Read Bagheli खास चेलन 9 Bible Online

खास चेलन 9 - Bagheli bible

खास चेलन 9

¹साऊल जउन अबे तक प्रभू के चेलन काहीं धमकी देंइ, अउर कतल करँइ के धुन माहीं रहे हँय, महायाजक के लघे गें।

²अउर उनसे दमिस्क सहर के सभाघरन के नाम से इआ उद्देस्य से चिट्ठी माँगिन, कि चाह मंसेरुआ होंय, चाह मेहेरिआ, जिनहीं ऊँ यीसु मसीह के ऊपर बिसुआस करत पामँय, उन सगलेन काहीं बाँधिके यरूसलेम सहर माहीं लइ आमँय।

³पय जब ऊँ चलत-चलत दमिस्क सहर के लघे पहुँचे, तब अचानक अकास से उनखे चारिव कइती जोति चमकी।

⁴अउर ऊँ भुँइ माहीं गिर परें, अउर इआ बोल सुनिन, कि “हे साऊल, हे साऊल, तूँ हमहीं काहे सतउते हया?”

⁵ऊँ पूँछिन; “हे प्रभू, अपना को आहेन?” तब ऊँ कहिन; “हम यीसु आहेन; जेही तूँ सतउते हया।

⁶पय अब उठिके सहर माहीं जा, अउर जउन कुछू करँइ काहीं हय, उआ तोंहसे बताबा जई।”

⁷जउन मनई उनखे साथ माहीं रहे हँय, ऊँ चुप्पय रहिगें; काहेकि ऊँ पंचे बोल त सुनत रहे हँय, पय कोऊ उनहीं देखात नहीं रहा आय।

⁸तब साऊल भुँइ से उठें, पय जब आँखी खोलिन त उनहीं कुछू देखात नहीं रहा आय, अउर उनखर साथी उनखर हाँथ पकड़िके दमिस्क सहर माहीं लइगें।

⁹अउर ऊँ तीन दिना तक नहीं देख सकें, अउर न कुछू खाबय पिअब भें।

¹⁰दमिस्क सहर माहीं हनन्याह नाम के एकठे चेला रहे हँय, उनसे प्रभू दरसन माहीं कहिन, “हे हनन्याह!” ऊँ कहिन; “हाँ प्रभू।”

¹¹तब प्रभू उनसे कहिन, “उठिके उआ गली माहीं जा, जउन सीध गली कहाबत ही, अउर यहूदा के घर माहीं तरसुस सहर के रहँइ बाले साऊल नाम के एकठे मनई काहीं पूँछ लिहा; काहेकि देखा, ऊँ प्राथना कइ रहे हँय।”

¹²अउर ऊँ दरसन माहीं देखिन हीं, कि हनन्याह नाम के एकठे मनई घर माहीं आइके उनखे ऊपर हाँथ धरिन, जउने ऊँ पुनि देख सकँय।

¹³तब हनन्याह उनहीं जबाब दिहिन, कि “हे प्रभू, हम इआ मनई के बारे माहीं खुब जनेन से सुने हएन, कि ईं यरूसलेम सहर माहीं अपना के पबित्र मनइन के साथ बड़ी-बड़ी बुराई किहिन हीं।

¹⁴अउर इहाँ घलाय इनहीं प्रधान याजकन के तरफ से अधिकार मिला हय, कि जे-जे अपना के नाम लेत हें, उन सगलेन काहीं बन्दी बनाय लेंय।”

¹⁵पय प्रभू उनसे कहिन, कि “तूँ चले जा; काहेकि हम साऊल काहीं चुनि लिहेन हँय, कि ऊँ गैरयहूदी लोगन के आँगे अउर राजन के आँगे, अउर इजराइलिअन के आँगे हमरे नाम के प्रचार करँय।

¹⁶अउर हम उनहीं बताउब, कि हमरे नाम के खातिर उनहीं कइसा-कइसा दुख उठामँइ परी।”

¹⁷तब हनन्याह उठिके उआ घर माहीं गें, अउर उनखे ऊपर आपन हाँथ धइके कहिन, “हे भाई साऊल, प्रभू यीसु जउन उआ गइल माहीं जउने से तूँ आए हया, तोंहईं देखाई दिहिन रहा हय, उँइन हमहीं पठइन हीं, कि तूँ पुनि देखँइ लागा, अउर पबित्र आत्मा से भर जा।”

¹⁸अउर हरबिन उनखे आँखी से छिलका कि नाईं कुछू गिरा, अउर ऊँ देखँइ लागें, अउर उठिके बपतिस्मा लिहिन; ओखे बाद खाना खाइन तब उनखे देंह माहीं बल आबा।

¹⁹ऊँ कइअक दिना तक उन चेलन के साथय रहिगें, जउन दमिस्क सहर माहीं रहे हँय।

²⁰अउर ऊँ हरबिन यहूदी सभाघरन माहीं जाइके प्रचार करँइ लागें, कि “यीसु परमातिमा के लड़िका आहीं।”

²¹अउर सगले सुनँय बाले चउआइके कहँइ लागें; का ईं उहय मनई न होंहीं, जउन यरूसलेम सहर माहीं यीसु के नाम लेत रहे हँय, उनहीं नास करत रहे हँय, अउर इहाँ घलाय एहिन से आएँ तय, कि उनहीं जउन यीसु के नाम लेत हें बाँधिके महायाजकन के आँगे लइ जाँय?

