Read Bagheli इब्रानियन 11 Bible Online

इब्रानियन 11 - Bagheli bible

इब्रानियन 11

¹बिसुआस के मतलब हय, जउने चीजन के हम पंचे आसा करित हएन, ऊँ जरूर हईं, अउर जउने चीजन काहीं हम पंचे नहीं देखे आहेन, ऊँ हईं, बिसुआस उनखर पक्का सबूत देत हय।

²काहेकि इहय बिसुआस के बारे माहीं, परमातिमा, बाप-दादन के बारे माहीं निकही गबाही दिहिन हीं।

³हम पंचे परमातिमा के ऊपर बिसुआस करित हएन, एहिन से इआ बात काहीं जाने पाएन हय, कि परमातिमा अपने बचन के द्वारा संसार काहीं बनाइन हीं। पय जउन कुछू हम पंचे देखित हएन, उनहीं परमातिमा देखाँइ बाली चीजन से नहीं बनाइन आय।

⁴हाबिल काहीं परमातिमा के ऊपर पूर बिसुआस रहा हय, एहिन से ऊँ परमातिमा के खातिर अपने भाई कैन से उत्तम बलिदान चढ़ाइन। अउर बिसुआसय के कारन उनखे बारे माहीं, परमातिमा के नजर माही निरदोस होंइ के गबाही दीनगे ही। काहेकि परमातिमा घलाय उनखे भेंट के बारे माहीं गबाही दिहिन हीं, अउर मरे के बादव, हाबिल उहय बिसुआस के द्वारा हमसे पंचन से अबय तक बातँय करत हें।

⁵अउर हनोक काहीं परमातिमा के ऊपर पूर बिसुआस रहा हय, एहिन से ऊँ धरती से जिन्दय उठाय लीन गें तय, जउने ऊँ न मरँय, अउर ओखे बाद ऊँ पुनि धरती माहीं देखाई नहीं दिहिन। काहेकि परमातिमा उनहीं स्वरग माहीं उठाय लिहिन रहा हय, अउर जब तक ऊँ उठाए नहीं गे रहे आहीं, त उनखे बारे माहीं इआ गबाही दीनगे रही हय, कि ऊँ परमातिमा काहीं खुसी किहिन हीं।

⁶अउर बिसुआस के बिना परमातिमा काहीं खुसी करब असम्भव हय, काहेकि परमातिमा के लघे आमँइ बाले काहीं, इआ बिसुआस होंइ चाही, कि बास्तव माहीं परमातिमा हें; अउर अपने खोजँइ बालेन काहीं ओखर प्रतिफल जरूर देत हें।

⁷अउर नूह काहीं परमातिमा के ऊपर पूर बिसुआस रहा हय, एहिन से ऊँ उन बातन के बारे माहीं बिसुआस किहिन, जउन उआ समय देखाई नहीं देत रही आहीं, अउर परमातिमा से चेतउनी पाइके, भक्ती के साथ अपने परिबार काहीं बचामँइ के खातिर जिहाज बनाइन, अउर उआ बिसुआस के द्वारा संसार के मनइन काहीं दोसी ठहराइन, अउर उआ धारमिकता के बारिसदार बनिगें, जउन बिसुआस से मिलत ही।

⁸अउर अब्राहम काहीं परमातिमा के ऊपर पूर बिसुआस रहा हय, एहिन से जब परमातिमा उनहीं कहिन, कि इआ देस से निकरिके चले जा, जहाँ हम तोंहईं बताउब, त ऊँ परमातिमा के हुकुम काहीं मानिके, उआ जघा काहीं चल दिहिन, जउने काहीं ऊँ बारिसदारी माहीं पामँइ बाले रहे हँय, पय इआ नहीं जानत रहे आहीं, कि कउने कइती जाँइ क हय। तऊ अपने देस से निकरिके चलेगें।

⁹अउर उनहीं परमातिमा के ऊपर पूर बिसुआस रहा हय, एहिन से परमातिमा द्वारा देंइ बाले वादा के देस माहीं, परदेसी कि नाईं रहिके, अपने लड़िका-नाती अरथात इसहाक अउर याकूब के साथ, जउन उनखे साथ वादा के बारिसदार रहे हँय, तम्बू बनाइके उहाँ निबास किहिन।

¹⁰काहेकि अब्राहम उआ स्थाई नेव बाले सहर के इन्तजार करत रहे हँय, जउने के रचना करँइ बाले अउर बनामँइ बाले परमातिमा आहीं।

¹¹अउर सारा काहीं परमातिमा के ऊपर पूर बिसुआस रहा हय, एहिन से ऊँ भले बाँझ रही हँय, तऊ लड़कहाई होंइ के सक्ती पाइन; काहेकि परमातिमा उनसे जउन वादा किहिन तय, कि उनखे जरूर लड़िका होई, इआ बात काहीं ऊँ सही मानिके पूर बिसुआस किहिन तय।

