Read Bagheli इब्रानियन 7 Bible Online

इब्रानियन 7 - Bagheli bible

इब्रानियन 7

¹ईं मलिकिसिदक सालेम सहर के राजा, अउर परमप्रधान परमातिमा के याजक आहीं, जउन हमेसा याजक बने रइहँय; जब अब्राहम राजन काहीं हराइके लउटत रहे हँय, तब ईंन उनसे गइल माहीं मिलें तय, अउर अब्राहम काहीं आसिरबाद दिहिन तय।

²इनहिन काहीं अब्राहम अपने सगली चीजन के दसमा भाग घलाय दिहिन तय, अउर इनखे मलिकिसिदक नाम के मतलब हय “धरम के राजा”। अउर सालेम के मतलब हय “सान्ती के राजा।”

³अउर इनखे महतारी-बाप के बारे माहीं पबित्र सास्त्र माहीं कउनव लेख नहीं मिलय, अउर न इनखर कउनव बंसाबली आय, अउर न इनखे जनम अउर मउत के बारे माहीं कउनव पता चलय; बलकिन ईं परमातिमा के लड़िका कि नाईं ठहरिके, हमेसा के खातिर याजक बने रइहँय।

⁴अउर अब तूँ पंचे इआ बात माहीं ध्यान द्या, कि ऊँ केतना महान रहे हँय, जिनहीं सगले कुलन के मुखिया अब्राहम, अपने लूट के निकही से निकही चीजन के दसमा भाग दिहिन तय।

⁵अउर मूसा के बिधान के मुताबिक लेबी के बंस के मनइन काहीं याजक के पद मिलत रहा हय, अउर उनहीं इआ हुकुम दीनगे रही हय, कि ऊँ अपने इजराइली भाइन से दसमा भाग लेंय, चाह ऊँ अब्राहम के बंस माहीं काहे न पइदा भे होंय।

⁶पय मलिकिसिदक जउन लेबी के बंसाबली के न होंहीं, तऊ अब्राहम से दसमा भाग लिहिन तय, जिनहीं परमातिमा घलाय आसिरबाद देंइ के वादा किहिन तय, उनहीं आसिरबाद दिहिन,

⁷अउर इआ बात माहीं कउनव सन्देह नहिं आय। काहेकि छोट हमेसा बड़े से आसिरबाद पाबत हय।

⁸अउर इहाँ लेबी बंस के जउन मनई दसमा भाग लेत हें, ऊँ त मर जइहँय, पय मलिकिसिदक के बारे माहीं, जउन हम पंचे बताइत हएन, ऊँ हमेसा जिन्दा रइहँय।

⁹त पुनि हम पंचे इहव कहि सकित हएन, कि लेबी घलाय जउन दसमा भाग लेत हें, अब्राहम के द्वारा मलिकिसिदक काहीं दसमा भाग दिहिन हीं।

¹⁰काहेकि जउने समय मलिकिसिदक उनखे कुल पिता अब्राहम से मिलें तय, उआ समय लेबी अब्राहम के देंह माहीं रहे हँय, पय पइदा नहीं भे रहे आहीं।

¹¹अउर अगर लेबी के बंस के बनँइ बाले याजकन के द्वारा परिपूर्नता मिल जात, (काहेकि इनहिन के व्दारा मनइन काहीं मूसा के बिधान मिला रहा हय।) त फेर एखर कउनव जरूरत न परत, कि कउनव दूसर याजक हारून कि रीति पर नहीं, बलकिन मलिकिसिदक कि रीति पर याजक बनय।

¹²काहेकि जब याजक के पद बदला जात हय, त बिधान काहीं घलाय बदला जाब जरूरी हय।

¹³काहेकि जउने याजक के बारे माहीं ईं बातँय कीन जाय रही हँय, ऊँ लेबी के बंस के न होंहीं, बलकिन दुसरे कुल के आहीं, जउने माहीं आज तक कोऊ याजक बनिके बेदी माहीं बलिदान नहीं चढ़ाइन।

