Read Bafia ÀPÒKÀLIƁSƐ̀ 19 Bible Online

ÀPÒKÀLIƁSƐ̀ 19 - Bafia bible

ÀPÒKÀLIƁSƐ̀ 19

¹Ajɛ̀m ìnɛn ǹwokà coo jɛ̀ɛ̀, ì pisɛ̀n yɛ̀ɛ jɛ̀ɛ̀ ì coo kituu ki ɓum kɛɛ ri ɓi ɗyoo ɓi ɗùm ki kpaakpàà lɛ: Alèluyà! Gòri, rìkem, rì ìtèɗ, ɓi ri ɓyom ɓi Bɛ̀ll wìs.

²Ɓisuulɛ rìren ɗii ɗi ɓiɓan ɗi ri miì, ɗi ki ɓa lɛ saaɗ. Àa m̀pɔnɔsii coo giɓ a rìɓàmɓà ànɛ àa n-yooyògsì zi ri rìɓàmɓà ɗii, à ki rɔ̀ŋ bwaɓ yi ɓɛ̀kìì-ɓìsay ɓii ɓɛ à wowòlà.

³Nni ɓɛ ɓiìtìghà tì kìkpaà lɛ: Alèluyà. Fɔɔnnɛ fìsilì fi fyɛɛ̀ ɗiighɗigsì bàn ìnɛn, fyɛɛ̀ syoosyoo fiɗyàɓ fikɔ̀ɔ̀.

⁴Fɔɔnnɛ ɓɛ̀sɛ̀ɛ̀mɛn ɓɛ ɓum ɓɛ ritin ɗì ɓɛnin, ɗì nyàm yi kinìn, ɓɛ ɓakà mɛ̀ɗu ɓi zi, ɓɛ ɓɔgsì Bɛ̀ll ànɛ à kɔ̀kɔrii ɓi-kɔ̀ɔ̀ wu rilàmì di ɓɛɛ̀ kpaakpaa lɛ: Ààmɛ̀n Alèluyà!

⁵Nni jɛ̀ɛ̀ ì faŋìghày ɓi-kɔ̀ɔ̀ wu rilàmì lɛ: Ɓɔgsiina Bɛ̀ll wìs, mìni ɓɛ̀kìì-ɓìsay ɓii ɓɛ̀cèm, mìni ɓɛ ɓì ti ɓì risàg nyi lɛ rì ɓɔɓti rì ɓɛ̀sɛ̀ɛ̀mɛn.

⁶Fɔɔnnɛ ǹwokà jɛ̀ɛ̀ di yɛɛ̀ wɔ̀ɔ̀wɔɔ yɛ̀ɛ jɛ̀ɛ̀ ì coo kituu ki ɓum, ì pisɛ̀n ɗì gom ì ɓyoo ɓikus ɓi riɓày, nsoò lɛ gom ì baàbàn ìnɛ yɛɛ̀ ɓoɓog ri ìtèɗ, jɛ̀ɛ̀ ìncèm ì kpaakpàà lɛ: Alèluyà! Lɛ Kan Bɛ̀ll à ìtèɗ wucèm à mɛ rèsi kilàmì kii.

⁷Ti nyààrɛɛna, tì sàmsàm, tì fafà nyi rìkem ɓisuulɛ tìcàɓ ti ɓi rìwɛy ɗi Man à jɔ̀ɔ̀ ti kpaŋi, gil a mɛ ki pègsɛ̀n.

⁸Ɓɛ nfaa nyi ìtèɗ wulɛ a waàtɛn syeesyee à kìrimitì ànɛ a lònlòm, à ki ɓa ntɛnɛn. Syeesyee à kìrimitì ànɛn yɛɛ ri ɓìsyeesyee ɓi ɓiɓan ɓi ɓɛ̀gherɛ̀n ɓɛ ti ɓɛ kilàg.

⁹Nni ŋwaà-fìtom anɛ̀n à kpaaghà mɛ̀ lɛ kàna lɛ: Mààgh rì ɓumɓɛ ɓɛ ri ɓɛ̀lààghrakɛn a dinà ì rìwɛy ɗi Man à jɔ̀ɔ̀; fɔɔnnɛ à kpatìghà mɛ̀ lɛ: Jɛ̀ɛ̀ yi, yi ri ɓɛ̀kɔɔ̀kɔɔ̀ ɓɛ jɛ̀ɛ̀ ɓɛ Bɛ̀ll.

¹⁰Nni ǹkpìghà nyi a mɛ̀kòò lɛ mɓɔgsi nyi kìɓan kifog, à kpaa mɛ̀ lɛ: Kɔ̀ɔ fèèghrɛn ki kìi com kidɛŋ fɔlɔɔ; mɛ̀ ǹɗì lɛ mɛ̀ reŋkàŋ wɔ̀ɔ̀ a kìsay, ǹki ɓa ti reŋkàŋ à ɓɛ̀goni ɓɛ ɓɛ tekà ɓìɓan ɓi Yeesus à tɛɛ̀zìghà. Bɛ̀ll innɛ ɓɔgsi, lɛ ɓìɓan ɓi Yeesus à rèsìghà ɓyɛɛ ri ǹghay ànɛ à ti à rèsàg ɓɛ̀kpaŋzì-ɓìɓan, com ki ɓɛɛ kpaà.

