Read Baibul, Mizo Genesis 28 Bible Online

Genesis 28 - Baibul, Mizo bible

Genesis 28

¹Tichuan Isaaka chuan Jakoba chu a ko a, mal a sawm a, thu a pe bawk a, a hnenah, "Kanaan ram nulaho zinga mi hi nupuiah i nei tur a ni lo.

²Tho la, Paddan-aram rama i nu leh pa Bethuela inah kal la, chuta mi chu i nu nuta Labana fanute zinga mi nupuiah va nei rawh.

³Tin, Pathian Engkimtitheia chuan mal sawm chein, hnam hrang hrang tam tak i lo nih theihna'n chi tam tak thlahtir chein, tipung che rawh se;

⁴i mikhualna ram, Pathianin Abrahama a pek hi, i luahna'n Abrahama malsawmna chu dawntir bawk che rawh se, nang leh i thlahte pawh," a ti a.

⁵Tichuan Isaaka chuan Jakoba chu a kal botir a: tin, Paddan-aram rama Jakoba leh Esauva nu Rebeki nuta Suri mi Bethuela fapa, Labana hnenah chuan a kal ta a.

⁶Tin, Esauva chuan Isaakan Jakoba chu mal a sawm a, nupui nei turin Paddan- aram ramah a kal botir tih leh, mal a sawm laia, "Kanaan ram nulaho zinga mi hi nupuiah i nei tur a ni lo," tiin thu a pe tih leh

⁷Jakoba'n a nu leh a pa thu awihin Paddan-aram ramah a kal ta tih a hria a:

⁸tichuan Esauva chuan Kanaan ram nulate chuan a pa Isaaka lung an tiawi lo tih a hre ta a;

⁹tichuan Esauva chu Ismaela hnenah a va kal a, Abrahama fapa Ismaela fanu Mahalathi Nebaiotha farnu chu a nupui atan a nupui neihsate bakah a va neih belhchhah leh a.

¹⁰Tin, Jakoba chu Beer-seba atangin a chhuak a, Haran khaw lam a pan ta a.

¹¹Tin, khawi lai hmun emaw a han thleng hlauh a, ni a tlak tawh avangin chutah chuan a riak ta a; tin, chu mi hmuna lung pakhat chu a la a, a lukhamah a dah a, chu mi hmunah chuan muhil turin a mu ta a.

¹²Tin, mumang a nei a, ngai teh, lei chungah hian leilawn a lo indawh a, a chhip chuan van a thleng a: tin, ngai teh, a chungah chuan Pathian vantirhkohte an chhoin an chhuk a.

¹³Tin, ngai teh, a chhipah chuan LALPA a ding a, "Kei hi LALPA, i pu Abrahama Pathian leh Isaaka Pathian chu ka ni: i mutna lei kha nang leh i thlahte ka la pe ang che u;

¹⁴tin, i thlahte chu leia vaivut zatin an awm ang a, thlang lamah te, chhak lamah te, hmar lamah te, chhim lamah te i darh zau vang a: tin, nangmahah leh i thlahah chuan khawvela hnam tin an la thawveng ang.

¹⁵Tin, ngai teh, i hnenah ka awm a, i kalna apiangah ka veng zel ang chia, he ramah hian ka hruai kir leh ang che; i hnena ka sawi hi ka tih hma loh chuan ka thlahthlam dawn lo che a ni," a ti a.

¹⁶Tin, Jakoba hu a muhil a han harh a, "He hmunah hian LALPA chu a awm ngei mai; ka lo hre si lo a," a ti a.

¹⁷Tichuan a hlau a, "He hmun hi a va hlauhawm em! Hei hi hmun dang a nih loh hi, Pathian in a lo nih hi le, hei hi van kawngka a lo nih hi," a ti a.

¹⁸Tin, Jakoba chu zing takah a tho a, lung a lukhama a dah chu a la a, lungphun atan a phun a, a chhipah chuan sahriak a leih a.

¹⁹Tin, chu mi hmun hmingah chuan Bethel a vuah a: a khaw hming erawh chu a tirah chuan Luz a ni.

²⁰,21 Tin, Jakoba chua, "Ka pa ina thlamuang taka ka hawn lehna turin Pathian ka hnena a awm a, he ka kalna kawngah hian mi ven a, ei tur chhang leh sin tur silhfen mi pek dawn chuan, LALPA chu ka Pathian a ni ang a,

²¹,20 Tin, Jakoba chua, "Ka pa ina thlamuang taka ka hawn lehna turin Pathian ka hnena a awm a, he ka kalna kawngah hian mi ven a, ei tur chhang leh sin tur silhfen mi pek dawn chuan, LALPA chu ka Pathian a ni ang a,he lung, lungphun atana ka phun pawh hi, Pathian in a ni ang: tin, i mi pek tur zawng zawngah chuan sawma pakhat chu ka pe ngei ngei ang che," tiin thu a tiam ta a.

²²he lung, lungphun atana ka phun pawh hi, Pathian in a ni ang: tin, i mi pek tur zawng zawngah chuan sawma pakhat chu ka pe ngei ngei ang che," tiin thu a tiam ta a.