Read Baibul, Mizo Genesis 24 Bible Online

Genesis 24 - Baibul, Mizo bible

Genesis 24

¹Tin, Abrahama chu a lo upa a, a lo tar ta hle a: tin, LALPA chuan Abrahama chu thil engkimah mal a sawmsak tawh a.

²Tin, Abrahama chuan a chhiahhlawh, a chhungte zinga upa ber, a neih zawng zawng chunga thuneitu hnenah chuan, "Khawngaih takin i kut kha ka malpui hnuaiah rawlh rawh:

³tichuan LALPA van Pathian leh lei Pathian chu chhalin, ka awmna Kanaan-ho nula zinga mi hi ka fapa nupuia neihsak lo turin chhia ka chhamtir dawn che a ni:

⁴kan ram lamah, ka laichinte hnena kalin ka fapa Isaaka hi nupui i neihsak zawk tur ani," a ti a.

⁵Tin, chhiahhlawh chuan a hnenah, "Hmeichhia chuan he mi ram lamah hian mi zui duh kher lo mahna: i fapa hi i lo chhuahna ram lamah chuan ka hruai kir leh tur em ni ang?" a ti a.

⁶Tin, Abrahama chuan a hnenah, "Ka fapa hi chutah chuan hruai kir leh lo turin fimkhur rawh.

⁷LALPA, van Pathian, ka pa in ata leh ka pianna ram ata mi hruai chhuaktu leh mi betu leh, 'He ram hi i thlahte ka la pe ang,' tia, ka hnena chhechhamtu chuan, amah ngeiin a vantirhkoh chu i hmaah a kaltir ang a, chuta tang chuan ka fapa hi nupui i rawn neihsak dawn nia.

⁸Tin, hmeichhia chuan a zui duh loh che chuan ka hnena i chhechham kawngah hian i thiang mai ang; engpawh ni rawh se, ka fapa hi chutah chuan i hruai kir leh tur ani lo," a ti a.

⁹Tichuan chhiahhlawh chuan a kut chu a pu Abrahama malpui hnuaiah chuan a rawlh a, chu mi thu-ah chuan a hnenah chhia a chham ta a.

¹⁰Tin, chhiahhlawh chuan a pu sanghawngsei zinga mi sanghawngsei sawm a hruai a, a pu thil tha tinreng kengin a chhuak ta a: tichuan a tho a, Mesopotamia rama Nahora te khuaah chuan a kal a.

¹¹Tin, tlai lama hmeichheho tui chawi tura an chhuah hun lai tak chuan, daikianga tuichhunchhuah kiangah chuan a sanghawngseite chu a thingthittir a.

¹²Tin, "Aw LALPA, ka pu Abrahama Pathian, khawngaih takin vawiinah hian mi hlawhtlintir la, ka pu Abrahama chungah chuan khawngaihna lantir ang che.

¹³En teh, tuikhur kiangah ka ding a, khuaa mite fanuho pawh tui chawi tura an lo kal hi:

¹⁴tichuan heti hian ni rawh se, nula tu hnenah pawh, 'Khawngaih takin ka in turin i tui bel kha tihniam teh khai,' ka tiha, tin aniina, 'In rawh, i sanghawngseite pawh hi in tur ka pe ang e,' titu apiang; chu mi ngei chu i chhiahhlawh Isaaka tana i mi ruat chu ni rawh se; tin, chu miah chuan ka pu chungah khawngaihna i lantir tih ka hre dawn nia," a ti a.

¹⁵Tin, heti hi a ni a, a sawi zawh hma chuan, ngai teh, Abrahama nau Nahora nupui Milkaii fapa Bethuela fanu Rebeki chu a kokia tui bel puin a lo chhuak a.

¹⁶Chu nula chu a hmel a tha em em a, nula thianghlim a ni a, mipa reng rengin an la pawl ngai hauh lo. Tin, tuikhurah chuan a chhuk a, a tui bel chu a tikhat a, a chho leh a.

¹⁷Tin, chhiahhlawh chu a tawk turin a tlan a, "Khawngaih takin i tui bela tui kha tlem te mi intir teh khai," a ti a.

¹⁸Tin, ani chuan, "In ta che, ka pu," a ti a: tin, rang takin a tui bel chu a kutah a chawi thla a, a intir ta a.

¹⁹Tin, a intir hnuin, "I sanghawngseite tan pawh an in kham hma loh chun ka chawi zel ang e," a ti a.

²⁰Tin, rang takin a tui bel chu a ran thlengah chuan a ruak a, tui chawi turin tuichhunchhuah lamah chuan a tlan leh a, a sanghawngseite zawng zawng tan chuan a chawi ta zel a.

²¹Tin, chhiahhlawh chuan ani chu a en reng a; LALPA'n a va zinna chu a hlawhtlintir leh tir loh hriatna'n a ngawi reng mai a.

²²Tin, heti hi a ni a, sanghawngseite chuan an in kham veleh, chhiahhlawh chuan rangkachak hnarvuah duli buk leh a kut atan banbun pahnih rangkachak tangka sawm buk a phawrh a;

²³tin, a hnenah, "Tu fanu nge i nih? Khawngaih takin mi hrilh teh. i pa inah kan riahna tur hmun a awm ang em?" a ti a.

