Read Baibul, Mizo Genesis 18 Bible Online

Genesis 18 - Baibul, Mizo bible

Genesis 18

¹Abrahama chu chhun ni lum lai taka puan in kawngka bula a thut laiin, Lalpa chu Mamre sasaw kiangahte chuan a hnenah a rawn inlar a;

²tin, a han dak a, a en a, tin, ngai teh, a zawn lawkah chuan mi pathum an lo ding reng a; tin, a hmuh veleh puan in kawngka ata chu anmahni lawm turin a va tlan a, lei siin chibai a buk a,

³Ka pu, mi khawngaih theih chuan, khawngaih takin i chhiahhlawh hi mi kalpel lul suh ang che u:

⁴tui tlem tal rawn la se la, in kete sil u la, thing hnuaiah hian chawl teh rih u:

⁵chhang tlem tal ka va la ang a, in thinlung tiharh ang che u; chu mi hnuah chuan in kal zel dawn nia: chu mi avanga in chhiahhlawh hnena lo kal hi in ni chawk ang a;" a ti a. Tin, anni chuan, "I sawi ang chuan va ti rawh," an ti a.

⁶Tichuan Abrahama chu puan in chhungah Sari hnenah chuan a lut ta thuai a, "Chhangphut dip tak tehkhawng thum siam la, hmet la, chhangperahte siam rawh," a ti a.

⁷Tin, Abrahama chu bawng rual lamah a va tlan a, bawng no nalh tha zet hi a rawn la a, chhiahhlawh hnenah a pe a; tin, a ni chuan a lo siam thuai thuai a.

⁸Tin, hnutetui khal te, hnutetui te, bawng no sa siamte chu a la a, an hmaah a va hlui ta a; tin, thing hnuaiah chuan an kiangah a ding reng a, anni chuan an ei ta a.

⁹Tin, anni chuan a hnenah, "I nupui Sari khawiah nge a awm?" an ti a. Tin, ani chuan, "Saw puan inah sawn," a ti a.

¹⁰Tin, ani chuan, "Hun hi a lo thlen leh tikah chuan i hnenah ka lo kal leh ngei ngei ang a, tin, ngai teh, i nupui Sari chuan fapa a nei ang," a ti a. Tin, a hnunga puan in kawngka bul atang chuan Sari'n a lo hria a.

¹¹Abrahama leh Sari chu upa tak, tar tawh tak an ni a; hmeichhe dan pangngai chu Sari chungah chuan a reh daih tawh a.

¹²Tichuan Sari'n, "Tar ka nih tawh hnu hian lawmna ka nei ang maw, ka Lalpa lah a upa tawh bawk si?" tiin a rilruin a nui a.

¹³Tin, Lalpa chuan Abrahama hnenah, "Engati nge Sari'n, 'Kei tar hian fa ka hring em ang maw?' tiin a nuih?

¹⁴Lalpa tan thil reng reng a harsa lutuk em ni? Hun ruatah, hun a lo thlen tikah chuan i hnenah ka lo kal leh ang a, tin Sari chuan fapa a nei ang," a ti a.

¹⁵Chutichuan Sari chuan, "Ka nui lo" tiin a pha a; a hlau si a. Tin ani chuan, "Awih loh loh tur; i nuih ngei kha le," a ti a.

¹⁶Tin, mite chu chuta ta chu an tho a Sodom khaw lam chu an en a: tin, Abrahama chu anmahni thlah turin an hnenah a kal ve a.

¹⁷Tin, Lalpa chuan, "Ka thil tih tur hi Abrahama lakah hian ka zep ang em aw?

¹⁸Abrahama hi chi ropui leh thiltithei tak a lo la ni ngei dawn a, amahah chuan khawvela chi tin an la thawveng dawn si a.

¹⁹Lalpa kawng an zawh theihna'n a hnua a fate leh a chhungte, thil fel taka ti tur leh rorel anga ti tura thu a pek theihna turin ani chu ka ruat tawh si a; chutichuan a chungchang thu a sawia chu Lalpa'n Abrahama chunga a thlentir theihna turin," a ti a.

²⁰Tichuan Lalpa chuan, "Sodom leh Gomorra khaw au thawm a nasa ngeiin, an sual nasa em em a ni ngei mai;

²¹tunah ka zuk kal ang a, an au thawm ka hnena lo thleng ang ngei hian an ti nge ti lo ka en ang a; an tih loh chuan ka hre mai ang," a ti a.

²²Tin, mite chu chuta ta chu an hawi a, Sodom khaw lam chu an pan ta a; Abrahama erawh chu Lalpa hmaah chuan a la ding reng a.

²³Tin, Abrahama chuan a va hnaih a, "Mi felte chu mi sualte zingah i tiboral ve dawn em ni?

²⁴Khaw chhungah chuan mi fel sawmnga tal an awm mahna: a chhunga mi fel sawmnga awmte avang chuan khua chu zuah phah loin i tiboral dawn em ni?

²⁵Nang em chuan chutiang chuan mi felte chu mi sualte anga an awm vena tura mi felte chu mi sualte zinga tihhlum ve mai te chu i ti awm em si loa; nang em chuan i ti awm em si lo: lei chung zawng zawng Roreltu chuan fel takin a ti dawn lo'm ni?" a ti a.

²⁶Tin, Lalpa chuan, "Sodom khaw chhungah chuan mi fel sawmnga pawh ka hmuh chuan anmahni avang chuan khaw pum pui chu ka zuah mai ang," a ti a.

²⁷Tin, Abrahama chuan, "Ngai teh, kei vaivut leh meivap mai hian Lalpa chu ka be pawp ta sa che:

²⁸mi fel chu pangain sawmnga an tling lo a ni mahna: panga an tlin loh avangin khaw pum pui chu i tiboral dawn em ni?" a ti a. Tin, ani chuan, "Chutah chuan sawmli leh panga pawh ka hmuh chuan ka tiboral lo ang," a ti a.

²⁹Tin, ani chuan amah chu a be leh zel a, "Chutah chuan sawmli chauh i hmu a ni mahna," a ti a. Tin, ani chuan, "sawmli avang pawh chuan ka tiboral lo mai ang," a ti a.

³⁰Tin, ani chuan "Aw Lalpa chu thinur suh ang che, ka han sawi leh teh ang: chutah chuan sawmthum chauh i hmu a ni mahna," a ti a. Tin, ani chuan, "Chutah chuan sawmthum pawh ka hmuh chuan ka tiboral lo mai ang," a ti a.

³¹Tin, ani chuan, "Ngai teh, Lalpa chu ka be pawp ta sa che: chutah chuan sawmhnih chauh i hmu a ni mahna," a ti a. Tin, ani chuan, sawmhnih avang pawh chuan ka tiboral lo ang," a ti a.

³²Tin, ani chuan, "Aw Lalpa chu thinur suh ang che, vawi khat chauh chuan ka han sawi leh teh ang: chutah chuan sawm chauh i hmu a ni mahna," a ti a. Tin, ani chuan, "Sawm avang pawh chuan ka tiboral lo ang," a ti a.Tichuan Lalpa chu Abrahama nena an inbiak zawh veleh chuan a kal ta a: tin, Abrahama chu ama awmna lamah a kir leh ta a.

³³Tichuan Lalpa chu Abrahama nena an inbiak zawh veleh chuan a kal ta a: tin, Abrahama chu ama awmna lamah a kir leh ta a.