Read Baibul, Mizo Genesis 27 Bible Online

Genesis 27 - Baibul, Mizo bible

Genesis 27

¹Tin, heti hi a ni a, Isaaka chu a lo tar a, khaw hmu thei lo khawpa a mit a lo thim hnu chuan a fapa upa zawk Esauva chu a ko a, a hnenah, "Ka fapa," a ti a: tin, ani chuan a hnenah, "Heta hi ka awm," a ti a.

²Tin, ani chuan, "Ngai teh, ka tar tawh em a, ka thih ni tur ka hre si lo a.

³Chutichuan tunah hian khawngaih takin i hriamhrei, i thal bawm leh i thal ngul kha keng la, va ramchhuak la, sakhi mi va kahsak rawh:

⁴tin, ka thih hmaa mal ka sawmsakna tur chein ka duhzawng takin chawhmeh tui takah mi siamsak la, ka ei turin ka hnenah rawn la rawh," a ti a.

⁵Tin, Isaakan a fapa Esauva a biak lai chu Rebeki chuan a lo hria a. Tin, Esauva chu sakhi kapa rawn hawn turin ramah chuan a kal ta a.

⁶Tin, Rebeki chuan a fapa Jakoba hnenah, "Ngai teh, i pa chuan i u Esauva hnenah,

⁷'Sakhi mi rawn lak la, ka eia, ka thih hmain LALPA hmaah mal ka sawmsakna tur chein chawhmeh tui takah mi siam rawh,' tia a sawi ka hria.

⁸Chutichuan ka fapa, tunah hian thu ka pek che ang zelin ka thu zawm ang che.

⁹Ran rual zingah va kal la, chuta ta chu kel no pahnih tha tak mi va lak rawh; tichuan chu mi chu a duhzawng takin i pa tan chawhmeh tui takah ka lo siam ang e:

¹⁰tin, a thih hmaa mal a sawmsakna tur chein, a ei turin i pa hnenah i va kalpui tur a ni," tiin a sawi a.

¹¹Tin, Jakoba chuan a nu Rebeki hnenah, "Ngai teh, ka u Esauva chu mi hmul tak a ni a, kei zawng mi mam tak ka ni si a.

¹²Ka pa chuan mi lo dap vel mahna, tichuan ama ngaihin bumtu ang ka lo ni ang a, malsawm ahnekin anchhia indawntir mai ka ni ang a sin," a ti a.

¹³Tin, a nu chuan a hnenah, "Ka fapa, i anchhe dawn tur chu ka chungah awm rawh se: ka thu zawm la, mi va lak mai rawh," a ti a.

¹⁴Tin, a kal a, a va la a, a nu hnenah a rawn kalpui a: tichuan a nu chuan a pa duhzawng takin chawhmeh tui takah a siam a.

¹⁵Tin, Rebeki chuan a fapa upa zawk Esauva silhfen tha tak, ina a hnena awm chu a la a, a fapa naupang zawk Jakoba chu a thuam a;

¹⁶tin, kel no vunte pawh chu a kutah leh a nghawng mam laiah chuan a bel bawk a:

¹⁷tin, chawhmeh tui tak leh chhang a siamte chu a fapa Jakoba kutah a pe a.

¹⁸Tin, ani chu a pa hnenah a kal a, "Ka pa," a ti a: tin, ani chuan, "Heta hi ka awm; ka fapa, tu zawk nge i nih?" a ti a.

¹⁹Tin, Jakoba chuan a pa hnenah, "I fapa upa zawk Esauva ka ni; mi tirh ang khan, ka ti zo ta a: khawngaih takin tho la, mal mi sawmsakna turin thu la, ka sakhi sa hi ei rawh le," a ti a.

²⁰Tin, Isaaka chuan a fapa hnenahh, "Ka fapa, eng tizia nge i va rawn hmu hma teh thut ve le?" a ti a. Tin, ani chuan, "LALPA i Pathian chuan mi hlawhtlintir avang a ni," a ti a.

²¹Tin, Isaaka chuan Jakoba hnenah, "Ka fapa, khawngaih takin lo hnai teh khai, ka lo dap vel teh ang che, ka fapa Esauva i ni meuh na emaw," a ti a.

²²Tin, Jakoba chuan a pa Isaaka chu a va hnaih a; tin, ani chuan a lo dap vel a, "A aw chu Jakoba aw a ni si a, a kutte erawh chu Esauva kut a ni si," a ti a.

²³Tichuan a u Esauva kut angin a kut a hmul avangin amah chu a hre loa: chutichuan mal a sawm ta a.

²⁴Tin, "Ka fapa Esauva ngei i ni maw? A ti a. Tin, ani chuan, "Ni e," a ti a.

²⁵Tin, ani chuan, "Mi han lak hnaih rawh, tichuan mal ka sawmsakna tur chein ka fapa sakhi sa chu ka lo ei ang e," a ti a. Tin, a rawn la hnai a, a ei ta a: uain pawh a laksak a, a in bawk a.

²⁶Tin, a pa Isaaka chuan a hnenah, "Ka fapa, lo hnai la, mi fawp rawh," a ti a.