¹⁴एसे इआ बात त साफ ही, कि हमार पंचन के प्रभू यीसु यहूदा के कुल माहीं पइदा भें हँय, अउर यहूदा के कुल के बारे माहीं याजक बनँइ के खातिर, मूसा नबी कउनव चरचा नहीं किहिन।

¹⁵अउर जउन कुछू हम पंचे कहेन हय, उआ अउर साफ होइ जात हय, जब मलिकिसिदक कि नाईं एकठे अउर याजक बन जात हें।

¹⁶जउन अपने बंसाबली के नेम मुताबिक नहीं, बलकिन अबिनासी जीबन के सक्ती के मुताबिक याजक बने हँय।

¹⁷अउर पबित्र सास्त्र माहीं इनखे बारे माहीं इआ गबाही दीनगे ही, कि “तूँ मलिकिसिदक कि रीति पर हमेसा के खातिर याजक बने रइहा।”

¹⁸इआमेर से पहिल हुकुम कमजोर; अउर बेकार होंइ के कारन खतम होइगे। (काहेकि मूसा के बिधान कउनव मनई काहीं परिपूर्न नहीं बनाइस।)

¹⁹अउर ओखे जघा माहीं एकठे अइसन उत्तम आसा दीनगे ही, जेखे द्वारा हम पंचे परमातिमा के लघे पहुँच सकित हएन।

²⁰अउर इआ बात घलाय खास ही, कि परमातिमा, यीसु काहीं कसम के द्वारा याजक बनाइन रहा हय।

²¹जबकि दुसरेन काहीं बिना कसम के याजक बनाबा ग रहा हय। पय यीसु काहीं कसम के द्वारा परमातिमा के तरफ से याजक बनाबा ग हय, अउर यीसु के बारे माहीं पबित्र सास्त्र माहीं घलाय इआ लिखा हय, कि “प्रभू कसम के द्वारा यीसु काहीं हमेसा के खातिर याजक बनाइन हीं, अउर इआ बात से ऊँ कबहूँ न पचितइहँय।”

²²काहेकि इआ कसम के कारन यीसु एकठे उत्तम करार के जमानतदार बनिगें।

²³पुरान समय से खुब याजक बनत चले आए हँय, पय ऊँ पंचे अपने पद माहीं स्थिर नहीं रहे पाइन, काहेकि ऊँ पंचे मर जात रहे हँय।

²⁴पय यीसु हमेसा जिन्दा रइहँय; इआ कारन से उनखर याजक पद हमेसा बना रही।

²⁵एसे जेतने जन यीसु के द्वारा परमातिमा के लघे आबत हें, यीसु उनहीं पूर-पूर मुक्ती दइ सकत हें, काहेकि ऊँ बिचबई बनिके उनखे खातिर बिनती करँइ के खातिर हमेसा जिन्दा हें।

²⁶अउर हमहीं पंचन काहीं इहइमेर के महायाजक के जरूरत रही हय, जउन पबित्र, निस्कपट, सुद्ध, अउर बिना पाप के, अउर स्वरग से घलाय ऊँच कीन गे होंय।

²⁷अउर पहिले के महायाजकन कि नाईं, उनहीं एखर जरूरत नहीं रही, कि ऊँ रोज पहिले अपने पापन के माफी के खातिर, अउर बाद माहीं दुसरे मनइन के पापन के माफी के खातिर बलिदान चढ़ामँइ; काहेकि ऊँ खुद काहीं बलिदान चढ़ाइके, ओही एक बेरकिन माहीं पूर कइ दिहिन हीं।

²⁸काहेकि मूसा के बिधान त कमजोर मनइन काहीं महायाजक बनाबत हय, पय मूसा के उआ बिधान के बाद, परमातिमा कसम खाइके अपने लड़िका काहीं महायाजक बनाइन हीं। अउर उँइन लड़िका काहीं हमेसा के खातिर परिपूर्न बनाइन हीं।