¹²अउर बिसुआस के कारन एक जने से अरथात अब्राहम से जउन बेलकुल बुढ़ाइगें तय, तऊ उनसे अकास के तरइअन अउर समुंद्र के किनारे के, बारू कि नाईं अनगिनत बंस पइदा भें।

¹³ऊँ पंचे वादा के चीजन काहीं भले नहीं पाइन, तऊ बिसुआस माहीं बने रहिगें, अउर मरँय से पहिले वादा के चीजन काहीं दूरिन से देखिके खुब खुसी भें, अउर इआ मान लिहिन तय, कि हम पंचे इआ धरती माहीं परदेसी अउर बाहिरी मनइन कि नाईं हएन, अउर ओखे बाद परमातिमा के ऊपर बिसुआस करत ऊँ पंचे मरिगें।

¹⁴अउर जे कोऊ इआमेर बातँय करत हें, ऊँ पंचे इआ बतामँइ चाहत हें, कि हम पंचे अपने देस के खोज माहीं लगे हएन।

¹⁵अउर अगर ऊँ पंचे अपने देस के सुधि करतें, जहाँ से ऊँ पंचे निकरिके आए रहे हँय, त उनहीं उहाँ लउटि जाँइ के मोका रहत, पय ऊँ पंचे ओखर सुधय नहीं किहिन।

¹⁶बलकिन ऊँ पंचे एकठे उत्तम देस, अरथात स्वरग के देस काहीं पामँइ चाहत रहे हँय, एहिन से परमातिमा, उनखर परमातिमा कहामँइ माहीं नहीं लजाँय। काहेकि परमातिमा उनखे खातिर स्वरग माहीं एकठे सहर तइआर किहिन हीं।

¹⁷अउर अब्राहम काहीं परमातिमा के ऊपर पूर बिसुआस रहा हय, एहिन से अपने परिच्छा होंइ के समय इसहाक काहीं बलिदान के रूप माहीं चढ़ाइन, अउर ऊँ परमातिमा के वादा काहीं सही मानिन तय,

¹⁸जउन उनसे इआ कहिन तय, कि “इसहाक से तोंहार बंस चली।” अउर अब्राहम अपने एकलउता लड़िका काहीं बली के रूप माहीं चढ़ामँइ लागें तय।

¹⁹काहेकि अब्राहम इआ मान लिहिन तय, कि परमातिमा सामरथी हें, जउन इसहाक काहीं मरे के बादव जिन्दा कइ देइहँय, एहिन से उदाहरन के रूप माहीं इसहाक उनहीं पुनि जिन्दा मिलिगें।

²⁰अउर इसहाक काहीं परमातिमा के ऊपर पूर बिसुआस रहा हय, एहिन से ऊँ अपने दोनव लड़िकन काहीं, अरथात याकूब अउर एसाव काहीं, भबिस्य माहीं आमँइ बाली बातन के बारे माहीं आसिरबाद दिहिन।

²¹अउर याकूब काहीं परमातिमा के ऊपर पूर बिसुआस रहा हय, एहिन से ऊँ मरत समय अपने दोनव नतिअन काहीं, अरथात यूसुफ के दोनव लड़िकन काहीं आसिरबाद दिहिन, अउर लाठी के सहारे उठिके परमातिमा के अराधना किहिन।

²²अउर यूसुफ काहीं परमातिमा के ऊपर पूर बिसुआस रहा हय, एहिन से ऊँ मरत समय, इजराइल के सन्तान काहीं, मिस्र देस से निकर जाँइ के बारे माहीं चरचा किहिन, अउर इहव हुकुम दिहिन तय, कि जब तूँ पंचे जया, त हमरे हड्डिन काहीं इहाँ से लए जया।

²³अउर मूसा के महतारी-बाप काहीं, परमातिमा के ऊपर पूर बिसुआस रहा हय, एहिन से, जब मूसा पइदा भें, त ऊँ पंचे देखिन, कि लड़िका खुब सुन्दर हय; त ओही तीन महीना तक मिस्र के राजा से लुकाए रहिगें, अउर राजा के हुकुम से नहीं डेरानें।

²⁴अउर मूसा काहीं, परमातिमा के ऊपर पूर बिसुआस रहा हय, एहिन से जब ऊँ बड़े भें, त मिस्र के राजा फिरौन के बिटिया के लड़िका कहामँइ से इनकार कइ दिहिन।

²⁵एसे कि ऊँ पाप माहीं थोरे दिन सुख भोगँइ से, परमातिमा के चुने लोगन के साथ दुख भोगब जादा नीक समझिन।

²⁶अउर मूसा मसीह के खातिर अपमान सहब मिस्र देस के भन्डार से जादा कीमती धन समझिन, काहेकि उनखर नजर परमातिमा से प्रतिफल पामँइ माहीं लगी रही हय।

