Read Bagheli इब्रानियन 9 Bible Online

इब्रानियन 9 - Bagheli bible

इब्रानियन 9

¹उआ पहिल करार माहीं घलाय अराधना के नेम रहे हँय, अउर अइसन पबित्र जघा जउन इआ संसार माहीं रही हय।

²काहेकि इआ धरती माहीं एकठे तम्बू बनाबा ग रहा हय, जउने के पहिल भाग माहीं दिया धरँय के स्टैन्ड, अउर मेज, अउर भेंट के रोटी रही हँय, अउर उआ भाग पबित्र जघा कहाबत रही हय।

³अउर दुसरे परदा के पीछे तम्बू के उआ भाग रहा हय, जउन महापबित्र जघा कहाबत रही हय।

⁴अउर उआ महापबित्र जघा माहीं धूप जलामँइ बाली सोने के बेदी, अउर चारिव कइती से सोने से मढ़ी करार के सन्दूख रही हय, अउर ओखे भीतर मन्ना से भरा सोने के एकठे बरतन, अउर हारून के लाठी जउने माहीं पत्ती फुटुकि आईं तय, अउर करार के पटिया घलाय रही हँय।

⁵अउर उआ सन्दूख के ऊपर दुइठे तेजोमँय करूब[1] रहे हँय, जउन पस्चाताप के ढेक्कन काहीं अपने पखनन से मूँदे रहे हँय, इनखे बारे माहीं एक-एक कइके बखान करँइ के मोका अबे नहिं आय।

⁶अउर जब ऊँ सगली चीजँय ब्यबस्थित रूप से तइआर होइ गईं, तब याजक तम्बू के पहिल भाग माहीं जाइके सेबा के काम करँइ लागें। काहेकि याजक उहाँ हर समय सेबा के काम करँय जाइ सकत रहे हँय।

⁷पय तम्बू के दुसरे भाग माहीं अरथात महापबित्र जघा माहीं, केबल महायाजक साल भरे माहीं एक बेरकिन जात रहे हँय। पय ऊँ बिना जानबरन के खून लए नहीं जात रहे आँय। जउने काहीं ऊँ अपने, अउर दुसरे मनइन के भूल चूक के खातिर बलिदान चढ़ाबत रहे हँय।

⁸एसे पबित्र आत्मा इहय बतामँइ चाहत हें, कि जब तक इआ पहिल तम्बू ठाढ़ हय, तब तक महापबित्र जघा माहीं जाँइ के खातिर, गइल देखाई नहीं दइ रही आय।

⁹अउर इआ तम्बू बर्तमान समय के खातिर एकठे उदाहरन आय; जउने माहीं अइसन भेंट अउर बलिदान चढ़ाए जात हें, जउनेन से परमातिमा के अराधना करँइ बाले मनइन के बिबेक परिपूर्न नहीं होइ सकय।

¹⁰काहेकि ऊँ भेंट अउर बलिदानन माहीं, खाँय-पिअँइ के चीजँय, अउर अनेकव प्रकार के नहाय-धोमँय के बिधी-बिधान होत रहे हँय, जउन केबल देंहन काहीं सुद्ध करँइ के नेम आहीं। अउर जउन नए बिधान के समय तक के खातिर लागू कीन गे रहे हँय।

¹¹पय जब मसीह आमँइ बाली निकही-निकही चीजन के महायाजक बनिके आएँ, त ऊँ अउर महान अउर परिपूर्न तम्बू से होइके आएँ हँय, जउन मनइन के हाँथ के बनाबा न होय, अरथात उआ तम्बू इआ संसार के न होय।

¹²अउर ऊँ बोकरन अउर बछबन के खून काहीं लइके नहीं, बलकिन एक बेरकिन माहीं हमेसा के खातिर भेंट के रूप माहीं अपनेन खून काहीं लइके महापबित्र जघा माहीं चलेगें, अउर हमरे पंचन के खातिर पापन से मुक्ती पाउब निस्चित कइ दिहिन ही।

¹³काहेकि जब बोकरन अउर बरधन के खून, अउर कलोरी बछिया के राख, अपबित्र मनइन के ऊपर छिड़िके जात हें, त ऊँ उनखे देंह के बाहिरी रूप काहीं सुद्ध कइके पबित्र करत हें।

