Read Baibul, Mizo Genesis 23 Bible Online

Genesis 23 - Baibul, Mizo bible

Genesis 23

¹Tin, Sari dam chhung chu kum 127 a ni a: chung chu Sari dam chhung kum chu a ni.

²Tin, Sari chu Kanaan rama Kiriath-arba khuaah chuan a thi a (chu chu Hebron khua a ni): tin, Abrahama chu Sari sun tur leh tah turin a lo kal a.

³Tin, mitthi ruang hma ata chu a tho a, Hetha thlahte hnenah chuan,

⁴In zingah mikhual leh pem mai ka ni a: ka mitthi ruang hi ka hmuh loha ka phum theihna turin in zingah hian phumna hmun ro mi pe rawh u," tiin a sawi a.

⁵Tin, Hetha thlahte chuan Abrahama chu an chhang a, a hnenah,

⁶Ka pu, min ngaithla teh, nang chu kan zingah hian lal ropui tak i ni a: kan thlanahte hian i duhna berah chuan i mitthi chu phum ta che: i mitthi i phumna turin kan zinga tumahin kan thlan pek che kan ui lo ang," an ti a.

⁷Tichuan Abrahama chu a tho a, chu mi rama mi, Hetha thlahte chu chibai a buk a.

⁸Tin, ka mitthi chu ka hmuh loha ka phum rem in tih chuan mi ngaithla u la, Makpela puk, a lo mawnga awm, a neih kha mi pe turin Zohara fapa Ephrona hnenah mi ngensak teh u.

⁹In zingah phumna hmun ro atana a man tawk ang ang zelin mi pe rawh se, tiin a bia a.

¹⁰Tin, Ephrona chu Hetha thlahte zingah chuan a thu ve reng a: tichuan Hit mi Ephrona chu Hetha thlahte hriatah, a khaw kulh kawngkaa lut apiang hriat ngeiah chuan,

¹¹Ni lo e, ka pu, mi ngaithla teh: lo chu ka pe chia, a chhunga puk awm pawh chu ka pe bawk a che; ka chipuiho fate mit hmuhah hian ka pe a che: i mitthi chu phum mai rawh," tiin Abrahama chu a chhang a.

¹²Tin, Abrahama chu chu mi rama mite hmaah chuan a kun a, chibai a buk a.

¹³Tin, chu mi rama mite hriatah chuan Ephrona hnenah, "Rem i tih phawt chuan khawngaih takin mi ngaithla teh; lo man chu ka pe zawk ang che; ka hnen ata hi la la, chutah chuan ka mitthi chu ka phum dawn nia," tiin a sawi a.

¹⁴Tin, Ephrona chuan Abrahama chu a chhang a, a hnenah,

¹⁵Ka pu, mi ngaithla teh: lei hmun, tangka sekel zali hu maite chu, nang leh kei atan sawi tham em ni ang? I mitthi chu phum mai rawh," a ti a.

¹⁶Tichuan Abrahama chuan Ephrona thu chu a zawm ta a; tin, Abrahama'n Hetha thlahte hriatah Ephronan tangka a sawi zat, tangka sekel zali, sumdawnghoin an hman thina chu a buk a, Ephrona a pe ta a.

¹⁷Chutichuan Ephrona lo, Mamre zawna Makpela rama awm chu, a lo nen a chhunga puk awm nen, loa thing awm zawng zawngte nen, a lo ri vel zawng zawnga thing awmte nen chuan,

¹⁸Hetha thlahte mithmuhah, a khaw kulh kawngkaa lut apiangte mithmuhah chuan, ro atan Abrahama hnenah pek nghehin a awm ta a.

¹⁹Chu mi hnuah chuan Abrahama'n a nupui Sari chu Kanaan rama Mamre zawna (chu chu Hebron khua a ni a) Makpela loa pukah chuan a phum ta a.Tichuan lo leh a chhunga puk awm chu, phumna hmun ro atan Abrahama chu Hetha thlahten an pe nghet ta a.

²⁰Tichuan lo leh a chhunga puk awm chu, phumna hmun ro atan Abrahama chu Hetha thlahten an pe nghet ta a.