Read Bagheli 2 यूहन्ना 1 Bible Online

2 यूहन्ना 1 - Bagheli bible

2 यूहन्ना 1

¹हम मसीही मन्डली के अँगुआ आहेन, हमरे तरफ से परमातिमा के व्दारा चुनी उआ बहिनी, अउर ओखे लड़िका बिटिअन के नाम, जिनसे हम सच्चा प्रेम रक्खित हएन, अउर केबल हमहिन भर नहीं, बलकिन ऊँ सगले जने तोंहसे प्रेम रक्खत हें, जउन सत्य काहीं जानत हें;

²उआ सत्य जउन हमरे पंचन के जीबन माहीं स्थिर रहत हय, अउर सब दिन हमरे पंचन के साथ बना रही;

³पिता परमातिमा, अउर उनखे लड़िका यीसु मसीह के तरफ से किरपा, दया, अउर सान्ति, सत्य अउर प्रेम समेत हमरे पंचन के साथ रहय।

⁴हम खुब खुसी भएन, कि हम तोंहरे कुछ लड़िका बिटिअन काहीं उआ हुकुम के मुताबिक, जउन हमहीं पंचन काहीं पिता परमातिमा के तरफ से मिला रहा हय, सत्य माहीं चलत पाएन हय।

⁵अब हे बहिनी, हम तोंहईं कउनव नबा हुकुम नहीं, बलकिन उहय जउन सुरुआतय से हमरे पंचन के लघे हय, लिखित हएन; अउर तोंहसे बिनती करित हएन, कि हम पंचे एक दुसरे से प्रेम रक्खी।

⁶अउर प्रेम इआ आय, कि हम पंचे उनखे हुकुमन के मुताबिक चली, इआ उहय हुकुम आय, जउन तूँ पंचे सुरुआत से सुने हया, अउर तोंहईं पंचन काहीं प्रेम सहित जीबन जिअँइ चाही।

⁷काहेकि बहुत से गुमराह करँइ बाले संसार माहीं तइआर होइगे हँय, जउन इआ नहीं मानँय, कि यीसु मसीह मनई के अउतार लइके आए हँय, उआ गुमराह करँय बाला, अउर मसीह के बिरोधी इहय आय।

⁸अपने बारे माहीं चउकस रहा; कि जउन मेहनत हम पंचे किहेन हय, ओही तूँ पंचे न बिगाड़ा, बलकिन ओखर पूर प्रतिफल पाबा।

⁹जे कोऊ मसीह के सिच्छा से आँगे बढ़ि जात हय, अउर ओखर पालन नहीं करय, ओखे लघे परमातिमा नहीं रहँय; अउर जे कोऊ मसीह के सिच्छा माहीं बना रहत हय, ओखे लघे पिता परमातिमा, अउर उनखर लड़िका यीसु मसीह घलाय रहत हें।

¹⁰अगर कोऊ तोंहरे पंचन के लघे आबय, अउर मसीह के इहय सिच्छा काहीं न देय, त ओही अपने घर माहीं न घुसँय दिहा, अउर न ओसे नबस्कार किहा।

¹¹काहेकि जे कोऊ अइसन मनई काहीं नबस्कार करत हय, त उआ ओखे बुरे कामन माहीं भागीदार बन जात हय।

¹²तोंहईं पंचन काहीं लिखँइ के खातिर हमरे लघे खुब बातँय हईं; पय कागज अउर स्याही से लिखँय नहीं चाही; पय हमहीं आसा ही, कि हम तोंहरे लघे अउब, अउर आमने-सामने बइठिके बात करब, जउने तोंहार पंचन के आनन्द पूर होइ जाय।

¹³तोंहरे चुनी बहिनी के सगले लड़िका बिटिअन के तरफ से, तोंहईं नबस्कार पहुँचय।