Read Bagheli मरकुस 16 Bible Online

मरकुस 16 - Bagheli bible

मरकुस 16

¹जब पबित्र दिन बीतिगा, तब मगदल गाँव के मरियम, अउर याकूब के महतारी मरियम, अउर सलोमी महकँइ बाली चीजन काहीं खरीदिन, कि जाइके यीसु के देंह माहीं मलँय।

²हप्ता के पहिलय दिन बड़े सकारे, जब सुरिज निकरबय भ रहा हय, ऊँ पंचे कब्र के लघे आईं।

³अउर आपस माहीं बतात रही हँय, कि “हमरे खातिर कब्र के दुअरा से उआ पथरा को ढनगाई?”

⁴जब ऊँ पंचे ध्यान से कबर कइती देखिन, त पथरा ढनगा रहा हय! जबकि उआ पथरा खुब बड़ा रहा हय।

⁵अउर कब्र के भीतर जाइके ऊँ पंचे एकठे नवजमान काहीं उजर ओन्हा पहिरे, दहिने कइती बइठे देखिन, त चउआय गईं।

⁶उआ नवजमान उनसे कहिस, “चउ आ न, तूँ पंचे नासरत गाँव के रहँइ बाले यीसु काहीं ढुँढ़ते हया, जउन क्रूस माहीं चढ़ाए गे रहे हँय, ऊँ जिन्दा होइगे हें, इहाँ नहीं आहीं; देखा, इहय उआ जघा आय, जहाँ ऊँ पंचे यीसु काहीं धरिन तय।

⁷पय तूँ पंचे जा, अउर उनखे चेलन से अउर पतरस से बताबा, कि यीसु तोंहसे पहिले गलील प्रदेस माहीं जइहँय, जइसा ऊँ तोंहसे कहिन तय, तूँ पंचे उहँय उनहीं देखिहा।”

⁸अउर ऊँ सगली जने कब्र से निकरिके भाग गईं; काहेकि कँप कँपी अउर घबराहट उनखे ऊपर छाइगे रही हय; अउर ऊँ पंचे कोहू से कुछू नहीं कहिन, काहेकि डेरात रही हँय।

⁹हप्ता के पहिल दिन भिनसार होतय, यीसु जिन्दा होइके, सबसे पहिले मगदल गाँव के मरियम काहीं, जउने से सातठे बुरी आत्मन काहीं निकारिन तय, देखाई दिहिन।

¹⁰ऊँ जाइके यीसु के साथ म रहँइ बालेन काहीं जऊँ खुब दुखी रहे हँय, अउर रोबत रहे हँय, यीसु के जिन्दा होंय के खबर दिहिन।

¹¹पय ऊँ सगले जन इआ सुनिके कि यीसु जिन्दा हें, अउर मगदल गाँव के मरियम उनहीं देखिन हीं, बिसुआस नहीं किहिन।

¹²ओखे बाद यीसु दुसरे रूप माहीं, चेलन म से दुइ जनेन काहीं, जब ऊँ पंचे गाँव कइती जात रहे हँय, देखाई दिहिन।

¹³उनहूँ पंचे जाइके दुसरे चेलन काहीं इआ खबर दिहिन, पय ऊँ पंचे उनहूँ के बिसुआस नहीं मानिन।

¹⁴बाद म यीसु ऊँ ग्यरहँव चेलन काहीं घलाय, जब ऊँ पंचे खाँइ बइठ रहे हँय, तबहिनय देखाई दिहिन, अउर उनखे बिसुआस न करँइ, अउर दिल कठोर करँइ के कारन उलाहना दिहिन, काहेकि जेतने जने यीसु काहीं जिन्दा होए के बाद देखिन रहा हय, ईं पंचे, उनहूँ केर बिसुआस नहीं किहिन तय।

¹⁵अउर यीसु अपने चेलन से कहिन, “तूँ पंचे सगले संसार माहीं जाइके, सगले संसार के मनइन काहीं खुसी के खबर सुनाबा।

¹⁶जे कोऊ बिसुआस करी, अउर बपतिस्मा लेई ओहिन काहीं मुक्ती मिली, पय जे कोऊ बिसुआस न करी, उआ दोसी ठहराबा जई।

¹⁷बिसुआस करँइ बालेन म इआ अदभुत चिन्हारी होई, कि ऊँ पंचे हमरे नाम से बुरी आत्मन काहीं निकरिहँय, अउर नई-नई भाँसा बोलि हँय,

¹⁸साँपन काहीं उठाय लेइहँय, अउर अगर ऊँ पंचे जहर बाली चीजन काहीं खाय लेइहँय, तऊ उनहीं कुछू नुकसान न होई; ऊँ पंचे बिमारन के ऊपर हाँथ धइ देइहँय, त ऊँ नीक होइ जइहँय।”

¹⁹प्रभू यीसु चेलन से बात करे के बाद स्वरग माहीं ऊपर उठाय लीन गें, अउर जाइके परमातिमा के दहिने कइती बइठिगें।

²⁰अउर चेला लोग उहाँ से निकरिके हरेक जघन माहीं प्रचार किहिन, अउर प्रभू उनखे साथ माहीं काम करत रहिगें, अउर ऊँ चमत्कारन के कारन, जऊँ चेलन के साथ-साथ होत रहे हँय, बचन काहीं मजबूत करत रहिगें। आमीन।