Read Bagheli यूहन्ना 15 Bible Online

यूहन्ना 15 - Bagheli bible

यूहन्ना 15

¹यीसु कहिन, “सच्ची दाखलता हमहिन आहेन; अउर हमार पिता किसान आहीं।

²हमरे हरेक उन डेरइअन काहीं, जउने माहीं फर नहीं लागँय, ऊँ काटि डारत हें, अउर हरेक उन डेरइअन काहीं जउन फरती हईं, ऊँ छाँटत हें, जउने उनमा अउर जादा फर लागँय।

³तूँ पंचे त उआ बचन के कारन जउन हम तोंहसे कहेन तय, ओखे ऊपर बिसुआस किहे के कारन सुद्ध हया।

⁴तूँ पंचे हमसे जुड़े रहा, अउर हम तोंहसे : जउनमेर डेरइआ अगर दाखलता माहीं जुड़ी न रहय, त अपने-आप से नहीं फर सकय, उहयमेर तुहूँ पंचे घलाय अगर हमसे जुड़े न रइहा, त फर नहीं सकते आह्या।

⁵हम दाखलता आहेन: तूँ पंचे डेरइआ आह्या; जे कोऊ हमसे जुड़ा रहत हय, अउर हम ओसे, त ओमाहीं खुब फर लागत हें, काहेकि तूँ पंचे हमसे अलग होइके कुछू नहीं कइ सकते आह्या।

⁶अगर कोऊ हमसे जुड़ा न रही, त उआ टूट डेरइआ कि नाईं फेंक दीन जात हय, अउर झुराय जात हय, अउर मनई उनहीं समेटिके आगी माहीं डार देत हें, अउर उँइ जरि जाती हईं।

⁷अगर तूँ पंचे हमसे जुड़े रहा, अउर हमार बातँय तोंहरे जीबन माहीं बनी रहँय, त जउन कुछू तूँ पंचे चहते हया त मागा, उआ तोंहईं पंचन काहीं मिल जई।

⁸हमरे पिता परमातिमा के बड़ाई एहिन माहीं होत ही, कि तूँ पंचे खुब फर लइ आबा, तबहिनय तूँ पंचे हमार सच्चे चेला कहइहा।

⁹जइसन पिता परमातिमा हमसे प्रेम किहिन हीं, उहयमेर हमहूँ तोंहसे प्रेम किहेन हय, हमरे प्रेम माहीं बने रहा।

¹⁰अगर तूँ पंचे हमरे हुकुमन काहीं पालन करिहा, त हमरे प्रेम माहीं बने रइहा: जइसा कि हम अपने पिता परमातिमा के हुकुमन काहीं पालन किहेन हय, अउर उनखे प्रेम माहीं बने रहित हएन।

¹¹हम ईं बातँय तोंहसे एसे कहेन हय, कि हमार आनन्द तोंहरे जीबन माहीं बना रहय, अउर तोंहार पंचन के आनन्द पूर होइ जाय।

¹²हमार हुकुम इआ हय, कि जउनमेर हम तोंहसे प्रेम किहेन हय, उहयमेर तुहूँ पंचे आपस माहीं एक दुसरे से प्रेम करा।

¹³अगर कोऊ अपने साथिन के खातिर आपन प्रान देय, त ओसे बढ़िके कोहू के प्रेम नहिं आय।

¹⁴जउन हुकुम हम तोंहईं पंचन काहीं देइत हएन, अगर उनखर पालन करा, त तूँ पंचे हमार साथी आह्या।

¹⁵आज से हम तोंहईं दास न कहब, काहेकि दास नहीं जानय कि, ओखर मालिक का करत हय: पय हम तोंहईं साथी कहित हएन, काहेकि जउने बातन काहीं हम अपने पिता परमातिमा से सुनेन हय, ऊँ सगली बातँय तोंहईं पंचन काहीं बताय दिहेन हय।

¹⁶तूँ पंचे हमहीं नहीं चुने आह्या, बलकिन हम तोंहईं पंचन काहीं चुने हएन, अउर नियुक्त किहे हएन, जउने तूँ पंचे जाइके फर लइ आबा; अउर तोंहार फर बना रहय, कि तूँ पंचे जउन कुछू हमरे नाम से पिता परमातिमा से मागा, त ऊँ तोंहईं पंचन काहीं देंय।

¹⁷ईं बातन के हुकुम हम तोंहईं एसे देइत हएन, कि तूँ पंचे एक दुसरे से प्रेम करा।

¹⁸अगर संसार के मनई तोंहसे दुसमनी करत हें, त तूँ पंचे इआ जानिल्या, कि ऊँ पंचे पहिले हमहूँ से दुसमनी किहिन हीं।

¹⁹अगर तूँ पंचे संसार के मनइन कि नाईं होत्या, त संसार के मनई अपने कि नाईं मनइन से प्रेम करत हें, पय तूँ पंचे संसार के मनइन कि नाईं नहिं आह्या, काहेकि हम तोंहईं संसार के मनइन म से चुनि लिहेन हँय, एहिन से संसार के मनई तोंहसे दुसमनी करत हें।

²⁰जउन बात हम तोंहसे कहेन तय, त ओही सुधि कए रह्या: कि दास अपने मालिक से बड़ा नहीं होय, अगर ऊँ पंचे हमहीं सताइन हीं, त तोंहऊँ पंचन काहीं सतइहँय; अगर ऊँ पंचे हमार बात मानिन हीं, त तोंहरव बात मनि हँय।

²¹पय इआ सब कुछ ऊँ पंचे हमार चेला होंइ के कारन तोंहरे साथ करिहँय, काहेकि ऊँ पंचे हमहीं पठमँइ बाले काहीं नहीं जानँय।

²²अगर हम न अइत, अउर उनसे बातँय न करित, त ऊँ पंचे पापी न ठहरतें, पय अब अपने पाप के खातिर उनखे लघे कउनव बहाना नहिं आय।

²³जे हमसे दुसमनी रक्खत हय, उआ हमरे पिता परमातिमा से दुसमनी रक्खत हय।

²⁴अगर हम उनखे बीच माहीं ऊँ चमत्कार के काम न करित, जउन हमरे अलाबा कबहूँ कोऊ नहीं किहिस, त ऊँ पंचे पापी न ठहरतें, पय अब ऊँ पंचे हमरे चमत्कार के काम काहीं देख चुके हँय, अउर ऊँ पंचे हमसे अउर हमरे पिता परमातिमा, दोनव जनेन से दुसमनी करत हें।

²⁵अउर इआ एसे भ, कि उआ बचन पूर होय, जउन उनखे पबित्र सास्त्र माहीं लिखा हय, कि ‘ऊँ पंचे बेकार माहीं हमसे दुसमनी किहिन।’

²⁶पय जब उआ सहायक अई, जउने काहीं हम तोंहरे पंचन के लघे पठउब, अरथात सत्य के आत्मा जउन पिता परमातिमा के तरफ से आबत हय, उहय हमार गबाही देई।

²⁷अउर तुहूँ पंचे घलाय हमार गबाह हया, काहेकि तूँ पंचे हमरे सेबा के सुरुआतय से हमरे साथ रहे हया।”