Read Bagheli 1 पतरस 2 Bible Online

1 पतरस 2 - Bagheli bible

1 पतरस 2

¹एसे तूँ पंचे अपने जीबन से हरेकमेर के बैर-भाव, छल-कपट, इरसा अउर बदनामी काहीं दूर कइके,

²नबा पइदा भे बच्चन कि नाईं सुद्ध आत्मिक दूध पामँइ के लालसा करा, जउने ओखे द्वारा मुक्ती पामँइ के खातिर आँगे बढ़त जा।

³देखा, प्रभू केतना दयालू हें, अब तूँ पंचे इआ जान लिहे हया।

⁴उनखे लघे आबा, जिनहीं संसारिक मनई त बिना काम के ठहराइन हीं, पय ऊँ परमातिमा के द्वारा चुने अउर अनमोल जिअत पथरा आहीं।

⁵अउर तुहूँ पंचे खुदय जिअत पथरा कि नाईं, आत्मिक घर बनाए जाय रहे हया, जउने याजकन के पबित्र समाज बनिके, अइसन आत्मिक बलिदान चढ़ाबा, जउन यीसु मसीह के द्वारा परमातिमा काहीं सोइकार होय।

⁶अउर पबित्र सास्त्र माहीं घलाय इआ लिखा हय, कि परमातिमा कहिन हीं, “देखा, हम सिय्योन पहार माहीं एकठे कोनमा के पथरा धरित हएन, जउन हमार चुना आय, अउर उआ अनमोल हय, एसे जे कोऊ ओखे ऊपर बिसुआस करी, उआ कउनव मेर से लज्जित न होई।”

⁷एसे तूँ पंचे जउन उआ पथरा के ऊपर बिसुआस करते हया, उआ तोंहरे पंचन के खातिर अनमोल हय, पय जे कोऊ ओखे ऊपर बिसुआस नहीं करँय, उनखे खातिर “जउने पथरा काहीं राजा के कारीगर लोग बिना काम के ठहराइन रहा हय, उहय कोने के खास पथरा बनिगा।”

⁸अउर “उआ अइसन पथरा बनिगा जेसे मनइन काहीं ठेस लागत ही, अउर अइसन बड़ी चट्टान बनिगा जउने से मनइन काहीं ठोकर लागत ही।” काहेकि ऊँ पंचे परमातिमा के बचन काहीं न मानिके ठोकर खात हें, अउर ऊँ पंचे एहिन के खातिर ठहराए घलाय गे रहे हँय।

⁹पय तूँ पंचे परमातिमा के चुने बंस आह्या, अउर राज पदधारी याजकन के समाज आह्या, अउर पबित्र मनई, अउर परमातिमा के खास प्रजा आह्या, अउर उँइन तोहईं पंचन काहीं, अँधिआर से निकारिके, अपने अदभुत जोति माहीं बोलाइन हीं, कि उनखे महिमा काहीं अपने जीबन से देखाबा।

¹⁰एक समय अइसन रहा हय, जब तूँ पंचे परमातिमा के प्रजा नहीं रहे आह्या, पय अब तूँ पंचे परमातिमा के प्रजा बन गया हय, पहिले तोंहरे पंचन के ऊपर परमातिमा के दया नहीं भे रही आय, पय अब तोंहरे पंचन के ऊपर परमातिमा के दया भे ही।

¹¹हे पियार भाई-बहिनिव, हम तोंहसे बिनती करित हएन, कि तूँ पंचे अपने-आप काहीं परदेसी, अउर यात्री जानिके, इआ संसार के उन बुरी अभिलासन से बचे रहा, जउन तोंहरे आत्मा से युद्ध करती हईं।

