Read Bafia ÀPÒKÀLIƁSƐ̀ 20 Bible Online

ÀPÒKÀLIƁSƐ̀ 20 - Bafia bible

ÀPÒKÀLIƁSƐ̀ 20

¹Fɔɔnnɛ ǹghɛngà di ŋwaà-fìtom adɛŋ a sɛnsɛn yi aɗyoo, à ɓanɓàn lɛ rì fìɗìɓà fi riɓee ɗi rimɛn, rì coo nsɛ̀ŋi ɓi càg.

²À ɓangà kìnààgɔ̀n ki ki ri lɛ fìɗyàɓ fi nyoo fi lɛ nɗèm, rì Satàn, à kàŋ kɔ bɛn lɛ kɛɛ kɔri fɔlɔɔ bèg tɔɔsìm.

³Nni à pìkà kɔ ɓi coo riɓee ɗi rim, à pɛ̀ɛ̀zì ɗyɔ kìsìmi, à ki roŋ ɗyɔ, lɛ kìnààgɔ̀n kɛ̀ kɛɛ̀ yègsi ti ɓìlɔ̀ŋ à kpaŋ yɛ̀ɛ tɔɔsìm à bèg ànɛn à rì ɓiì ronì. Ajɛ̀m ìnɛn, ki ghɛɛ̀sɛɛ lɛ ɓɛɛ ka càɗ kɔ ɓi maa cààmɛ̀n.

⁴Nni ǹghɛngà mɛ̀kɔ̀ɔ̀ mɛ rilàmì, ɓɛ faghà ɓumɓɛ ɓɛ kɔràkà ɓi mɛ̀kɔ̀ɔ̀ mɛǹ ìtèɗ wu yɔ̀myɔmɛn ɓiɓan; fɔɔnnɛ ǹghɛɛ̀dìghà mɛ̀ghay mɛ ɓum ɓɛ ɓɛ wowòlà ɓisuulɛ ɓɛ ɓaghà ɓɛ̀wusìnɛ̀ɗ ɓɛ Yeesus rì ɓɛ jɛ̀ɛ̀ ì Bɛ̀ll, rì ɓɛ̀roɓɛ ɓɛ ɓɔgsìghà ɓi nyàm ì mɛ̀to taàɓɛ̀ɛ̀, nsoò lɛ kìfèèghrɛnà ki yɔ̀, ɓɛ̀ kɛɛ̀ ki ɓa ri kìrèmzɛnà ki nyàm ìnɛn ɓisu nsoò lɛ ɓi càg. Fɔɔnnɛ ɓɛ ghemɓɛ̀ngà, ɓɛ ki làmi nɗaŋ ɗi Kiris bèg tɔɔsìm.

⁵Ɓìloŋ ɓimbog ɓi ghemɓɛ̀ngà ɓi à kpaŋ yɛ̀ɛ bèg tɔɔsìm yiǹ yi ghaghìghà. Rìghèmɓɛ̀n ɗi ɓiloŋ ɗi ǹtonto ɗyɛɛ ri lɔɔ.

⁶Ɓumɓɛ ɓɛ ri rì gàɓ ɓi rìghèmɓɛ̀n ɗi ɓiloŋ ɗi ǹtonto, ɓɛ ri ɓɛ̀mààghmaagh, ɓɛ ki ɓa ɓɛtɛnɛn; rìwu ɗi kiɓɛ̀ɛ̀ ɗi yiìdi ri ìtèɗ ɓi ɓɔ; ɓɛ ri ɓiì ɓaà ɓɛ̀pìrɛɛtìrɛ̀ ɓɛ Bɛ̀ll rì ɓɛ Kiris, ɓɛ ki làmi nɗaŋ ɗi nyi bèg tɔɔsìm.

⁷Yɛ̀ɛ bèg yi ri ghaagh fɔlɔɔ tɔɔsìm, ɓɛ kpaŋzì Satàn ɓi naà-zày yìì,

⁸fɔɔnnɛ à ri kɛ̀n kiyègsii ɓilɔ̀ŋ ɓìcèm ɓi ɓi ziinɛ ɓìlànà ɓinin lɛ rì Gɔ̀g rì Magɔ̀g, lɛ di a taŋzɛn ɓyɔ ɓisuu wɛ̀y. Bàlì ì ɓìlɔ̀ŋ ɓiǹ ì rì yɛ̀ɛ sɛɛ̀sɛɛ a rìɓày à kìkòn.

⁹Nni ɓɛ riɓìghà zi bimiɗ, ɓɛ ghegsɛ̀n bàn ì ɓɛ̀gherɛ̀n ìnɛ ì rì bàn ìnɛ Bɛ̀ll à ti à keesàg; kìɓan kifog ɗuu ɗi sɛngày aɗyoo, ɗi ɓugsì ɓɔ.

¹⁰Fɔɔnnɛ ɓɛ pikà Satàn anɛ à yègsìghà ɓɔ ɓi kìràà ki ɗuu rì ǹdùsi, jàŋ inɛ ɓɛ ri lɛ, rì nyàm rì ǹkpaŋzì-ɓìɓan ɓi ɓɛpwàà. Ɓɛ ri wowoogh gɛ mɛ̀tɔɓ yɛ̀ɛ ìru yɛ̀ɛ ŋwos fiɗyàɓ fikɔ̀ɔ̀.

¹¹Nni ǹghɛngà ìkɔ̀ɔ̀ wu rilàmì wu puɓ, ɗì roànɛ à kɔ̀kɔ̀rìghà miì. Zi rì ɗyoo ɓi ghɛŋìghà ɓi mis mii ɓyɛ̀ kɛɛ̀ ɓa ti ri ìkɔ̀ɔ̀.

¹²Fɔɔnnɛ ǹghɛngà ɓìloŋ lɛ rì ɓi ɓɛsɛ̀ɛ̀mɛn rì ɓi ɓɔɓti, di ɓi rɛrɛlii asu wu ikɔ̀ɔ̀ wu rilàmì. Ɓɛ ŋwaɗkà ɓɛ̀kaàtà, ɓɛ ŋwaɗtì kaàtà àdɛŋ ànɛ à rì kaàtà à cɛɓ. Fɔɔnnɛ ɓɛ yɔmgà ɓìloŋ ɓiǹ lɔŋ yɛ̀ɛ mɛ̀kìkìì maa mɛ ɓaghà, lèg ànɛ yɛ̀ɛ ki ɓaghà kì kànɛn ɓi ɓɛ̀kaàtà ɓɛǹ.

¹³Rìɓày à kìkòn à pɛ̀ɛ̀zìghà ɓìloŋ ɓi à ɓaghà rì ɓyɔ, rìwu rì tɛ̀ɛ̀, ɓi fa ɓìloŋ ɓi ɓyɔɔ ɓaghà rì ɓyɔ, fɔɔnnɛ ɓɛ yɔmgà mum bimiɗ lɔŋ yɛ̀ɛ mɛ̀kìkìì mii mɛ ɓaghà.

¹⁴Fɔɔnnɛ ɓɛ pikà lɛ rì rìwu, rì tɛ̀ɛ̀ ɓi kìràà ki ɗuu; kìràà ki ɗuu kìn kɛɛ ri rìwu ɗi kiɓɛ̀ɛ̀.

¹⁵Nni mum ǹcèm ànɛ ɗii ɗii ɗi ɓaghà ɓi ɗikànɛn ɓi kaàtà à cɛɓ, ɓɛ pikà nyi ɓi kìràà ki ɗuù.