²⁴Tin, ani chuan a hnenah, "Bethuela, Milkaii fapa, Nahora tan a hrinsaka fanu ka ni," a ti a.

²⁵Tin, amah vekin a hnenah, "Buhpawl leh ran chaw kan ngah ve ve a, riahna hmun pawh kan nei," a ti bawk a.

²⁶Tichuan chhiahhlawh chuan a lu a kun a, LALPA chu chibai a buk a.

²⁷Tin, "Ka pu chunga a khawngaihna leh a takna bang chuang lo, LALPA, ka pu Abrahama Pathian chu fakin awm rawh se: kei pawh hi LALPA chuan ka pu unaute in lamah mi hruai a lo nih hi," a ti a.

²⁸Tin, nula chu a tlan a, chung thu chu a nu chhungte a va hrilh a.

²⁹Rebeki chuan nuta a nei a, a hming chu Labana a ni a: tichuan Labana chu a chhuak a, tuikhur lamah mi hnenah chuan a tlan ta a.

³⁰Heti hi a ni a, hnarvuah leh a farnu kuta banbunte chu a hmu a, "Mi chuan chutin khatin mi ti a," tia, a farnu Rebeki thu sawite chu a hriat veleh chuan, mi hnenah chuan a kal ta a; tin, ngai teh, ani chu tuikhura sanghawngseite kiangah chuan a lo ding reng a.

³¹Tin, Labana chuan, "Nang LALPA malsawm dawngtu lo kal la, ka inah lut rawh; engah nge pawna i din reng? In leh sanghawngseite tan hmun ka buatsaih tawh a sin," a ti a.

³²Tin, mi chu inah chuan a lut a, tin, Labana chuan sanghawngsei thuamhnaw chu a phelh a; tin, sanghawngseite tan Buhpawl leh ran chaw a pe a, a ke leh a thiante ke silna'n tui a pe bawk a.

³³Tin, Abrahama chhiahhlawh hmaah chuan ei tur an hlui a: nimahsela abu chuan, "Ka rawn kal chhan thu ka sawi hma loh chuan ka ei lo ang," a ti a. Tin, ani chuan, sawi ta che," a ti a.

³⁴Tin, ani chuan, "Abrahama chhiahhlawh ka ni.

³⁵Tin, LALPA chuan ka pu chu nasa takin mal a sawm a, mi lian tak a lo ni a: LALPA chuan a hnenah beram rual te, bawng rual te, tangka te, rangkachak te, bawihpa te, bawihnu te, sanghawngsei te a pe bawk a.

³⁶Ka pu nupui Sari'n a tar hnuin ka pu tan fapa a hring a: ama hnenah chuan a neih zawng zawng a pe vek a.

³⁷Tin, ka pu chuan, "Ka awmna rama Kanaan-ho nula zinga mi hi ka fapa nupuiah i neihsak tur a ni lo:

³⁸ka pa in lamah, ka laichinte hnena kalin ka fapa tan nupui i neihsak zawk tur a ni,' tiin chhia mi chhamtir a.

³⁹Tin, keiin ka pu hnenah chuan 'Hmeichhia chuan mi zui duh kher lo mahna' ka ti a.

⁴⁰Tin, ani chuan ka hnenah, 'LALPA, a hmaa ka awm thinna chuan a vantirhkoh chu i hnenah a tir ang a, i kalna turah chuan a hlawhtlintir ang che; tichuan ka fapa tan ka laichinte leh ka pa chhungte zinga mi nupuiah i neihsak dawn nia:

⁴¹ka laichinte hnen ngei i thlen hunah chuan ka hnena i chhechham lakah hian i thiang ang; nula chu an pek loh che chuan ka hnena i chhechham lakah hian i thiang ang," a ti a.

⁴²Tichuan vawiinah hian tuikhur chu ka lo thleng a, 'Aw LALPA, ka pu Abrahama Pathian, ka kalnaah hian mi hlawhtlintir dawn chuan,

⁴³en teh, tuikhur kiangah ka din hi; tin, heti ni rawh se, nula tui chawi tura lo chhuak tu hnenah pawh, khawngaih takin in atan i tui bela tui kha tlemte mi pe teh, ka tiha,

⁴⁴tin, aniin ka hnenah, In rawh, i sanghawngseite tan pawh hian ka chawi ang e, titu apiang, chu mi ngei chu ka pu fapa atana LALPA hmeichhe ruat chu ni rawh se,' ka ti a.

⁴⁵Tin, ka rilrua ka sawi zawh hma chuan ngei teh, Rebeki hi tui bel puin a lo chhuak a, tin, tuikhurah chuan a chhuk a, tui a zuk chawi a: tin, a hnenah, 'Khawngaih takin tui mi intir teh khai,' ka ti a.

