Read Baibul, Mizo Genesis 21 Bible Online

Genesis 21 - Baibul, Mizo bible

Genesis 21

¹Tin, LALPA chuan a sawi tawh angin Sari chu a zuk kan a, LALPA chuan a sawi tawh angin Sari chungah a tihsak ta bawk a.

²Tichuan Sari chu a rai a, Pathianin a hnena a sawi hun ruat takah chuan Abrahama chu a tar hnuin fapa a hrinsak ta a.

³Tin, Abrahama'n a fapa neih, Sari'n a hrinsaka chu a hmingah Isaaka a sa a.

⁴Tin, Abrahama'n Pathianin thu a pek ang khan, a fapa Isaaka chu ni riat a tlinin a serh a tansak a.

⁵Tin, Abrahama chu a fapa Isaaka a neih lai chuan kum 100 mi a ni a.

⁶Tin, Sari chuan, "Pathianin mi tinui ta; mi tin a hria apiangin mi nuihpui ang," a ti a.

⁷Tin, amah vekin, "Sari'n nautete a la pawm ang,' tih, tuin nge Abrahama hnenah sawi ngaihna hria ang? A tar hnu hian fapa ka hrinsak tak hi," a ti a,

⁸Tin, naute chu a lo thang lian a, a hnute hnek an bantir ta a: tin, Isaaka chu a hnute hnek an bantir ni chuan Abrahama'n ruai ropui tak a theh a.

⁹Tin, Aigupta mi Hagari fapa, Abrahama tana a hrina chuan, a nuihsan lai Sari'n a hmu a.

¹⁰Chu mi avangin Abrahama hnenah chuan "He bawihnu leh a fapa hi hnawt chhuak rawh: he bawihnu fapa hi ka fapa Isaaka ro luahpuitu tur a ni thei lo ang," a ti a.

¹¹Tin, chu thu chu a fapa avangin Abrahama ngaih chuan thil tha lo tak a ni.

¹²Nimahsela Pathianin Abrahama hnenah chuan, "Naupang chungchang thu leh i bawihnu chungchang thu hi i ngaihin thil tha lo tak ni suh se; Sari'n i hnena thu a sawi zawng zawng chu zawm rawh; Isaakaah hian i thlahte an la ti dawn si a

¹³Tin, bawihnu fapaah pawh hian i thlah a nih avangin chi tihtham zet ka la siam ang," a ti a.

¹⁴Tichuan Abrahama chu zing takah a tho a, chhang leh tuithawl tuia khatin a la a, Hagari a pe a, a kokiah a chhuansak a, naupang pawh chu a kaltir ta a; tichuan a kal a, Beer-seba thlalerah chuan a vak a vak ta a.

¹⁵Tin, tuithawla tui chu a lo awm ta lo a, tichuan naupang chu hnimbuk pakhat hnuaiah a dah ta mai a.

¹⁶Tin, "Naupang thi tur chu ka en ngam lo e," a tih avangin a kal a, hla fe, thal kah phak tawk angah hian a hma zawnah chuan a va thu ta chawt a. Tichuan a hma zawnah chuan a thu a, ring takin a tap ta a.

¹⁷Tin, Pathianin naupang aw chu a hria a; tin, Pathian vantirhkohin van atangin Hagari chu a zuk au a, a hnenah, "Hagar, eng i ti nge ni le? Hlau suh; a awmnaa naupang aw kha Pathianin a hria a sin.

¹⁸Tho la, naupang kha kai tho la, i kutin chelh rawh, amah chu chi ropui takah ka siam dawn a sin," a ti a.

¹⁹Tin, Pathianin a mit a tihvarsak a, tuichhunchhuah a hmu ta a; tichuan a va kal a, tuithawlah chuan tui chu a thun khat a, naupang chu a intir ta a.

²⁰Tin, Pathian chu naupang hnenah chuan a awm thin a, a lo thang lian zel a, thlalerah a awm thin a, thal kah thiam mi a lo ni ta a.

²¹Paran thlalerah chuan a awm a; tin, a nu chuan Aigupta ram ata nupui a neihsak a.

²²Tin, heti hi a ni a, chu mi lai vel chuan Abimeleka leh a sipai pawl hotu Phikola chuan Abrahama hnenah, "I thil tih apiangah chuan Pathian i hnenah a awm zel thin a:

²³chutichuan tunah hetah hian Pathian hming chhalin, kei leh ka fapa leh ka fapaa fapa pawh tihder loin, ka lo khawngaih tak che ang khan kei leh i awmna ram hi khawngaih ve thung zawk turin ka hnenah chhia chham rawh khai!" tiin a sawi a.

²⁴Tin, Abrahama chuan, "Ka chham ang chu," a ti a.

²⁵Tin, Abimeleka chhiahhlawhten tuichhunchhuah an chhuhsak avang chuan Abrahama'n Abimeleka chu a zilh a.

²⁶Tin, Abimeleka chuan "Chu mi thil titu chu tu nge ni, ka hre hauh lo mai: nang lahin mi hrilh si lo a, vawiinah chauh lo chuan ka la hre ve hauh lo mai," a ti a.

²⁷Tichuan Abrahama chuan beramte leh bawngpate a hruai a, Abimeleka hnenah a pe a; tin, an pahnih chuan thu an thlung ta a.

²⁸Tin, Abrahama'n a beram rual zinga mi beram no a nu pasarih a dah hrang a.

²⁹Tin, Abimaleka chuan Abrahama hnenah," Beram rual zinga mi beram no a nu pasarih a hranga i dah hi eng tizia nge ni?" a ti a.

³⁰Tin, ani chuan, "He tuichhunchhuah hi keimahin ka laih a ni tih mi hriatpuina turin he'ng beram no a nu pasarih hi ka kut ata i la tur a ni," a ti a.

³¹Chu mi avang chuan chu mi hmun chu Beer-seba a vuah a; chutah chuan an pahniha chhia an chham dun avangin.

³²Chutichuan Beer-seba-ah chuan thu an thlung ta a: tin, Abimeleka chu a tho a, a sipai pawl hotu Phikola nen Philistin-ho ramah chuan an hawng leh ta a.

³³Tin, Abrahama chuan Beer-seba-ah chuan far thing a phun a, chutah chuan LALPA, Chatuan Pathian hming chu a lam a.Tichuan Abrahama chu Philistin-ho ramah chuan rei tak a awm a.

³⁴Tichuan Abrahama chu Philistin-ho ramah chuan rei tak a awm a.