Read Bagheli यूहन्ना 2 Bible Online

यूहन्ना 2 - Bagheli bible

यूहन्ना 2

¹एखे बाद तिसरे दिन गलील प्रदेस के काना गाँव माहीं कोहू के काज होत रहा हय, अउर यीसु के महतारी घलाय उहाँ नेउते माही रही हँय।

²यीसु अउर उनखे चेलन काहीं घलाय उआ बिआह माहीं नेउता दीन ग रहा हय।

³उहाँ जब अंगूर के रस चुकिगा, तब यीसु के महतारी यीसु से कहिन, कि उनखे लघे अंगूर के रस अब एक्कव नहिं आय।

⁴तब यीसु उनसे कहिन, “हे अम्मा,[1] अपना हमहीं इआ काहे बताइत हएन? हमरे काम करँइ के समय अबे नहीं आबा आय।”

⁵उनखर महतारी सेबा करँइ बालेन से कहिन, “यीसु जउन कुछू तोंहसे कहँय, उहय किहा।”

⁶यहूदी धरम के नेम के मुताबिक हाँथ-मुँह धोमँइ, अउर कुछ चीजन काहीं धोइके सुद्ध करँइ के खातिर, पानी भरँइ बाले पथरा के छयठे मटका धरे रहे हँय, जउनेन माहीं 80 से 120 लीटर तक पानी समात रहा हय।

⁷यीसु ऊँ सेबकन से कहिन, ईं मटकन माहीं पानी भर द्या: तब सगले सेबक ऊँ मटकन माहीं फुल्ल-फुल्ल पानी भर दिहिन।

⁸तब यीसु ऊँ सेबकन से कहिन, अब थोर काहीं निकारिके खाँय-पिअँइ के प्रबन्ध करँइ बाले मुखिया के लघे लइजा।

⁹तब ऊँ पंचे लइगें, जब खाँय-पिअँइ के प्रबन्ध करँइ बाले मुखिया उआ पानी काहीं पीन, जउन अंगूर के रस बनिगा रहा हय, अउर ऊँ नहीं जानत रहें, कि इआ अंगूर के रस कहाँ से आबा हय, (पय जउन सेबक पानी निकारिन रहा हय, ऊँ पंचे जानत रहे हँय) तब खाँय-पिअँइ के प्रबन्ध करँइ बाले मुखिया, दुलहा काहीं बोलाइके, उनसे कहिन।

¹⁰“हरेक मनई पहिले निकहा अंगूर के रस देत हय, अउर जब मनई पिके अघाय जात हें, तब उआ ओसे कम निकहा देत हय, पय तूँ अबय तक निकहा अंगूर के रस धरे हया।”

¹¹यीसु गलील प्रदेस के काना गाँव माहीं, इआ पहिल चमत्कार देखाइके, अपने महिमा काहीं देखाइन, इआ देखिके उनखर चेला लोग उनखे ऊपर बिसुआस किहिन।[2]

¹²एखे बाद यीसु, अपने महतारी, भाई अउर चेला लोगन के साथ कफरनहूम सहर माहीं गें, अउर उहाँ कुछ दिना रहें।

¹³यहूदी लोगन के फसह नाम के तेउहार लघेन रहा हय, एसे यीसु यरूसलेम सहर माहीं गें।

¹⁴अउर यीसु मन्दिर माहीं बरधा, गाड़र अउर परेबा के बेंचँइ बालेन काहीं, अउर रुपिआ-पइसा के लेन-देन करँइ बालेन काहीं बइठे पाइन।

¹⁵तब यीसु रस्सिन के चाबुक बनाइन, अउर सगले गड़रन अउर बरधन काहीं बहिरे भगाय दिहिन, अउर रुपिआ-पइसा के लेन-देन करँइ बालेन के पइसा बिथराय दिहिन, अउर उनखे पिढ़बन काहीं उलटाय दिहिन।

¹⁶अउर परेबा बिकनँय बालेन से कहिन, “इनहीं इहाँ से लइजा: हमरे पिता के घर काहीं बइपार के घर न बनाबा।”

¹⁷तब उनखे चेलन काहीं सुधि आई, कि पबित्र सास्त्र माहीं लिखा हय, कि “अपना के घर काहीं सुद्ध बनाए रहँइ के हमार लगन, एक दिन हमार जान लइ लेई।”

¹⁸इआ देखिके यहूदी धारमिक अँगुआ लोग यीसु से कहिन, तूँ जउन इआ काम करते हया, त हमहीं पंचन काहीं कउन अदभुत चिन्हारी देखउते हया?

¹⁹यीसु उनहीं जबाब दिहिन; कि “इआ मन्दिर काहीं गिराय द्या, अउर हम एही तीन दिना के माहीं बनाय देब।”

²⁰इआ सुनिके यहूदी धारमिक अँगुआ लोग कहिन, “इआ मन्दिर काहीं बनामँइ माहीं छियालिस बरिस लाग हें, अउर का तूँ, एही तीन दिना माहीं बनाय देइहा?”

²¹पय यीसु त अपने देंह के मन्दिर के बारे माहीं कहिन रहा हय।

²²एखे बाद जब यीसु मरे के बाद पुनि जिन्दा होइगें, तब उनखे चेलन काहीं सुधि आई, कि ऊँ इआ कहिन रहा हय, अउर ऊँ पंचे उनखे बारे माहीं पबित्र सास्त्र माहीं लिखे बचन, अउर उआ बचन के जउन यीसु कहिन तय, बिसुआस किहिन।

²³फसह के तेउहार के दिनन माहीं, जब यीसु यरूसलेम सहर माहीं रहे हँय, तब खुब मनई ऊँ अदभुत चिन्हारिन काहीं देखिके, जउन ऊँ देखाबत रहे हँय, उनखे ऊपर बिसुआस किहिन।

²⁴पय यीसु अपने-आप काहीं उनखे भरोसे माहीं नहीं छोंड़िन, काहेकि ऊँ सगले मनइन काहीं जानत रहे हँय।

²⁵यीसु काहीं इआ बात के जरूरत नहीं रही आय, कि कोऊ आइके मनई के बारे माहीं उनहीं बताबय, काहेकि ऊँ खुदय जानत रहे हँय, कि मनइन के मन माहीं का हय?