Read Bafia ÀPÒKÀLIƁSƐ̀ 7 Bible Online

ÀPÒKÀLIƁSƐ̀ 7 - Bafia bible

ÀPÒKÀLIƁSƐ̀ 7

¹Ajɛ̀m ìnɛn nni ǹghɛngà ɓum ɓɛ titom ɓɛnin ɗi ɓɛ rɛrɛlii ɓi mɛ̀fon mɛ zi mɛ kinìn mɛ ɓi ziinɛ, lɛ di bɛ̀ɓ yɛ̀ kɛɛ̀ kì ɓi ziinɛ nsoò ɓi rìɓày à kìkòn, nsoò ɓi kìte kifog.

²Fɔɔnnɛ ǹghɛngà ŋwaà-fìtom adɛŋ di a ɓɔɓɔg yi ɓɛg ànɛ ŋwos a ti à kpagìì, à ɓanɓàn yì sìtam̀ à Bɛ̀ll ànɛ à rì cem ɓi càg. Nni à nyàmgà jɛ̀ɛ̀ aɗyoo, a kpaa kìnìn ki ɓum ɓɛ titom ɓɛ ɓɛ tekà ìtèɗ wulɛ, ɓɛɛ ki ziinɛ, ɗì rìɓày à kìkòn ǹtɔɓ lɛ:

³Kɛ̀ ɓi kòm zi lɛ ɓi ki yɔ̀ kiɓe; nsoò rìɓày à kìkòn, nsoò ɓìte, di tì ka legsi ɓi kirèmzaagh mɛsu mɛ ɓɛ̀kìì-ɓìsay ɓɛ Bɛ̀ll wìs ri sìtam̀.

⁴Fɔɔnnɛ ǹwokà bàlì ì ɓumɓɛ ɓɛ remzàkà rì sìtam̀; ɓi mɛ̀pwìɗ mɛ̀cèm mɛ a Isirayɛl, ɓum ɓɛ ɓaghà ɓɛ̀tɔɔsìm mɛ̀tin taàɓɛ̀ɛ̀ rì ɓum ɓɛ̀tɔɔsìm ɓɛnin.

⁵Ɓi rìpwìɗ ɗi Zyuda, ɓum ɓɛ rèmziyɛn ɓɛ ɓaghà ɓɛ̀tɔɔsìm ǹtɛ̀ɗ rì ɓɛɓɛɛ̀; ɓi rìpwìɗ ɗi Ruɓɛn, ɓum ɓɛ rèmziyɛn ɓɛtɔɔsìm ǹtɛ̀ɗ rì ɓɛɓɛɛ̀; ɓi rìpwìɗ ɗi Gaad ɓum ɓɛ rèmziyɛn ɓɛtɔɔsìm ǹtɛ̀ɗ rì ɓɛɓɛɛ̀;

⁶ɓi rìpwìɗ ɗi Azɛr ɓum ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Nɛftalii ɓum ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Manase ɓum ɓɛ̀tɔɔsìm ǹtɛ̀ɗ rì ɓɛɓɛɛ̀;

⁷ɓi rìpwìɗ ɗi Simeyɔŋ ɓum ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Levi ɓum ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Isakar, ɓɛ̀tɔɔsìm ǹtɛ̀ɗ rì ɓɛɓɛɛ̀;

⁸rìpwìɗ ɗi Zaɓulon, ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Yoosɛɓ ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Bɛŋzyamɛŋ ɓum ɓɛ rèmziyɛn ri sìtam̀ ɓɛ̀tɔɔsìm ǹtɛ̀ɗ rì ɓɛɓɛɛ̀.

⁹Ajɛ̀m ìnɛn nnɛ ǹghɛngà coo kituu ki ɓum ki mum à ɓaghà ɓi lɛ à ɓày, ɓumɓɛ̀n ɓɛ pɛsàkày ɓi ɓìlɔ̀ŋ ɓìcèm, rì ɓi mɛ̀pwìɗ mɛ̀cèm, rì mɛ̀kuu mɛ̀cèm, rì ɓìtòkì ɓìcèm; ɓɛ rɛrɛ̀lìghà asu wu ikɔ̀ɔ̀ wu rilàmì, rì ɓi mis mɛ Man à jɔ̀ɔ̀, ɓɛ waatàg ɓɛ̀kàɓà ɓɛ puɓ, ɓɛ ki ɓa ri maŋ ɓi ɓyàg.

