Read Baibul, Mizo Genesis 19 Bible Online

Genesis 19 - Baibul, Mizo bible

Genesis 19

¹Tin, vantirhkoh pahnih chu tlai lamah Sodom khua an zuk thleng a; Lota chu Sodom khaw kulh kawngkharah chuan a lo thu a: tin, Lotan anmahni a lo hmu a, lawm turin a ding ta a; tin, a hmaia lei siin chibai a buk a;

²tin, "Ngai teh u, ka pute u, khawngaih takin in chhiahhlawh inah hian lut rih ula, riak u la, in kete sil rawh u, tichuan zing takah in tho ang a, in kal leh dawn nia," a ti a. Nimahsela anni chuan, "Ni lo e, khawlaiah kan riak zawk ang," an ti a.

³Nimahsela ani chuan a thlem chiam a; tichuan a hnenah an kal a, a inah chuan an lut ta a, tin, ani chuan chawhmeh a siam a, chhang dawidim telh loh a kang a, tin, an ei ta a.

⁴Nimahsela an mut hmain khuaa mi, Sodom khuaa mite ngei chuan, veng tina mi zawng zawngin, apui apangin, in chu an hual vel hlawm a;

⁵tin, Lota chu an ko a, a hnenah, "Zanina i hnena mi lo lutte kha khawnge an awm? Anmahni kan pawl theihna'n kan hnenah rawn hruai chhuak rawh," an ti a.

⁶Tin, Lota chu kawngka bulah chuan an hnenah a va chhuak a, kawng a khar leh a.

⁷Tin, "Ka unaute u, khawngaih takin chuti em chuan sual ma ta che u.

⁸Ngai teh u, mipa la pawl ngai loh fanu pahnih ka nei a ni; mi khawngaih u la, anni chu in hnenah ka rawn hruai chhuak ang e, tha in tih ang apiangin an chungah ti nang che u: he mite chungah erawh hi chuan engmah ti lul suh ang che u; chu mi avang chuan a sin ka in chhungah hian an lo luh ni," a ti a.

⁹Tin, anni chuan, "Kiang mai rawh," an ti a. Tin, anmahni vek chuan, "He mi hrep hi heta awm tur hian a lo pem lut a, roreltuah awm a tum vei a: tunah zawng anni chunga tih ai mahin i chungah kan titha lo lehzual ang," an ti a. Tin, mi (Lota) chu an bawh chiam a, kawngkhar chu tichhe turin an rawn hnaih a.

¹⁰Nimahsela mite chuan an kut an zen chhuak a, Lota chu an hnenah in chhungah chuan an hnuk lut a, kawng an khar ta tlat a.

¹¹Tin, kawngka bula mite chu alian atein, an mit an tihdelsak a: chutichuan kawngkhar chu an zawng hmu zo ta lo a.

¹²Tin, mite chuan Lota hnenah, "Heng mite lo hi hetah hian chhungte dang i nei em? I makpa leh i fapate leh i fanute leh khaw chhunga i neih apiangte chu khua ata hi hruai chhuak rawh:

¹³LALPA hmaah chuan an au thawm chu a lo nasat tak avangin he khua hi kan tiboral dawn a ni: tiboral turin LALPA chuan min tir bawk si a," an ti a.

¹⁴Tichuan Lota chu a kal chhuak a, a fanute neitu, a makpate hnenah chuan a va sawi a, "Tho u la, he mi khua ata hi chhuak rawh u; LALPA'n khua hi a tiboral dawn a ni," a ti a. Nimahsela a makpate ngaih chuan fiamthu sawi ang lek a ni a.

¹⁵Tin, khawfing a chah veleh chuan vantirhkohte chuan, "Tho la, i nupui leh heta i fanu pahnih awmte hi hruai rawh; chutilochuan he khaw hremnaah hian in boral ve dah ang e," tiin Lota chu an tur ta sek a.

¹⁶Nimahsela a la muang hle si a; tichuan LALPA'n amah a khawngaih avangin mite chuan a kutah leh a nupui kutah leh a fanute pahnih kutah chuan an chelh a, tichuan an hruai chhuak a, khaw pawnah chuan an dah ta a.

¹⁷Tin, heti hi a ni a, pawna an hruai chhuah hnu chuan, "I nunna turin tlan chhuak rawh; i hnung lam hawi suh la, Phaizawl reng rengah hian ding hek suh; tlangah sawn tlan rawh, chutilochuan i boral dah ang e," a ti a.