²²पय साऊल अउर सामरथी होत गें, अउर इआ बात के सबूत दइ-दइके कि यीसुअय मसीह आहीं, दमिस्क सहर के यहूदी लोगन के मुँह बन्द कइ देत रहे हँय।

²³खुब दिन बीत जाँइ के बाद, यहूदी लोग उनहीं मारि डारँय के योजना बनाइन।

²⁴पय उनखर योजना साऊल काहीं मालुम होइगे, कि “ऊँ हमहीं मारि डारँइ के खातिर रात-दिना फाटकन के लघे पहरा देत रहत हें।”

²⁵पय रात माहीं उनखर चेला लोग उनहीं टोपरा माहीं बइठाइके, सहर के चारिव कइती जउन भीती रही हय, ओसे झुलाइके नीचे उतार दिहिन।

²⁶अउर ऊँ यरूसलेम सहर माहीं पहुँचिके चेलन के साथ मिल जाँइ के कोसिस किहिन, पय सगले जने उनसे डेरात रहे हँय, काहेकि उनहीं इआ बिसुआस नहीं होत रहा आय, कि इऊँ चेला आहीं।

²⁷पय बरनबास उनहीं अपने साथ यीसु के खास चेलन के लघे लइ जाइके, उनसे बताइन, कि “ईं कउनमेर से गइल माहीं प्रभू काहीं देखिन, अउर प्रभू इनसे बात किहिन; अउर फेर ईं दमिस्क सहर माहीं, कउनमेर से बड़े साहस के साथ यीसु के नाम के प्रचार किहिन।”

²⁸तब से साऊल उनखे साथ यरूसलेम सहर माहीं आमँइ-जाँइ लागें।

²⁹अउर निधड़क होइके प्रभू के नाम के प्रचार करत रहे हँय; अउर यूनानी भाँसा बोलँइ बाले यहूदी लोगन के साथ, बातचीत अउर बाद-बिबाद करत रहे हँय; पय ऊँ पंचे उनहीं मार डारँइ के कोसिस करँइ लागें।

³⁰इआ जानिके बिसुआसी भाई उनहीं कैसरिया सहर माहीं लइ आएँ, अउर उहाँ से उनहीं तरसुस सहर माहीं पठय दिहिन।

³¹इआमेर से सगले यहूदिया प्रदेस, अउर गलील प्रदेस, अउर सामरिया प्रदेस माहीं, मसीही मन्डलिन के सगले मनइन काहीं सान्ति मिली, अउर उनखर उन्नति होत चली गय; अउर मसीही मन्डली प्रभू के भय, अउर पबित्र आत्मा के सान्ति माहीं, चलत अउर बढ़त जात रही हँय।

³²अउर अइसन भ, कि पतरस हरेक जघन माहीं घूमत, उन पबित्र मनइन के लघे घलाय पहुँचे, जउन लुद्दा सहर माहीं रहत रहे हँय।

³³उहाँ उनहीं एनियास नाम के लोकबा के मारा एकठे मनई मिला, जउन आठ बरिस से खटिया माहीं परा रहा हय।

³⁴तब पतरस उनसे कहिन, “हे एनियास! यीसु मसीह तोंहईं नीक करत हें; उठा, आपन बिछउना उठाबा”; तब उआ तुरन्तय उठिके ठाढ़ होइगा।

³⁵अउर लुद्दा सहर अउर सारोन प्रदेस के सगले रहँइ बाले उनखे इआ काम काहीं देखिके, प्रभू के ऊपर बिसुआस किहिन।

³⁶अउर याफा सहर माहीं एकठे तबीता नाम के बिसुआसिन रहत रही हय, जउन दोरकास नाम से घलाय जानी जात रही हय, उआ खुब निकहे-निकहे काम करत रही हय, अउर गरीबन काहीं दान देत रही हय।

³⁷उँइन दिनन माहीं उआ बिमार होइके मरिगे; अउर ऊँ पंचे ओही नहबाइके अँटरिया माहीं धरबाय दिहिन।

³⁸अउर एसे कि लुद्दा सहर, याफा सहर के लघेन रहा हय, चेला लोग इआ सुनिके, कि पतरस उहाँ हें, त दुइठे मनइन काहीं पठइन, कि उनसे बिनती करँय, कि ऊँ हमरे पंचन के लघे खुब जल्दी आय जाँय।

³⁹तब पतरस ठाढ़ होइके उनखे साथ चल दिहिन, अउर जब ऊँ उहाँ पहुँचे, तब ऊँ पंचे उनहीं अँटरिया माहीं लइगें; सगली बिधबा मेहेरिआ रोबत उनखे लघे आइके ठाढ़ होइ गईं, अउर जउन कुरथा अउर ओन्हा, दोरकास उनखे साथ माहीं रहत समय बनाइन तय, उनहीं देखामँइ लागीं।

⁴⁰तब पतरस सगलेन काहीं अँटरिया से बहिरे निकार दिहिन, अउर घुटुआ के बल बइठिके प्राथना किहिन; अउर लहास कइती निहारिके कहिन; “हे तबीता उठ”: तब ऊँ आपन आँखी खोल दिहिन; अउर पतरस काहीं देखिके उठ बइठीं।

⁴¹तब पतरस आपन हाँथ पकड़ाइके उनहीं उठाइन, अउर पबित्र लोगन अउर बिधबन काहीं बोलाइके जिअत देखाय दिहिन।

⁴²इआ बात सगले याफा सहर माहीं फइलिगे, अउर उहाँ के खुब मनई प्रभू के ऊपर बिसुआस किहिन।

⁴³अउर पतरस याफा सहर माहीं, समौन नाम के कउनव चमड़ा के धन्धा करँइ बाले के इहाँ, खुब दिनन तक रहिगें।