Read Bafia ÀPÒKÀLIƁSƐ̀ 5 Bible Online

ÀPÒKÀLIƁSƐ̀ 5 - Bafia bible

ÀPÒKÀLIƁSƐ̀ 5

¹Nni ǹghɛngà ɓi weèlem à roànɛ à kɔ̀kɔ̀rìghà ɓi-kɔ̀ɔ̀ wu rilàmì, kaàtà àdɛŋ ànɛ à ɓaghà ǹkànɛn lɛ rì ɓi ɗùm rì ɓi ɓyàs, ɓɛ̀sìtam̀ miì ɓɛ̀ ɓaatiyɛn taàɓɛ̀ɛ̀.

²Nni ǹghɛngà kìtèetèɗ ki ŋwaà-fìtom di kɛɛ̀ làalamɓɛ̀n jɛ̀ɛ̀ aɗyoo lɛ: Ghɛn yɛɛ ghɛɛ̀sɛɛ lɛ à ŋwàɗ kaàtà, à ɓɛkì ɓɛ̀sìtam̀ ɓɛ miì?

³Kìɓan kifog nsoò ɓi ɗyoo ɓi ɗùm, nsoò ɓi ziinɛ, nsoò ɓi ziinɛ a zi, ŋwaàdɛŋ à ɓaghà ɓi ri ìtèɗ wulɛ à ŋwàɗ kaàtà ànɛn nsoò lɛ à seesèè nyi.

⁴Fɔɔnnɛ ǹɗèngà lɛɛ̀gwey ɓisuulɛ ŋwaànɛ à ɓaghà lɛ à ŋwàɗ kaàtà ànɛn nsoò lɛ à seesèè nyi à ɓaghà ɓi.

⁵Nni kìbog ki ɓi ɓìtùg ɓi ɓum ki kpaaghà mɛ̀ lɛ: Kɔ̀ɔ rènɗen! Ghɛna, kìmonɗo ki a Zyuda, dòò ì Davit ì mɛ yagsàg, ì rì ɓiì ŋwàri kaàtà, ì ɓɛ̀kì ɓɛ̀sìtam̀ ɓɛ kitaàɓɛ̀ɛ̀.

⁶Fɔɔnnɛ ǹghɛngà Man à jɔ̀ɔ̀ di à rɛrɛlii ɓi nyìinyìm à ìkɔ̀ɔ̀ wu rilàmì, ɓi nyìinyìm à nyàm yi kinìn, rì ɓi nyìinyìm à ɓɛ̀sɛ̀ɛ̀mɛn ɓɛ ɓum. Man à jɔ̀ɔ̀ ànɛn à ɓaghà lɔŋ yɛ̀ɛ à rì ǹwolɛn, à ɓaghà mɛ̀tɔŋ taàɓɛ̀ɛ̀, rì mis taàɓɛ̀ɛ̀; mis mɛ̀n mɛ ri mɛ̀ghay mɛ Bɛ̀ll mɛ kitaàɓɛ̀ɛ̀ mɛ à romgày ɓi ziinɛ bimiɗ.

⁷Nni à yùghà, à teɗ kaàtà ànɛ à ɓaghà ànɛ̀n ɓi weèlem à roànɛ à kɔ̀kɔrii ɓi-kɔ̀ɔ̀ wu rilàmì.

⁸Lɔŋ yɛ̀ɛ à ghàɓkà kaàtà, nyàm yi kinìn, rì ɓìtùg ɓi ɓum ɓi ritin ɗì ɓinin, ɓi kuŋìghà Man à jɔ̀ɔ̀ asu, mum ǹcèm ànɛ ɓi ɓɔ, à ɓaghà ɓi càg lɛ rì fìloŋ rì ɓeŋ ànɛ à ɓaghà ǹkìyɛn ri gol, ǹɗonɛn rì tìrààre ti ti ri bɔ̀ŋzɛ̀n yi ɓɛgherɛ̀n.

⁹Fɔɔnnɛ ɓɛ kɛkɛ̀ghìghà fyem fi nyɔn di ɓɛɛ̀ kpaakpaa lɛ: Wɔ̀ yɛɛ ghɛɛ̀sɛɛ lɛ ù teɗ kaàtà ànɛ̀n, ù ɓɛkì ɓɛ̀sìtam̀ ɓɛ miì, ɓisuulɛ ɓɛ wolà wɔ̀, ù ki kwèɗ ɓumɓɛ ɓi mɛ̀pwìɗ mɛ̀cèm, ɓìtòkì ɓìcèm, mɛ̀kuu mɛ̀cèm, ɓìlɔ̀ŋ ɓìcèm ɓisuu Bɛ̀ll rì bwaɓ yɔɔ.

¹⁰Ù kìghà lɛ ɓɛɛ ɓa bimiɗ à kìlɔ̀ŋ, ɓɛ ɓa ɓɛ̀pìrɛɛtìrɛ ɓisuu Bɛ̀ll, ɓɛ ri ɓiì làmii ziinɛ.

¹¹Nni ǹseesèèghà, ǹwog jɛ̀ɛ̀ ì kìtuu ki ɓum ɓɛ titom ki ki ceŋzɛ̀ngà ìkɔ̀ɔ̀ wu rilàmì, rì nyàm rì ɓìtùg ɓi ɓum; ɓum ɓɛ titom ɓɛ ɓaghà ɓɛ̀tɔɔsìm lɛ ɓɛ̀tɔɔsìm mɛ̀tin kɛ̀ɛ̀ bàlì.

¹²Ɓɛ laàlàmɓɛ̀ngà jɛ̀ɛ̀ aɗyoo lɛ: Man à jɔ̀ɔ̀ ànɛ ɓɛ wolà à ghɛ̀ɛ̀sɛɛ kì terì ìtèɗ wu rilàmì, rì ìkum, rì ɗyomzɛ̀n, rì ìtèɗ, rì bɔgsɛ̀n, rì rìkem, rì mɛ̀sɛɛ̀ghsɛɛgh.

¹³Fɔɔnnɛ ǹwokà di ɓyom ɓìcèm ɓi Bɛ̀ll à kìghà ɓi ɗyoo ɓi ɗùm, rì ɓi ziinɛ, rì ɓi ziinɛ a zi, rì ɓi rìɓày à kìkòn rì ɓyom ɓìcèm ɓi ɓi ri miì ɓyɛɛ̀ kpaakpaa lɛ: Roànɛ à kɔ̀kɔrii ɓi-kɔ̀ɔ̀ wu rilàmì rì Man à jɔ̀ɔ̀, ɓɛ ghɛɛ̀sɛɛ rì ìtèɗ wu rilàmì fìɗyàɓ fikɔ̀ɔ̀.

¹⁴Fɔɔnnɛ nyàm yi kinìn yi ghaɓkà lɛ Ààmɛ̀n. Ɓɛ̀sɛ̀ɛ̀mɛn ɓɛ ɓum ɓɛ ɓag mɛ̀ɗu ɓi zi, ɓɛ ɓɔgsì Bɛ̀ll.