²⁷Tin, a va hnaih a, a fawp a: tin, ani chuan a silhfen rim chu a hria a, mal a sawmsak a, "Ngai teh, ka fapa rim hi LALPA malsawm ram rim ang a ni:

²⁸Tichuan Pathianin van daifim leh Lei thatna leh, Buh tam tak leh uain tam tak pe che rawh se:

²⁹Hnam hrang hrangten i rawng bawl se la, Chi hrang hrangten chibai buk che rawh se: i unaute chungah lalah awm langin; i nu faten chibai buk che rawh se: Anchhe lawhtu apiang che chu anchhe lawhin awm se la, Malsawmtu apiang che chu malsawmin awm rawh se," a ti a.

³⁰Tin, heti hi a ni a, Isaakan Jakoba mal a sawm zawh veleh Jakoba chu a pa Isaaka hnen ata a chhuak hman chauh a, a u Esauva chu a sa pel a lo hawng a.

³¹Tin, ani pawh chuan chawhmeh tui takah a siam a, a pa hnenah a rawn la ve a; tin, a pa hnenah chuan, "Ka pa, tho la, mal mi sawmsakna turin i fapaa sakhi sa hi ei rawh le," a ti a.

³²Tin, a pa Isaaka chuan a hnenah, "Tunge i nih?" a ti a. Tin, ani chuan, "I fapa, i fapa upa zawk, Esauva ka ni," a ti a.

³³Tichuan Isaaka chu nasa takin a khur chiam a, "Sakhi kapa ka hnena a sa rawn laa, i lo thlen hmaa ka ei zawh veka, mal ka sawm taka kha tu nge ni le? A ni, amah chu malsawmin a awm tawh tho tho ang," a ti a.

³⁴Esauva chuan a pa thusawi chu a hriatin nasa tak leh lungchhe takin a tap ta rawih a, a pa hnenah chuan "Aw ka pa, kei hi, kei pawh hi mal mi sawm ve lul rawh," a ti a.

³⁵Tin, ani chuan, "I nau chuan mi rawn bum a, i malsawmna chu a laksak ta che a ni," a ti a.

³⁶Tin, ani chuan, "A hmingah Jakoba an vuah dik hle lo em ni? Hei vawi hnih mi lan tak hi: ka fa tir nihna chu mi laksak a; tin, ngai teh, tunah hian ka malsawmna mi laksak leh tak hi," a ti a. Tin, amah vekin, "Malsawmna mi la zuahsak lo'm ni? a ti a.

³⁷Tin, Isaaka chuan a chhang a, Esauva hnenah, "Ngai teh, amah chu i lalah ka siam a, a unau zawng zawngte pawh a chhiahhlawh atan ka pe vek a; buh leh uainin ka chawm ta bawk a: ka fapa, nang atan eng nge ka tihsak ang che le?" a ti a.

³⁸Tin, Esauva chuan a pa hnenah, "Ka pa, malsawmna pakhat chauh em ni i neih? Aw ka pa, kei hi, kei pawh hi mal mi sawm ve lul rawh," a ti a. Tin, Esauva chu ring takin a tap ta a.

³⁹Tin, a pa Isaaka chuan a chhang a, a hnenah, "Ngai teh, i awmna tur chu lei thatna hlatah leh, Chung lam ata van daifim hlatah a ni, a awm dawn ni;

⁴⁰I khandaihin a ni, i nun dawn ni, i nau rawng pawh i bawl dawn a ni; Tin, heti hi a ni ang a, i tal chhuah hunah chuan, A nghawngkawl chu i nghawng ata i thing thla tawh ang," a ti a.

⁴¹Tin, a pain mal a sawmsakna avang chuan Esauva chuan Jakoba a haw ta a: tin, Esauva chuan a rilruin, "Ka pa sun ni tur chu a hnai tawh a, chu mi hunah chuan ka nau Jakoba chu ka that mai ang," a ti a.

⁴²Tin, a fapa upa zawk Esauva thu sawi chu Rebeki an hrilh a; tichuan mi a tir a, a fapa naupang zawk Jakoba chu a ko a, a hnenah, "Ngai teh, i u Esauva chuan i chungchang thuah, nangmah tihhlum tumin a inhnem a ni.

⁴³Chutichuan ka fapa tunah ka thu hi awih rawh, tho la, Haran khuaa ka nuta Labana hnenah tlan bo rawh;

⁴⁴i u thinrimna hi a reh hma loh chuan a hnenah ni engemaw zat lai va awm rih rawh;

⁴⁵i u thinurna hi i chunga a reh a, a chunga i thiltih hi a theihnghilh hunah chuan mi ka tir ang a, chuta ta chu ka rawn hruai chhuahtir ang che: eng atan nge ni khatah in pahnihin ka chan ang che u?" a ti a.Tin, Rebeki chuan Isaaka hnenah, "Hetha fanute avang hian nun hi ka ning em mai: Jakoba hian he mi ram nula, he'ng ang Hetha fanuteho zinga mi hi nupui a neih leh ve lek phei chuan ka tan nun hi eng nge sawt ang?" a ti a.

⁴⁶Tin, Rebeki chuan Isaaka hnenah, "Hetha fanute avang hian nun hi ka ning em mai: Jakoba hian he mi ram nula, he'ng ang Hetha fanuteho zinga mi hi nupui a neih leh ve lek phei chuan ka tan nun hi eng nge sawt ang?" a ti a.