Read Baibul, Mizo Genesis 26 Bible Online

Genesis 26 - Baibul, Mizo bible

Genesis 26

¹Tin, chu mi ramah chuan Abrahama dam laia tam lo tla hmasa zawk tih loh kha, tam a lo tla leh a. Tichuan Isaaka chu Philistin-ho lal Abimeleka hnenah Gerar khuaah aaa zuk kal a.

²Tin, LALPA chu a hnenah a rawn inlar a, "Aigupta ramah chuan zuk kal suh; ram ka hrilh turah che chuan awm rawh:

³he ramah hian awm rih la, tichuan i hnenah ka awm ang a, mal ka sawm dawn che nia; he'ng ram zawng zawng hi nangmah leh i thlahte pein, i pa Abrahama hnena chhia ka chham kha ka tinghet dawn a ni;

⁴tin, vana arsi zatin i thlahte chu ka la tipung ang a, he'ng ram zawng zawng hi i thlahte ka la pe bawk ang; tin, i thlahah chuan khawvela chi tin an la thawveng ang;

⁵Abrahama chuan ka thu a awih a, ka thuhrilhte, ka thupekte, ka thuruatte, ka dante pawh a zawm avang khan," a ti a.

⁶Tichuan Isaaka chuan Gerar khuaah chuan awm hmun a khuar ta a:

⁷tin, chu mi khuaa mite chuan a nupui chanhin an zawt a; tin, ani chuan, "Ka farnu a ni," a ti a: a hmel that avangin "He khuaa mite hian Rebeki avangin mi that dah ang e," tiin, "Ka nupui a ni," a ti ngam lo a ni.

⁸Tin, heti hi a ni a, chutah chuan rei tak a awm hnuin, Philistin-ho lal Abimeleka chuan tukverh atangin a han thlir a, tin, ngai teh, Isaaka chuan a nupui Rebeki a chhaih lai a han hmu a.

⁹Tichuan Abimelekan Isaaka chu a ko a, "Ngai teh, i nupui a nih ngei hi le: engati nge 'Ka farnu a ni' i tih mai le?" a ti a. Tin, Isaaka chuan a hnenah, "Amah avangin ka thi dah ang e,' ka tih avang a ni," a ti a.

¹⁰Tin, Abimeleka chuan, "Kan chunga i thiltih hi engtizia nge ni le? Mite zinga mi tupawh hian i nupui hi an lo mutpui mai thei a sin, tichuan kan chungah hian thiam lohna i rawn thlentir a ni dawn a," a ti a.

¹¹Tin, Abimeleka vek chuan, "Tupawh he mi hi emaw a nupui hi emaw khawih apiang chu tihhlum ngei ngei tur a ni," tiin mi zawng zawng chu thu a pe a.

¹²Tin, Isaaka chuan chu mi ramah chuan buh a ching ve a, chu mi ramah chuan buh za a hmu a: LALPA'n mal a sawm bawk a.

¹³Tichuan ani chu a lo ropui ta hle a, nasa taka mi ropui lo ni khawpin a lo lian ta tulh tulh a:

¹⁴beram rualte leh bawng rualte a nei a, chhungte tam tak a nei bawk a: tichuan Philistin-ho chuan an itsik ta a.

¹⁵Tin, a pa Abrahama dam laia a pa chhiahhlawhten tuichhunchhuah an laih zawng zawngte chu Philistin-hoten an hnawh a, leiin an lo tikhat ta vek mai a.

¹⁶Tin, Abimeleka chuan Isaaka hnenah, "Kan hnena ata kal bo daih rawh, kan aiin i chak zawk si a," a ti a.

¹⁷Tichuan Isaaka chu chuta ta chu a chhuak a, Gerar ruamah chuan a puan in a zar a, chutah chuan awm hmun a khuar ta a.