¹⁰Ɓɛ kpaàkpàgsɛ̀n jɛ̀ɛ̀ aɗyoo lɛ: Ǹghɛɓsɛn wu ti wu ɓalàg yì yɛ̀ɛ Bɛ̀ll wìs anɛ à kɔ̀kɔrii ɓi-kɔ̀ɔ̀ wu rilàmì, rì yɛ̀ɛ Man à jɔ̀ɔ̀.

¹¹Ɓum ɓɛ titom ɓɛ ceŋzɛ̀ngà ìkɔ̀ɔ̀ wu rilàmì, rì ɓɛ̀sɛ̀ɛ̀mɛn ɓɛ ɓum, rì nyàm yi kinìn; ɓɛ ɓakàkà mɛ̀su ɓi zi asu wu ikɔ̀ɔ̀ wu rilàmì, ɓɛ ɓɔgsì Bɛ̀ll,

¹²di ɓɛɛ̀ kpaakpaa lɛ: Ààmɛ̀n, bɔgsɛ̀n, rìkem, ɗyomzɛ̀n, ɓìtògsɛ̀n, nyaasɛ̀n, ìtèɗ wu rilàmì, rì ìtèɗ wu zɛy, ɓi ri ɓyom ɓi Bɛ̀ll wìs fìɗyàɓ fikɔ̀ɔ̀ Ààmɛ̀n.

¹³Nni kìbog ki ɓi ɓɛ̀sɛ̀ɛ̀mɛn ɓɛ ɓum ki tekà jɛ̀ɛ̀ ki kpaa mɛ̀ lɛ: Ɓumɓɛ ɓɛ waataagh ɓìlàà ɓi puɓ ɓɛ, ɓɔɔ ri ɓɛ̀ghɛn?

¹⁴Nni m̀ɓàkà nyi lɛ: Kan wɛ̀m wɔ̀ yɛɛ yii! Fɔɔnnɛ à kpaaghà mɛ̀ lɛ: Ɓɛ ri ɓumɓɛ ɓɛ pɛsɛɛ yì ɓi jàŋ yi ǹ-yeesɛ̀n à ɓɛ̀gherɛ̀n à rì lɛɛ̀gwey. Ɓɛ sooghà ɓɛ̀ kàɓà ɓaa ɓɛ ki puɓsi ɓɔ ɓi bwaɓ yi Man à jɔ̀ɔ̀.

¹⁵Kìɓan kiǹ kɛɛ̀ki ɓɛ rɛrɛlii miì asu wu ikɔ̀ɔ̀ wu rilàmì wu Bɛ̀ll, ɓɛ ki ɓɔɔɓɔgsì nyi yɛ̀ɛ ìru yɛ̀ɛ ŋwos ɓi naa yìì. Yɛ̀ɛ roànɛ à rì ǹkɔ̀kɔriyɛn ɓi-kɔ̀ɔ̀ wu rilàmì, à rì toŋ kìnuugh kii à foŋ ɓɔ miì.

¹⁶Ɓaa wogtii gɛ ɓi zày, ɓɛ̀ kɛɛ̀ wogti kinɔli nsoò ŋwos kɛ̀ɛ ɓogti ɓɔ, ɓɛ̀ kɛɛ̀ ki wogti nsoò cɔ̀ɔ̀zɛ̀n.

¹⁷Ɓisuulɛ Man à jɔ̀ɔ̀ ànɛ à kɔ̀kɔrii ɓi nyìinyìm à ìkɔ̀ɔ̀ wu rilàmì à rì ɓɔ ɓiì mɛnii à kɛ̀n ɗì ɓɔ ɓi jàŋ yi ɓɛ̀ǹsim ɓɛ mɛnig ɓɛ cɛɓ ɓɛ ri. Bɛ̀ll à ki tɔ̀sag misì mɛ ɓɔ ɓi mis mɛ̀cèm.