¹²गैर मसीही मनइन के बीच माहीं, तोंहार चाल-चलन निकहा होंइ चाही; एसे कि जउने-जउने बातन माहीं, ऊँ पंचे तोहईं कुकर्मी जानिके बदनाम करत हें, ऊँ पंचे तोंहरे निकहे कामन काहीं देखिके; ईंन निकहे कामन के कारन परमातिमा के न्याय करँइ बाले दिन काहीं, परमातिमा के बड़ाई करँय।

¹³अउर तूँ पंचे प्रभू के खातिर मनइन के ठहराए, हरेक अधिकारन के अधीन रहा, अउर राजा के अधीन एसे रहा, काहेकि ऊँ सगले मनइन के ऊपर प्रधान आहीं।

¹⁴अउर हाकिमन के अधीन एसे रहा, काहेकि उनहीं कुकर्मिन काहीं सजा देंइ के खातिर, अउर सही काम करँइ बाले मनइन के बड़ाई करँइ के खातिर पठबा ग हय।

¹⁵काहेकि परमातिमा के इहय मरजी ही, कि तूँ पंचे निकहे कामन काहीं करा, अउर निरबुद्धी मनइन के अग्यानता के बातन काहीं बन्द कइ द्या।

¹⁶अउर तूँ पंचे अजाद मनई कि नाईं जीबन जिआ, पय अपने अजादी काहीं बुराई करँइ के आड़ न बनाया, बलकिन परमातिमा के सेबकन कि नाईं जीबन जिआ।

¹⁷सगले मनइन के सम्मान करा, अपने बिसुआसी भाई-बहिनिन से प्रेम रक्खा, परमातिमा के भय माना, अउर राजा के सम्मान करा।

¹⁸हे दासव, हरेकमेर से भय के साथ, अपने मालिकन के अधीन रहा, निकहे अउर नम्र मालिकन भर के नहीं, बलकिन कठोर मालिकन के घलाय अधीन रहा।

¹⁹काहेकि अगर कोऊ परमातिमा के बचन के मुताबिक जीबन जिअत, अन्याय से दुख अउर कस्ट सहत हय, त परमातिमा द्वारा ओखर बड़ाई होई।

²⁰पय अगर तूँ पंचे अपराध कइके मार खा, अउर धीरज धरा, त ओमा कउनव बड़ाई के बात नहिं आय, पय अगर तूँ पंचे निकहा काम कइके दुख सहते हया, अउर धीरज धरते हया, त परमातिमा तोंहार बड़ाई करिहँय।

²¹अउर तूँ पंचे एहिन के खातिर परमातिमा के द्वारा बोलाए गया हय, काहेकि मसीह घलाय तोंहरे खातिर दुख सहिके, तोंहईं नमूना देखाइगे हँय, कि जउने तुहूँ पंचे उनहिन के पद चिन्हन माहीं चला।

²²अउर मसीह के बारे माहीं पबित्र सास्त्र माहीं लिखा हय, कि “न त ऊँ कउनव पापय किहिन, अउर न उनखे मुँहे से कउनव छल-कपट के बातँय निकरीं।

²³अउर न त ऊँ गारी सुनिके कबहूँ गारिन दिहिन, अउर दुख काहीं सहिके ऊँ कोहू काहीं धमकी नहीं देत रहे आँय, बलकिन अपने-आप काहीं सही न्याय करँइ बाले परमातिमा के हाँथ माहीं सउँपि देत रहे हँय।”

²⁴ऊँ खुदय हमरे पंचन के पापन काहीं अपने देंह के ऊपर लए क्रूस माहीं चढ़िगें, जउने हम पंचे पाप के सम्बन्ध से पूरी तरह से मुक्त होइके, परमातिमा के नजर माहीं जउन निकहा हय, उहय करी; अउर उनहिन के मार खाँइ से तूँ पंचे चंगे भया हय।

²⁵काहेकि तूँ पंचे पहिले भटकी गड़रन कि नाईं रहे हया, पय अब अपने प्रान के रखबारी करँइ बाले, अउर मुखिया, अरथात परमातिमा के लघे पुनि आय गए हया।