¹¹Fɔɔnnɛ ǹghɛngà ɗyoo ɗìnɛmɓɛn ǹghɛn zòm i kìmɓɛ̀rɛ̀ ì mpuɓ, ŋwaànɛ à ɓaghà ɓi zòm inɛ̀n aɗyoo, à ɓaghà ɗii lɛ, Ŋwaà-ǹtyweeyi, rì wusìnɛ̀ɗ à kɔɔ̀kɔɔ̀, a yɔ̀myɔm ɓiɓan, à ki ɗùùɗuu wɛ̀y ɓi ɓɛ̀saaɗ.

¹²Mis mii mɛ ri ǹɗòò wu ɗuu; ɓɛ̀tàm ɓɛ rikem ɓɛ ɓa nyi ɓi nto kìtuu; à rì ɗii ɗì kànɛn ɓi nyoo, ɗi ŋwaàdɛŋ à yii ɓi, i ki cee ɓi lɛ nyimiɗ,

¹³à rì ǹwaatɛn rìga ànɛ à rì bwaɓ ri bwaɓ, à ki rì ɗii lɛ jɛ̀ɛ̀ ì Bɛ̀ll.

¹⁴Mɛ̀raŋ mɛ ɓɛsujàà ɓɛ aɗyoo mɛ nɔɔ̀nɔ̀tìghà nyi ɓi zòm yi kimbɛ̀rɛ̀ yi puɓ, ɓɛ waatàg ɓìsyeesyee ɓi ɓɛkìrimitì ɓɛ puɓ, ɓɛ ɓɛ ri ɓɛ̀tɛnɛn.

¹⁵Gàfàg ì mpooyɛn i kpaŋ yì nyi ɓi ŋwɔm lɛ a ɓog ɓìlɔ̀ŋ ri yɔ̀; à rì ɓyɔ ɓiì kɛ̀ɛ̀sii ri ǹkpas wu bɔŋ, à ki saɓ ɓiɗùn ɓi viìnyɛ̀ ɓi wayɗ wu mɛrɔ̀g mɛ coo bim i Bɛ̀ll à ìtèɗ wucèm.

¹⁶Ɓi rìga wìì rì ɓi ɓɛ̀y wii, ɗii ɗi ri miì ɗì kànɛn lɛ rìfòm ɗi mɛfòm, rì Kan ànɛ a ɓɛ̀kan.

¹⁷Nni ǹghɛngà ŋwaà-fìtom adɛŋ di à rɛrɛlii ɓi ŋwos; à làmɓɛ̀ngà tììlì tìcèm ti ti lɛŋlɛ̀ŋgà jɛ̀ɛ̀ aɗyoo lɛ: Yùunay, ɓi taŋzɛn ɓi coo dinà ì Bɛ̀ll,

¹⁸lɛ di ɓi ɗi lɛ rì mɛ̀mùù mɛ mɛfòm, rì ɓɛ̀kɔ̀mɛ̀n ɓɛ̀sujàà, rì ɓìtèetèɗ ɓi ɓum, rì mɛ zòm yi kimbɛ̀rɛ̀ rì ɓumɓɛ ɓɛ ri ɓi zòm yiǹ aɗyoo, rì mɛ ɓum ɓɛ̀cèm lɛ, rì ɓɛ̀kpàn rì ɓɛ̀roɓɛ ɓɛ yin ɓɛkpàn, rì ɓɔɓti rì ɓɛ̀sɛ̀ɛ̀mɛn.

¹⁹Fɔɔnnɛ ǹghɛngà lɛ rì nyàm (ì mɛ̀to taàɓɛ̀ɛ̀), rì mɛ̀fòm mɛ ɓi ziinɛ, rì mɛ̀raŋ maa mɛ ɓɛsujàà, ɓɛ̀taŋzɛn lɛ ɓɛɛ ɗuu wɛ̀y ɗi roànɛ à ɓaghà ɓi zòm i mpuɓ aɗyoo, rì nɗaŋ wii wu ɓɛsujàà.

²⁰Nni ɓɛ ɓangà nyàm ìnɛn nɗaŋ ri ǹkpaŋzì-ɓìɓan ɓi ɓɛpwàà ànɛ à kìkìghà dàm yi yi syogà ɓumɓɛ ɓɛ ɓaghà rì kìrèmzɛnà ki nyàm, ɓɛ ki ɓɔɔɓɔgsì kìfèèghrɛnà ki nyàm ìncèm. Fɔɔnnɛ ɓɛ pikà ɓyom ɓi kiɓɛ̀ɛ̀ ɓiǹ cem ɓi kìràà ki ɗuu, ki ǹdùsi a lɔŋlɔŋ miì.

²¹Gàfàg ìnɛ ì kpagày ɓi ŋwɔm wu roànɛ à ɓaghà ɓi zòm aɗyoo, ì cuusìghà ɓɛ̀ro ɓɛm̀bog; fɔɔnnɛ tììlì tìcèm ti ɗighà mɛ̀mùù maa, ti wuràg.