¹⁸Nimahsela Lota chuan a hnenah, "Ka pu, chung ang chu ni suh se:

¹⁹ngai teh, i chhiahhlawh hian i mit a tlung a, nangin i zahngaihna chu i tilian a, chu zahngaihna chu ka nun humhimin ka chungah i lantir a ni; tlangah saw zawng ka tlan thei lo ang, thil tha lo tak hian mi rawn nangin ka thi dah ang e:

²⁰ngai teh, saw khua saw tlanna'n a hnai ber a, khaw te tak te a ni bawk si a: aw, chutah chuan (khaw te tak te a ni lo'm ni?) mi tlantir zawk rawh, tichuan ka nung dawn nia," a ti a.

²¹Tin, ani chuan a hnenah, ""Ngai teh, chu thil kawngah pawh chuan ka zawm che a ni, khua i sawi chu ka tiboral lo mai ang e.

²²Hmanhmawh la, chutah chuan tlan rawh; chu mi i thlen hma loh chuan engmah ka ti thei dawn si lo a," a ti a. Chuvangin chu khaw hmingah chuan Zoar an vuah ta a.

²³Lota chuan Zoar khua chu a thlen chuan lei chungah chuan ni a lo chhuak tawh a.

²⁴Tin, LALPA chuan Sodom leh Gomorra khaw chungah chuan vana LALPA hnen atang chuan kat leh mei a surtira;

²⁵tichuan chung khuate leh Phaizawl zawng zawng leh khuaa mi zawng zawngte leh leia thil tote chu a tiboral ta vek a.

²⁶A nupui erawh chuan Lota hnung atang chuan a lehhawi a, chi khawn dingah a lo chang ta a.

²⁷Tin, Abrahama chu zing takah LALPA hmaa a dinna hmunah khan a han chho a;

²⁸tin, Sodom leh Gomorra khaw lam leh Phaizawl ram zawng zawng lam chu a thlir a, a en reng a; tin, Ngai teh, chu mi rama meikhu chu rawhtuina meikhu ang maiin a khu chho ngut ngut a.

²⁹Tin, heti hi a ni a, Pathianin Phaizawl khuate chu a tihboral laia Lota awmna khuate chu a tihboral lai chuan, Pathianin Abrahama chu a hre reng a, Lota chu boralna zing ata chu a tir chhuak a.

³⁰Tin, Lota chu Zoar khua ata chu a chho a, tlangah chuan a awm a, a fanute pahnih chu a hnenah an awm bawk a; Zoar khuaah a awm ngam si loa: tin, amah leh a fanute pahnih chu pukah an awm ta a.

³¹Tin, a upa zawk chuan a naupang zawk hnenah chuan, "Kan pa hi a upa tawh a, khawvel zawng zawng dan anga min pawl turin lei chungah hian mipa pakhat mah an awm tawh si loa:

³²hawh, kan pa hi uain i intir ang khai, tichuan kan pa chithlah mang loa kan siam theihna'n a hnenah kan mu dawn nia," a ti a.

³³Tichuan chu mi zan chuan an pa chu uain an intir ta a: tin, a upa zawk chu a lut a, a pa hnenah chuan a va mu a; tin, ani chuan a lo mut lai chu a hre lo a, a thawh leh lai pawh chu a hre hek lo.

³⁴Tin, heti hi a ni a, atukah chuan a upa zawk chuan a naupang zawk hnenah chuan "Ngai teh, nizanah khan ka pa hnenah ka mu a: zaninah pawh hian uain i intir leh ang khai; tin, nang lut la, kan pa chithlah mang loa kan siam theihna'n a hnenah va mu ve rawh," a ti a.

³⁵Tichuan chu mi zan pawh chuan an pa chu uain an intir leh a: tin, a naupang zawk chu a tho a, a hnenah a va mu ta a; tin, ani chuan a lo mut lai chu a hre lo a, a thawh leh lai pawh chu a hre hek lo.

³⁶Chutiang chuan Lota fanute pahnih chuan an pa lakah chuan nau an lo pai ta ve ve a.

³⁷Tin, a upa zawk chuan fapa a hringa, a hmingah chuan Moaba a sa a: chu mi chu tun laia Moab-ho thlahtu hi a ni a.Tin, a naupang zawk pawh chuan fapa a hring ve a, a hmingah chuan Ben-ammia a sa a: chu mi chu tun laia Ammona thlahte thlahtu hi a ni a.

³⁸Tin, a naupang zawk pawh chuan fapa a hring ve a, a hmingah chuan Ben-ammia a sa a: chu mi chu tun laia Ammona thlahte thlahtu hi a ni a.