Read Bagheli मरकुस 8 Bible Online

मरकुस 8 - Bagheli bible

मरकुस 8

¹उन दिनन माहीं जब पुनि खुब भीड़ एकट्ठा होइगे, अउर उनखे लघे कुछू खाँइ क नहीं रहा, तब यीसु अपने चेलन काहीं लघे बोलाइके उनसे कहिन,

²“हमहीं इआ भीड़ के मनइन के ऊपर बड़ी दया आबत ही, काहेकि ईं पंचे तीन दिना से हमरे साथ हें, अउर इनखे लघे खाँय के खातिर कुछू हइअव नहिं आय।

³अगर हम इनहीं भूँखेन घर पठय देई, त ईं पंचे बिहोस होइके गइलय माहीं परे रहि जइहँय, काहेकि इआ भीड़ म से कुछ मनई खुब दूरी से आए हँय।”

⁴तब चेला लोग यीसु काहीं जबाब दिहिन, “इहाँ सुनसान जघा माहीं एतनी रोटी हम पंचे कहाँ से लइ अई, कि इआ सगली भीड़ के मनई खाइके संतुस्ट होइ जाँय?”

⁵तब यीसु अपने चेलन से पूँछिन, “तोंहरे लघे केतनी रोटी हईं?” चेला लोग कहिन, कि “सातठे।”

⁶तब यीसु सगले जनेन काहीं भुँइ माहीं बइठँय के हुकुम दिहिन, अउर यीसु ऊँ सातव रोटिन काहीं हाँथे म लइके, परमातिमा काहीं धन्यबाद दइके टोरिन, अउर अपने चेलन काहीं देत गें, कि सगले जनेन काहीं परसँय, अउर ऊँ पंचे सगले मनइन के आँगे परस दिहिन।

⁷अउर उनखे लघे कुछ छोट-छोट मछरिव रही हँय, यीसु ऊँ मछरिन काहीं लइके परमातिमा काहीं धन्यबाद दिहिन, अउर उनहूँ काहीं परसँय के खातिर चेलन काहीं हुकुम दिहिन, कि सगले मनइन के आँगे परस देंय।

⁸इआमेर से सगले मनई खाइके संतुस्ट होइगें। अउर ओखे बाद चेला लोग, बँचे टुकड़न से सात टोपरी भरिके उठाइन।

⁹अउर खाँइ बाले चार हजार के करीब रहे हँय; ओखे बाद यीसु भीड़ के सगले मनइन काहीं बिदा किहिन।

¹⁰अउर यीसु तुरन्तय अपने चेलन के साथ नाव माहीं चढ़िके, दलमनूता प्रदेस म चलेगें।

¹¹पुनि फरीसी लोग आइके यीसु से बाद-बिबाद करँइ लागें, अउर यीसु के परिच्छा लेंइ के खातिर उनसे स्वरग के अदभुत चिन्हारी देखामँइ क कहँइ लागें।

¹²यीसु अपने आत्मा माहीं खुब दुखी होइके कहिन, “इआ समय के मनई काहे बिसुआस नहीं करँय, अदभुत चिन्हारी देखँइ चाहत हें? हम तोंहसे सही कहित हएन, कि इआ समय के मनइन काहीं कउनव अदभुत चिन्हारी न देखाई जई।”

¹³अउर यीसु उनहीं छोंड़िके पुनि नाव माहीं चढ़िके झील के दुसरे पार चलेगें।

¹⁴चलत समय चेला लोग रोटी लेंइ क बिसरिगें तय, अउर नाव माहीं उनखे लघे एकठेरिन रोटी रही हय।

¹⁵यीसु अपने चेलन काहीं चेताइन, कि “देखा, फरीसी लोगन के खमीर अउर हेरोदेस राजा के खमीर से सतरक रह्या।”

¹⁶इआ सुनिके चेला लोग आपस माहीं सोच-बिचार कइके कहँइ लागें, कि “हमरे लघे रोटी त नहिं आय।”

¹⁷इआ जानिके यीसु उनसे कहिन, “तूँ पंचे आपस माहीं काहे इआ सोच-बिचार करते हया, कि हमरे लघे रोटी नहिं आय? का तूँ पंचे अबय तक नहीं जाने समझे पाया? का तोंहार पंचन के मन एतना कठोर होइगा हय?

¹⁸काहे तूँ पंचे अपने आँखिन से नहीं देख्या? अउर अपने कानन से नहीं सुन्या? काहे तोहईं सुध नहिं आय?

¹⁹कि जब हम पाँच हजार मनइन के खातिर पाँचठे रोटी टोरेन तय, त तूँ पंचे रोटी के टुकड़न से केतनी टोपरी भरिके उठाया तय?” तब चेला लोग उनसे कहिन, “बारा टोपरी।”

²⁰अउर “जब चार हजार मनइन काहीं खबामँइ के खातिर सातठे रोटी रही हँय, तब तूँ पंचे रोटी के टुकड़न से केतनी टोपरी भरिके उठाया तय?” चेला लोग कहिन, “सात टोपरी।”

²¹यीसु अपने चेलन से कहिन, “काहे तूँ पंचे अबहिनव तक नहीं समझे पाया?”