¹⁴त मसीह जउन खुद काहीं सनातन आत्मा के द्वारा, परमातिमा के आँगे निरदोस बली के रूप माहीं चढ़ाइन हीं, त ऊँ अपने खून के द्वारा तोंहरे पंचन के सोच-बिचारन काहीं, मउत कइती लइ जाँइ बाले बुरे कामन से जरूर सुद्ध करिहँय, जउने तूँ पंचे जिन्दा परमातिमा के सेबा कइ सका।

¹⁵अउर इहय कारन से यीसु नई करार के बिचबई भे हँय, जउने उनखे मउत के द्वारा, जउन पहिल करार के समय के अपराध रहे हँय, उनसे छुटकारा मिलय, अउर परमातिमा के चुने मनई, करार के मुताबिक हमेसा के खातिर बारिसदार बन जाँय।

¹⁶काहेकि जहाँ तक बसीअत नामा के सबाल हय, त ओखे खातिर जे कोऊ ओही लिखत हय, ओखे मउत के सबूत देखाउब जरूरी होत हय।

¹⁷काहेकि कउनव बसीयतनामा, तबहिन काम करत हय, जब ओही लिखँइ बाला मर जात हय। जब तक ओही लिखँइ बाला जिन्दा रहत हय, त उआ कउनव काम के नहीं होय।

¹⁸एहिन से पहिल करार खून के द्वारा कीन गे रही हय।

¹⁹काहेकि जब मूसा नबी सगले इजराइली लोगन काहीं, बिधान के सगले हुकुम सुनाय चुकें। तब ऊँ बछबन अउर बोकरन के खून लइके, पानी अउर लाल ऊन, अउर जूफा नाम के बिरबा के डेरइआ के साथ, बिधान के किताब के ऊपर छिड़िकिन, अउर ओखे बाद सगले मनइन के ऊपर घलाय छिड़िक दिहिन।

²⁰अउर कहिन, कि “इआ, उआ करार के खून आय, जेखर हुकुम परमातिमा तोंहरे पंचन के खातिर दिहिन हीं।”

²¹अउर इहइमेर से ऊँ, तम्बू अउर सेबा के काम माहीं आमँइ बाले, सगली चीजन के ऊपर घलाय खून छिड़िक दिहिन।

²²अउर इआ बात बेलकुल सही ही, कि बिधान के मुताबिक हमेसा, सगली चीजँय खून के द्वारा सुद्ध कीन जाती हईं; अउर बिना खून बहाए पापन के माफी नहीं मिलय।

²³एसे इआ जरूरी हय, कि स्वरग के चीजन के साछात तसबीर के रूप माहीं बनी सगली चीजँय, ईंन बलिदानन के द्वारा सुद्ध कीन जाँय, काहेकि स्वरग के सगली चीजँय खुदय इनसे उत्तम बलिदानन के द्वारा सुद्ध कीन जाती हँय।

²⁴काहेकि मसीह, हाँथ के बनाए उआ महापबित्र जघा माहीं नहीं गें, जउन सच्चे महापबित्र जघा के नमूना के मुताबिक बनाई गे रही हय। बलकिन सीधे स्वरग माहीं चलेगें। जउने हमरे पंचन के खातिर स्वरग माहीं परमातिमा के आँगे हमेसा देखाई देंय।

²⁵अउर अब उनहीं खुद काहीं बेर-बेर बली चढ़ामँइ के जरूरत नहिं आय, जइसन महायाजक हर साल खुद के खून नहीं, बलकिन बली के खून लइके, महापबित्र जघा माहीं जात रहे हँय।

²⁶नहीं त उनहीं संसार के सुरुआत से लइके अबे तक बेर-बेर दुख उठामँइ परत, पय अब जुग के आखिरी समय माहीं, ऊँ एक बेरकिन आएँ हँय, कि जउने अपने बलिदान के द्वारा पाप काहीं दूर कइ देंय।

²⁷अउर जइसन मनइन के खातिर एक बेरकी मरब, अउर ओखे बाद न्याय के होब निस्चित हय।

²⁸उहयमेर मसीह घलाय, सगले मनइन के पापन काहीं उठामँइ के खातिर एक बेरकिन बलिदान भें। अउर जउन मनई उनखे दुसराय आमँइ के इन्तजार कइ रहे हँय, ऊँ उनखे पापन काहीं उठामँइ के खातिर नहीं, बलकिन उनहीं मुक्ती देंइ के खातिर दुसराय अइहँय।