Read Bafia ÀPÒKÀLIƁSƐ̀ 8 Bible Online

ÀPÒKÀLIƁSƐ̀ 8 - Bafia bible

ÀPÒKÀLIƁSƐ̀ 8

¹Yɛ̀ɛ à ŋwàɗkà sìtam̀ à kìtaàɓɛ̀ɛ̀, ɗyoo ɗi maarɛ̀ngà lɛ fyòoog, à kpaŋ nunùg kìden ki cààmɛ̀n.

²Nni ǹghɛngà ɓum ɓɛ titom ɓɛ ɓɛ rɛrɛ̀lìghà ɓi mis mɛ Bɛ̀ll ɓɛ̀sɛ̀ɛ̀ taàɓɛ̀ɛ̀, fɔɔnnɛ ɓɛ faghà ɓɔ mam taàɓɛ̀ɛ̀.

³Nni ŋwaà-fìtom adɛŋ à yùghà kì rɛlii ɓi jàŋ inɛ ɓɛɛ̀ tɔ̀ngi ɓituwe lɛ ɓɛɛ ɓɔgsi Bɛ̀ll rì ɓyɔ, à ɓanɓàngà maa cɔɔgh anɛ ɓɛɛ̀ tɔ̀ngi firu miì, maa cɔɔgh àǹcèm à ɓaghà ǹkìyɛn ɗi gol. Ɓɛ faghà ŋwaà-fìtom anɛ̀n tìrààre lɛɛ̀gwey lɛ a ɓɔgsi Bɛ̀ll rì tyɔ, bas rì bɔ̀ŋzɛ̀n yi ɓɛgherɛ̀n, ɓi com ki ɓɛɛ̀ tɔ̀ngi ɓituwe miì, ki ki ɓaghà Bɛ̀ll asu, ki ɓa kìkiyɛn ɗi gol.

⁴Fɔɔnnɛ fìsilì fi ɓyom ɓi lɛ rì tìrààre rì bɔ̀ŋzɛ̀n yi ɓɛgherɛ̀n ɓi syooghà ɓi càg ki ŋwaà-fìtom, fi ɓɔg Bɛ̀ll asu.

⁵Nni ŋwaà-fìtom a tekà maa cɔɔgh anɛ ɓɛɛ̀ tɔ̀ngi firu miì ànɛ̀n, à roòzì nyi rì ɗuu ɗi ɗi ɓaghà ɓi com ki ɓɛɛ̀ tɔ̀ngi ɓyom miì lɛ ɓɛɛ ɓɔgsi Bɛ̀ll, à pìg nyi ɓi zi; fɔɔnnɛ baàbàn ì tumɛ̀ngà rìɓoɓòg, ɓyoo gom ɓi ghaghààgh, ŋwàaŋwàɗ à kìkì, zi i nyɛ̀ɛ̀nyɛ̀ŋɗɛ̀n.

⁶Fɔɔnnɛ kìtaàɓɛ̀ɛ̀ ki ɓum ɓɛ titom ki ki ɓaghà rì mam ki ɓuŋɛ̀ngà lɛ kɛɛ rɔŋ mɔ.

⁷Nni ŋwaà-fìtom a ǹtonto à rɔgà ɗyam, bol ì gɔ̀g rì ɗuu, ɓì ɓùtakɛn ɗi bwaɓ ɓi suùrɛ̀n ɓi zi; fɔɔnnɛ ki kighà lɛ kìlànà ki zi kifog ki ɓi ɓìlànà ɓiraa ki ɗig, gàɓ ì kìraa ìnɛ ɓi ɓìte ɓìcèm ɓi ɓi ziinɛ ɓi ɗig, ɓyaaɓi ɓìcèm ɓi ɓi ɓaghà cem ɓi ɗig.

⁸Ŋwaàfìtom a kìɓɛ̀ɛ̀ a rɔŋ ɗyam, ɓɛ pig rìkuu ɗi coo dòn diɗɛŋ ɗi ɗi roòròòghà, ɓi rìɓày à kìkòn. Fɔlɔɔ nnɛ gàɓ ì kìraa ìnɛ ɓi mɛ̀nig mɛcèm mɛ ɓi rìɓày à kìkòn ì ghalà bwaɓ,

⁹gàɓ ì kìraa ìnɛ ɓi ɓyom ɓìcèm ɓi ɓi ghɛghɛ̀ɓkà ɓi rìɓày à kìkòn ì cuughà, gàɓ ì kìraa ìnɛ ɓi ɓìkɔm ɓìcèm ì ɗyogà.

¹⁰Nni ŋwaà-fìtom à kìraa à rɔgà ɗyam, coo fyɛy fi kɔsɛ̀n yì aɗyoo, fi roòròò yɛ̀ɛ baɓ; fyɛy fiǹ fi kpighà ɓi gàɓ ì kìraa ìnɛ ɓi ɓɛ̀rìɓày rì mɛ̀syòm mɛ̀cèm mɛ ɓi ziinɛ.

¹¹Fyɛy fiǹ fi ɓaghà ɗii lɛ kìte ki lòlolɛn, fɔɔnnɛ ɓum lɛɛ̀gwey ɓɛ cuughà ɓi rìnɔ ɗi ɓɛ nɔnɔ̀ghà mɛ̀nig mɛ mɛ sukà mɛǹ kìlòloli yɛ̀ɛ ɓaŋ.

¹²Nni ŋwaà-fìtom a kìnìn à rɔgà ɗyam, kìlànà kìfog ki ɓi ɓìlànà ɓi ŋwos ɓi kiraa, rì kìfog ki ɓi ɓìlànà ɓi ŋwii ɓi kiraa, rì gàɓ ì kìraa ìnɛ ɓi tyɔɛy ticèm, ɓi ɓuɓìghà; gàɓ ì kìraa ìnɛ ɓi rìlònlòm ɗi ɓyom ɓìn, ì ghaɓɓɛ̀n; fɔɔnnɛ gàɓ ì kìraa ìnɛ ɓi kìtɛɛtɛn ki ŋwos i ɓuɓìghà, ki kilɛ̀n tì girig fɔlɔɔ ɓi ɓɛg ànɛ à-ru.

¹³Nni ǹseesèèghà tì, ǹwog di bèè i fììlì yɛɛ̀ lɛŋlɛŋ ɓi ɗyoo ɓi ɗùm, ì kpaakpàà jɛ̀ɛ̀ aɗyoo lɛ: Nyìighnyìg! Nyìighnyìg! Nyìighnyìg rì ɓumɓɛ ɓi ziinɛ ɓisuu gom ì mam mɛ ɓum ɓɛ titom ɓɛ kiraa ɓɛ siitòn ɓɛ ri ɓiì rɔŋì.