²²यीसु अपने चेलन के साथ बैतसैदा गाँव माहीं आएँ, तब कुछ जने एकठे आँधर मनई काहीं यीसु के लघे लइ आएँ अउर यीसु से चरउरी कइके कहिन, कि “अपना इआ आँधर मनई क छुइ देई त नीक होइ जाय।”

²³यीसु उआ आँधर मनई के हाँथ पकड़िके गाँव से बहिरे लइगें, अउर ओखे आँखिन माहीं आपन थूँक लगाइके ओखे ऊपर आपन हाँथ धरिन अउर ओसे पूँछिन, “का तूँ कुछू देखते हया?”

²⁴उआ मनई चारिव कइती निहारिके कहिस, “हम मनइन काहीं देखित हएन, जउन हमहीं रेंगत बिरबन कि नाईं देखात हें।”

²⁵तब यीसु दुबारा ओखे आँखिन माहीं आपन हाँथ धरिन, अउर उआ आँधर मनई बड़े ध्यान से देखिस, काहेकि उआ नीक होइगा तय, अउर ओही सब कुछ साफ-साफ देखाँइ लाग।

²⁶यीसु उआ आँधर मनई से इआ कहिके घर पठय दिहिन, “तूँ इआ गाँव के भीतर न जया।”

²⁷यीसु अपने चेलन के साथ कैसरिया प्रदेस के फिलिप्पी सहर के लघे के गाँव माहीं चलेगें। गइल म यीसु अपने चेलन से पूँछिन, “लोग हमहीं का कहत हें?”

²⁸तब चेला लोग कहिन, कि “कुछ मनई यूहन्ना बपतिस्मा देंइ बाला, त कुछ जने एलिय्याह नबी, त अउर कुछ जने इआ कहत हें, परमातिमा के सँदेस बतामँइ बालेन म से एक जने जि आबा हय।”

²⁹इआ सुनिके यीसु अपने चेलन से पूँछिन, “पय तूँ पंचे हमहीं का कहते हया?” पतरस यीसु से कहिन, “अपना मसीह आहेन।”

³⁰तब यीसु अपने चेलन काहीं चेताइके कहिन, कि “तूँ पंचे हमरे बारे माहीं, इआ बात कोहू से न बताया।”

³¹तब यीसु अपने चेलन काहीं बतामँइ लागें, कि “मनई के लड़िका के खातिर इआ जरूरी हय, कि उआ खुब दुख सही, अउर यहूदी धारमिक अँगुआ लोग अउर प्रधान याजक लोग अउर मूसा के बिधान सिखामँइ बाले, ओही अपने बनाए नेम के बिरोधी मानिके मारि डरिहँय, अउर उआ तिसरे दिन जिन्दा होइ जई।”

³²यीसु इआ बात काहीं अपने चेलन से बेलकुल साफ-साफ कहि दिहिन। इआ बात सुनिके पतरस यीसु काहीं अलग लइ जाइके डाँटँइ लाग।

³³पय यीसु पीछे मुड़िके अपने चेलन कइती देखिके, पतरस काहीं दपटिके कहिन, “हे सइतान, हमरे आँगे से दूरी होइजा; काहेकि तँय परमातिमा के बातन माहीं नहीं, बलकिन मनइन के बातन माहीं मन लगउते हए।”

³⁴यीसु भीड़ के मनइन अउर अपने चेलन काहीं लघे बोलाइके कहिन, “जे कोऊ हमरे पीछे आमँइ चाहय, उआ अपने मन के मुताबिक जिअब छोंड़िके, हरेक दिन अपने सब दुख तकलीफन काहीं सहिके जऊँ क्रूस के बराबर हें, हमरे पीछे चलय।

³⁵काहेकि जे कोऊ आपन प्रान बचामँइ चाही, उआ ओही गमाय देई, अउर जे कोऊ आपन प्रान हमरे खातिर अउर खुसी के खबर के खातिर गमाय देई, उआ ओही बचाए पाई।

³⁶अगर कउनव मनई सगले संसार के मालिक होइ जाय, अउर आपन प्रान गमाय देय, त ओही का फायदा होई?

³⁷अउर मनई आपन प्रान बचामँइ के बदले माहीं का दइ सकत हय?

³⁸जे कोऊ इआ ब्यभिचारी अउर पापी पीढ़ी के मनइन के आँगे, हमसे अउर हमरे बातन काहीं मानँइ से लजई, त मनई के लड़िका घलाय, जब उआ पबित्र दूतन के साथ अपने पिता परमातिमा के महिमा सहित अई, तब उहव ओही आपन मानँय से लजई।”