Read Bagheli इब्रानियन 6 Bible Online

इब्रानियन 6 - Bagheli bible

इब्रानियन 6

¹एसे आबा हम पंचे मसीह के सिच्छा के सुरुआत के बातन से आँगे बढ़िके, परिपूर्न बनँइ के खातिर आँगे बढ़त चली, अउर अपने बुरे कामन से मन फिरामँइ, अउर परमातिमा के ऊपर बिसुआस करँय,

²अउर बपतिस्मन, अउर हाँथ धरइँ, अउर मरे के बाद पुनि जिन्दा होंइ, अउर अन्तिम न्याय के सिच्छा रूपी नेव पुनि न डारी।

³अउर अगर परमातिमा के मरजी होई, त हम पंचे बिसुआस माहीं परिपूर्न बनँइ के खातिर आँगे बढ़त जाब।

⁴काहेकि जेतने जन एक बेरकी जोति पाय चुके हँय, अउर स्वरग के बरदान के अनुभव कइ चुके हँय, अउर पबित्र आत्मा पाय चुके हँय,

⁵अउर परमातिमा के उत्तम बचन के, अउर आमँइ बाले जुग के सक्ती के अनुभव कइ चुके हँय,

⁶अगर ऊँ पंचे बिसुआस से भटक जाँय; त उनखे मनन काहीं बदलिके पुनि बिसुआस माहीं लइ आउब असम्भव हय; काहेकि ऊँ पंचे परमातिमा के लड़िका काहीं, अपने खातिर पुनि क्रूस के ऊपर चढ़ाबत हें, अउर खुले आम उनखे ऊपर कलंक लगाबत हें।

⁷काहेकि जउन धरती बरसा के पानी से बेर-बेर सिंचरिके, अपने जोतँय बोमँइ बालेन के खातिर निकही फसल देत ही, उआ परमातिमा से आसीस पाबत ही।

⁸पय अगर उआ धरती बरसा के पानी से बेर-बेर सिंचरे के बादव, जरबा अउर उटकटार जमाबत ही, त उआ निकम्मी अउर स्रापित होंइ बाली हय, अउर उआ अन्त माहीं जराय दीन जई।

⁹पय हे पियार साथिव, हम पंचे इआमेर कहित त जरूर हएन, तऊ तोंहरे बारे माहीं हम पंचे इनसे निकही, अउर मुक्ती देंइ बाली बातन माहीं भरोसा करित हएन।

¹⁰काहेकि परमातिमा अन्यायी नहीं आहीं, कि तोंहरे काम, अउर उआ प्रेम काहीं बिसरि जाँय, जउन तूँ पंचे उनखे नाम के खातिर पबित्र मनइन के सेबा किहा हय, अउर अबे तक कइव रहे हया।

¹¹अउर हम पंचे खुब चाहित हएन, कि तोंहरे म से हरेक जन अपने जीबन भर इहइमेर कठिन मेहनत करत रहय। अउर अगर तूँ पंचे अइसय करत रइहा, त ओही जरूर पाय जइहा, जेखर तूँ पंचे आसा करते हया।

¹²अउर हम पंचे इआ नहीं चाही, कि तूँ पंचे आलसी बना, बलकिन तूँ पंचे उनखे कि नाईं जीबन बिताबा, जउन बिसुआस अउर धीरज के द्वारा परमातिमा के वादन के बारिसदार बन जात हें।

¹³जब परमातिमा अब्राहम से वादा किहिन तय, तब कसम खाँय के खातिर, उनहीं अपने से बड़ा कोऊ नहीं मिला, एसे ऊँ अपनय कसम खाइके कहिन,

¹⁴कि “हम तोंहईं निस्चित रूप से खुब आसीस देब, अउर तोंहरे सन्तान काहीं घलाय बढ़ाबत जाब।”

¹⁵अउर इआमेर से अब्राहम धीरज धइके, परमातिमा के द्वारा कीन वादा के बात काहीं पाइन।

¹⁶अउर मनई जब कउनव कसम खात हें, त अपने से बड़े के कसम खात हें। अउर अपने हरेक बिबादन के फँइसला काहीं, कसम के द्वारा पक्का करत हें।

¹⁷एसे परमातिमा, अपने वादा के बारे माहीं, ऊँ मनइन काहीं साफ-साफ बतामँइ चाहत रहे हँय, जउन उनखे वादा के बारिसदार रहे हँय। अउर ऊँ अपने इआ बात काहीं बतामँइ के खातिर, कि उनखर वादा कबहूँ नहीं बदल सकय, अपने अउर उनखे बीच माहीं कसम काहीं लइ आएँ।

¹⁸अउर परमातिमा के कबहूँ न बदलँइ बाली ऊँ दुइठे बातँय, अरथात “कसम” अउर “वादा” के द्वारा हमहीं पंचन काहीं इआ पता चलत हय, कि “परमातिमा कबहूँ झूँठ साबित होइन नहीं सकँय।” एसे हमार पंचन के साहस अउर मजबूत होइ जात हय, अउर हम पंचे जउन उनखे सरन माहीं दउड़े चले आएन हँय, कि उआ आसा काहीं पाई, जउन आँगे धरी हय।

¹⁹अउर जइसन लंगर पानी माहीं जिहाज काहीं स्थिर रक्खत हय, उहयमेर आसा घलाय हमरे पंचन के प्रान काहीं स्थिर रक्खत ही, अउर उहय हमहीं पंचन काहीं परदा के भीतर तक अरथात परमातिमा के लघे तक पहुँचाबत ही।

²⁰जहाँ यीसु मलिकिसिदक के रीति पर, हमेसा के खातिर महायाजक बनिके, हमरे पंचन के खातिर अँगुआ के रूप माहीं पहुँच चुके हँय।