Read Bagheli 1 पतरस 5 Bible Online

1 पतरस 5 - Bagheli bible

1 पतरस 5

¹तोंहरे पंचन के बीच माहीं जउन मसीही मन्डली के अँगुआ हें, हमहूँ उनहिन कि नाईं अँगुआ हएन, अउर मसीह जउन दुख सहिन हीं, हम ओखर गबाह हएन, अउर प्रगट होंइ बाली महिमा माहीं भागीदार होइके, उनहीं पंचन काहीं इआ समझाइत हएन।

²कि परमातिमा के उआ झुन्ड के रखबारी करा, जउन तोंहईं पंचन काहीं सउँपा ग हय, अउर इआ काम कउनव दबाव से नहीं, बलकिन परमातिमा के मरजी के मुताबिक, बड़े खुसी के साथ पूरे मन से किहा। अउर इआ काम नीच कमाई के खातिर न किहा।

³अउर जउन झुन्ड तोंहईं पंचन काहीं रखबारी के खातिर सउँपा ग हय, उनखे ऊपर आपन अधिकार न जताबा, बलकिन झुन्ड के खातिर आदर्स बना।

⁴अउर जब संसार के रखबारी करँइ बाले परमप्रधान अइहँय, त तोंहईं पंचन काहीं महिमा के मुकुट दीन जई, जउन कबहूँ न मुरझई।

⁵इहइमेर से हे नवजमानव, तुहूँ पंचे घलाय अपने मसीही मन्डली के अँगुअन के अधीन रहा, अउर तूँ पंचे सगले जन नम्रता के साथ एक दुसरे के सेबा के खातिर, हमेसा तइआर रहा, काहेकि “परमातिमा घमन्ड करँइ बालेन के बिरोध करत हें, पय जे कउनव बात के घमन्ड नहीं करँय, उनखे ऊपर किरपा करत हें।”

⁶एसे तूँ पंचे परमातिमा के बलमान हाँथ के नीचे नम्रता के साथ रहा, जउने ऊँ तोंहईं उचित समय माहीं बढ़ामँय।

⁷अउर आपन सगली चिन्ता उनहिन के ऊपर डार द्या, काहेकि उनहीं हमेसा तोंहार पंचन के ख्याल रहत हय।

⁸अउर तूँ पंचे सचेत होइके, हमेसा परमातिमा के बचन माहीं बने रहा, काहेकि तोंहार बइरी सइतान, गरजँय बाले सेर कि नाईं, हमेसा इआ खोज माहीं रहत हय, कि केही परमातिमा के बचन से भटकाय देई।

⁹अउर तूँ पंचे बिसुआस माहीं मजबूत होइके, ओखर सामना करा, काहेकि तूँ पंचे जनते हया, कि सगले संसार के तोंहार मसीही भाई-बहिनी घलाय, इआमेर के दुख भोग रहे हँय।

¹⁰अउर अब परमातिमा जउन अनन्त किरपा के सोता आहीं। उँइन तोंहईं मसीह के द्वारा अपने अनन्त महिमा माहीं बोलाइन हीं, तोंहईं थोरी देर तक दुख भोगे के बाद, खुदय तोंहईं बिसुआस माहीं मजबूत, स्थिर, अउर बलमान कइ देइहँय।

¹¹उनखर अधिकार जुग-जुग तक बना रहय। आमीन।

¹²हम आपन इआ चिट्ठी सिलबानुस के हाँथे से पठइत हएन, जिनहीं हम बिसुआस के काबिल आपन भाई मानित हएन, अउर अपने इआ चिट्ठी माहीं संछेप माहीं लिखिके, तोंहईं पंचन काहीं इआ समझामँइ के कोसिस किहेन हय, अउर इआ गबाही दिहेन हय, कि परमातिमा के सच्ची किरपा इहय आय, कि तूँ पंचे उनखे ऊपर बिसुआस माहीं स्थिर रहा।

¹³अउर बेबीलोन प्रदेस माहीं जउन तोंहरेन पंचन कि नाईं परमातिमा के चुने बिसुआसी भाई-बहिनी हें, ऊँ पंचे, अउर मसीह के ऊपर बिसुआस करँइ के कारन, मरकुस जउन हमरे लड़िका कि नाईं हें, तोहँई नबस्कार करत हें।

¹⁴अउर तूँ पंचे बड़े प्रेम के साथ खुसी से एक दुसरे से गले मिलिके नबस्कार करा। अउर तूँ पंचे जेतने जन मसीह के ऊपर बिसुआस करते हया, मसीह के सान्ती तोंहईं पंचन काहीं मिलत रहय।