⁴⁶Tin, ani hian rang takin a koki ata chu a tui bel a chawi thla a, 'In rawh, i sanghawngseite pawh hi in tur ka pe ang e,' a ti a: chutichuan ka in a, sanghawngseite pawh a intir bawk a,

⁴⁷Tin, keiin, 'Tu fanu nge i nih?' tiin ka zawt a. Tin, ani hian, 'Bethuela, Nahora fapa, Milkaiin a hrinsaka fanu,' a ti a: tin, hnarvuah chu a hnarah ka vuah a, banbunte chu a kutah ka buntir bawk a.

⁴⁸Tin, ka lu ka kun a, LALPA chu chibai ka buk a, LALPA, ka pu Abrahama Pathian, ka pu naua fanu hi a fapa atan nupuia neihsak turin kawng dik taka mi hruaitu chu ka fak bawk a.

⁴⁹Tichuan tunah ka pu in khawngaih a, a chunga tih tak zeta in tih dawn chuan mi hrilh rawh u: in tih dawn loh pawhin mi hrilh rawh u; chutichuan ding lam emaw vei lam emaw ka hawi thei ang," a ti a.

⁵⁰Tin, Labana leh Bethuela chuan an chhang a, "He thil hi LALPA hnen atanga chhuak a nih hi: a chhia a tha pawh i hnenah kan sawi thei lo e.

⁵¹En teh, Rebeki chu i hmaa hi a awm alawm, hruai la, kal ta che, LALPA'n a sawi tawh angin i pu fapaa nupuiah awm rawh se," an ti a.

⁵²Tin, heti hi a ni a, Abrahama chhiahhlawh chuan an thu chu a hriat veleh lei siin LALPA chibai a buk ta a.

⁵³Tin, Abrahama chhiahhlawh chuan tangkarua incheinate leh rangkachak incheinate leh silhfente a la chhuak a, Rebeki chu a pe a: a nuta leh a nu pawh chu thil hlu takte a pe bawk a.

⁵⁴in, amah leh a thiante chuan an eiin an in a, an riak ta a; tin, zingah an tho a, "Ka pu hnenah mi kaltir tawh rawh u," a ti a.

⁵⁵Tin, a nuta leh a nu chuan "Chemtei hi ni rei lo te, ni sawm lek tal kan hnenah awm rih rawh se; chu mi hnuah chuan a kal dawn nia," an ti a.

⁵⁶Tin, ani chuan an hnenah, "Mi tikhawtlai suh u khai, LALPA chuan ka kalnaah hian mi hlawhtlintir ta si a; ka pu hnena ka hawn theihna turin mi kaltir zawk teh u khai," a ti a.

⁵⁷Tin, anni chuan, "Chemtei chu kan ko ang a, ama ka ngei kan bia ang," an ti a.

⁵⁸Tichuan Rebeki chu an ko a, a hnenah, "He mi hnenah hian i kal duh ang em?" an ti a. Tin, ani chuan, "Duh ang chu," a ti a.

⁵⁹Tichuan an farnu Rebeki leh a awmtu leh Abrahama chhiahhlawh leh a hote chu an kaltir a.

⁶⁰Tin, Rebeki chu mal an sawmsak a, a hnenah, "Kan farnu, nang chu sing hlira sang tam tak nu lo ni la, i thlahte chuan anmahni hawtute kulh kawngkhar chu neihsak rawh se," an ti a.

⁶¹Tichuan Rebeki chu a tho a, a bawihnute nen, sanghawngsei chungahte chuan an chuang a, mi chu an zui ta a: tichuan Abrahama chhiahhlawh chuan Rebeki chu a hruai a, a kal ta a.

⁶²Tin, Isaaka chu Beer-lahai-roi lam atang chuan a lo kal a, chhim rama awm a ni si a.

⁶³Tin, Isaaka chu tlai lamah phulah inngaihtuah turin a va leng chhuak a: tin, a han dak a, a en a, tin, ngai teh, sanghawngseite an lo kal a.

⁶⁴Tin, Rebeki chu a han dak a, Isaaka a hmuh veleh chuan sanghawngsei ata a chhuk ta a.

⁶⁵Tin, Abrahama chhiahhlawh hnenah chuan, "Phula min hmuak tura lo kal saw tu nge ni?" a ti a. Tin, chhiahhawh chuan, "Ka pu a nih saw," a ti a: tichuan a inkhuhna puan a la a, a inkhuh ta a.

⁶⁶Tin, chhiahhlawh chuan a thiltih zawng zawng chu Isaaka a hrilh a.Tin, Isaaka chuan Rebeki chu a nu Sari puan inah chuan a hruai lut a, tin, Rebeki chu a nei a, a nupui a lo ni ta a; tin, amah chu a hmangaih hle a: tichuan Isaaka chu a nu thih thuah pawh chuan a lo thlamuang thei ta a.

⁶⁷Tin, Isaaka chuan Rebeki chu a nu Sari puan inah chuan a hruai lut a, tin, Rebeki chu a nei a, a nupui a lo ni ta a; tin, amah chu a hmangaih hle a: tichuan Isaaka chu a nu thih thuah pawh chuan a lo thlamuang thei ta a.