋwèrim rì tìcaka, coo ikum wiǹ wùcèm wu ɗyoŋi ɓi bimiɗ à hawò.

¹⁷Ɓɛ̀kɔ̀mɛ̀n tìtimà ɓɛ̀cèm, rì ɓɛ̀pusì tìtimà rì ɓum ɓɛ̀cèm ɓɛ ɓɛɛ̀ sasay ɓi tìtimà, rì ɓɛ ɓɛɛ̀ kɛ̀ɛ̀kɛɛ miì, ɓɛ rɛlàkày fìràɓ,

¹⁸ɓɛ kuùkùgsɛ̀n di ɓaa ghɛn fisilì fi ɗuu ɗi ɗyɛɛ̀ ɗiighɗigsì bàn ìnɛn, ɓɛ kpaakpàà lɛ bàn ì be yɛ̀ɛ kpagà yɛ̀ɛ coo bàn ìnɛ?

¹⁹Ɓɛ ɗyɛɛɗyɛ̀ɛ̀rɛ̀ngà kùrùɓu ɓi mɛ̀to, di ɓɛɛ̀ rèereèdɛ̀n, ɓɛ waatɛ̀n ɓìlɛ̀ɓì, di ɓɛɛ̀ kuukugsɛ̀n jɛ̀ɛ̀ aɗyoo lɛ: Nyìighnyìg, nyìighnyìg rì coo bàn ìnɛ; ɓum ɓɛ̀cèm ɓɛ ɓɛ ri rì tìtimà ɓi rìɓày à kìkòn, ɓɛ mmɛ kum lɛ ìkum wu ɓi bàn ìnɛn, yɛ̀ɛ ghali ìreɓ ɓi maa hawò bog!

²⁰Wɔ̀ ɗyoo, ù rì lɛ ù sàmsàm ɓi rìɗyaŋ ɗi bàn ìnɛn ì ɗyaŋi, rì mìni ɓɛ̀gherɛ̀n, rì ɓɛ̀kɛ̀nì-fìtom rì ɓɛ̀kpaŋzì-ɓìɓan girig, ɓisuulɛ Bɛ̀ll à rɔ̀ŋi kìɓan kin yɛ̀ɛ à pɔnɔsii yɔ̀.

²¹Fɔlɔɔ nnɛ kìtèetèɗ ki ŋwaà-fìtom ki pɛsìghà gɔ̀g ìnɛ ì ɓaghà yɛ̀ɛ coo rikem ɗi kipɛn, à pìg yɔ̀ ɓi rìɓày à kìkòn di a kpaakpaa lɛ: Fɛlɛ nnɛ ɓɛ ri ɓiì pìigh coo bàn ì Baɓilon fɛlɛ azi ri ìtèɗ, ɓum ɓaa ghɛɛ̀dii gɛ tì ɓi yɔ̀.

²²Ɓɛ ri wogtii gɛ ɓi gom ì ɓɛ̀ɓoògh-fìloŋ, rì ɓɛ̀ɓoògh-ɓyom, rì ɓɛ̀rɔŋì-zàro, rì ɓɛ̀rɔŋì-mam a lɔ̀ŋkɔɔ. Ɓɛ̀ kɛɛ̀ ki tanɛn ti ŋwaànɛ à yii rìkì ɗi rikuu ɗi kisay ɗiɗɛŋ nsoò ɗìfog; ɓɛ wogtii gɛ ɓi gom ì rìkem ɗi kipɛn foo,

²³kìtɛɛtɛn ki lamɓà kaa ghɛnɛɛ gɛ tì ɓi foo, ɓɛ ki wogtii gɛ ɓi jɛ̀ɛ̀ ì ǹwɔlì giɓ rì gil foo. Ɓisuulɛ ɓɛ̀kìì-dùne ɓɔɔ ɓɛ ɓaghà ɓìtèetèɗ ɓi ɓi ziinɛ, rì tì lɛ, ù yègsìghà ɓìlɔ̀ŋ ɓìcèm rì mɛ̀ghèy mɔɔ mɛ kifuu,

²⁴rì tì lɛ, ɓɛ tanɛ̀ngà lɛ rì bwaɓ yi ɓɛkpaŋzì-ɓìɓan, rì yi ɓɛgherɛ̀n, rì yi ɓum ɓɛ̀cèm ɓɛ ɓɛ cuusìghà ɓi ziinɛ a lɔ̀ŋkɔɔ.