¹⁸Tin, Isaaka chuan a pa Abrahama dam laia an tuichhunchhuah laihte chu a lai leh a; Abrahama thih hnu khan Philistin-ho chuan an lo hnawh khat vek tawh si a: tin, a pain a hming a lo vuah ang zel khan a hming a vuah hlawm a.

¹⁹Tin, Isaaka chhiahhlawhten ruamah chuan an lai a, chutah chuan tuichhunchhuah hna nei an hmu ta hlauh a.

²⁰Tichuan Gerar khuaa ranpute chuan, "Tui hi kan ta a ni," tiin Isaaka ranpute nen chuan an inhnial a: tichuan amah nen an inhnial avangin tuichhunchhuah hmingah chuan "Esek" a vuah ta a.

²¹Tin, tuichhunchhuah dang an lai leh a, chu mi pawh chu chuh tumin an inhnial leh a: tichuan a hmingah chuan "Sina" a vuah leh a.

²²Tin, chuta ta chu a insawn a, tuichhunchhuah dang a lai leh a; chu chu chuh tumin an inhnial ta loa: tichuan "Tunah zawng LALPA'n hmun zau tak mi siamsak ta a, he ramah hian chi tam tak kan thlah tawh ang," tiin a hmingah chuan "Rehoboth" a vuah ta a.

²³Tin, chuta tang chuan Beer-seba-ah a han chho a.

²⁴Chu mi zan ngei chuan LALPA chu a hnenah a rawn inlar a, "Kei hi i pa Abrahama Pathian chu ka ni: hlau suh, i hnenah ka awm alawm, mal ka sawm ang chia, ka chhiahhlawh Abrahama avangin i thlahte chu ka la ti pung dawn a sin," a ti a.

²⁵Tichuan chutah chuan maicham a siam a, LALPA hming chu a lam a, chutah chuan a puan in a zar bawk a: tin, Isaaka chhiahhlawhte chuan chutah chuan tuichhunchhuah an lai leh a.

²⁶Tin, Gerar khua atangin Abimeleka chu a thian Ahuzzatha nen, a sipai pawl hotu Phikola nen, a hnenah an kal a.

²⁷Tin, Isaaka chuan an hnenah, "Mi hua a, in hnena ata mi kal botir si a, eng vangin nge ka hnenah in lo kal le?" a ti a.

²⁸Tin, anni chuan, LALPA chu i hnenah a awm tih chiang takin kan hria a, tichuan, 'I pawi kan khawih ngai loh ang leh thil tha chauh lo chu i chungah engmah reng reng kan tih loh va tlang taka kan kal botir ta che ang khan,

²⁹keini pawh kan chhiatna tur reng reng i tih lohna turin kan karah, keini leh nangma kar ngeiah hian chhechhamna lo awm tawh se la, i hnenah thu min thluntir rawh,' kan ti: tunah chuan nang zawnh LALPA malsawm dawngtu i nih tawh hi," an ti a.

³⁰Tin, ani chuan an tan ruai a theh sak a, tichuan an eiin an in ta a.

³¹Tin, zing lamah chuan zing takah an tho a, chhia an chham tawn a: tin, Isaakan anni chu a kaltir a, tichuan a hnen atang chuan tlang takin an chhuak ta a.

³²Tin, heti hi a ni a, chu mi ni vek chuan Isaaka chhiahhlawhte chu an lo kal a, an tuichhunchhuah laih chanchin an rawn hrilh a, a hnenah, "Tui kan hmu ta," an ti a.

³³Tichuan chu tuichhunchhuah chu "Siba" a vuah a; chuvangin chu mi khaw hming chu tun thlengin "Beer-seba" a la ni a.

³⁴Tin, Esauva chu kum 40 mi a nihin, Hit mi Beeria fanu Judithi leh, Hit mi Elona fanu Basemathi nupuiah a nei a:chungte chu Isaaka leh Rebeki thinlung tiretheitute an ni a.

³⁵chungte chu Isaaka leh Rebeki thinlung tiretheitute an ni a.