²⁷अउर मूसा काहीं परमातिमा के ऊपर पूर बिसुआस रहा हय, एहिन से ऊँ मिस्र के राजा के क्रोध से नहीं डेरानें, अउर मिस्र देस काहीं छोंड़िके चलेगें, अउर अइसन जान परत रहा हय, कि ऊँ न देखाँइ बाले परमातिमा काहीं देखत हें, अउर बिसुआस माहीं अटल रहिगें।

²⁸अउर मूसा काहीं परमातिमा के ऊपर पूर बिसुआस रहा हय, एहिन से ऊँ फसह के तेउहार अउर खून छिड़िकँय के बिधी काहीं मानिन, कि जउने परमातिमा के दूत मिस्री लोगन के पहिलउठन काहीं नास करत समय, इजराइली लोगन के पहिलउठन काहीं न मारय।

²⁹अउर परमातिमा के ऊपर बिसुआसय के कारन इजराइली लोग, लाल समुंद्र के बीच से निकरिके, उआ पार अइसन चलेगें, जइसन ऊँ झुरान भुँइ से गे होंय। अउर जब मिस्री लोग उहयमेर समुंद्र के बीच से जाँइ लागें, त ऊँ सगले बूड़िके मरिगें।

³⁰अउर परमातिमा के ऊपर बिसुआसय के कारन इजराइली लोग, यरीहो सहर के सुरच्छा करँइ बाली भीती के चारिव कइती, सात दिना तक जब चक्कर लगाय चुकें, तब उआ भीती अपनेन से गिरिगय।

³¹अउर राहाब बेस्या काहीं, परमातिमा के ऊपर पूर बिसुआस रहा हय, एहिन से उआ परमातिमा के हुकुम न मानँइ बाले मनइन के साथ नास नहीं भे; काहेकि उआ भेद लेंइ बाले दूतन काहीं बचाइस रहा हय।

³²अउर जादा हम अब तोंहसे पंचन से का कही? काहेकि एसे जादा बतामँइ के समय अबय नहिं आय, कि गिदोन के बारे माहीं, बाराक के बारे माहीं, अउर सिमसोन के बारे माहीं, अउर यिफतह के बारे माहीं, राजा दाऊद के बारे माहीं, अउर समूएल के बारे माहीं, अउर परमातिमा के दुसरेव सँदेस बतामँइ बालेन के बारे माहीं, हम तोंहईं पंचन काहीं अउर बिस्तार से बताई।

³³ईं पंचे परमातिमा के ऊपर किहे बिसुआसय के कारन, कइयकठे राज जीतिन; धरम के काम किहिन; वादा कीन चीजन काहीं पाइन, सेरन के मुँह बन्द किहिन,

³⁴आगी के लपट काहीं ठंड किहिन; तलबार के धार से बचिके निकरिगें, निबलता माहीं सक्ती पाइन; लड़ाई माहीं बहादुर निकरें; अउर बिदेसी सेनन काहीं मारिके भगाइन।

³⁵अउर कुछ मेहेरिआ अपने मरे लड़िकन काहीं जिन्दा पाइन; अउर कुछ जने त मार खातय खात मरिगें; अउर ओसे छुटकारा नहीं पामँइ चाहिन; कि जउने ऊँ पंचे मरेन म से जि उठँय माहीं सामिल होइ जाँय।

³⁶अउर कइअक जने हँसी उड़ाए जाँइ के द्वारा; अउर चाबुक खाँय के द्वारा; बाँधे जाँइ के द्वारा, अउर जेल जाँइ के द्वारा जाँचे-परखे गें।

³⁷अउर कुछ जनेन के ऊपर पथरहाव कीन ग; अउर कुछ जने आरा से चीरे गें, अउर कुछ जने तलबार से मारे गे; अउर कुछ जने गरीबी, अउर अत्याचार माहीं दुख भोगत, गाड़र अउर बोकरिन के खलरी काहीं ओढ़े, एँकई-ओंकई मारे-मारे फिरें।

³⁸अउर जंगलन माहीं, अउर पहारन माहीं, अउर गुफन माहीं, अउर धरती माहीं बने गड्ढन माहीं भटकत रहिगें। काहेकि संसार उनखे काबिल नहीं रहा आय।

³⁹अउर बिसुआसय के कारन ईं सगलेन के बारे माहीं निकही गबाही दीनगे ही, तऊ इनहीं पंचन काहीं वादा के चीजँय नहीं मिलीं।

⁴⁰काहेकि परमातिमा हमरे पंचन के खातिर, पहिलेन से एकठे उत्तम बात निस्चित किहिन तय, कि जउने ऊँ पंचे, हमरे पंचन के बिना परिपूर्नता काहीं न पामँय।