Read Baibul, Mizo Genesis 37 Bible Online

Genesis 37 - Baibul, Mizo bible

Genesis 37

¹Tin, Jakoba chu a pa mikhualna ram, Kanaan ramah chuan a awm ta a.

²Heng hi Jakoba thlahte chanchin a ni. Josefa chu kum 17 mi a nihin, a ute nen ran rual an thlah a; ani chu naupang a la ni a, a pa nupuite Bilhaii leh Zilpaii fapate hnenah a awm a: tin, Josefa chuan an sual thuthang an pa hnenah a thlen a.

³Tin, Israela chuan Josefa chu a tar lam fa a nih avangin, a fate zawng zawng ai chuan a hmangaih zawk a: tichuan kawrfual ze hrang hranga zia a siamsak a.

⁴Tin, an pa chuan ani chu a ute zawng zawng aiin a hmangaih zawk tih a ute chuan an lo hre ta a; tichuan ani chu an haw ta hle a, tawng kam tha reng reng a chungah an rawlh thei ta lo a.

⁵Tin, Josefa chuan mumang a nei a, a ute hnenah chuan a hrilh a: tichuan ani chu an haw lehzual ta a.

⁶Tin, ani chuan an hnenah, "Khawngaih takin ka mumang thu hi ngaithla teh u:

⁷ngai teh u, loah chuan buhphalte kan lo tel a, tin, ngai teh u, ka buhphal chu a lo tho a, a ding ta luah a; tin, ngai teh u, in buhphalte chuan an rawn hual vel a, ka buhphal chu chibai an buk hlawm a," a ti a.

⁸Tin, a ute chuan a hnenah, "Nang tehchai hian kan chungah ro i rel tehlul ang maw? Nang tehchai hian kan chungah thu i nei tehlul ang maw?" an ti a. Tichuan a mumang avang leh a thusawi avang chuan amah chu an haw lehzual sauh a.

⁹Tin, mumang dang a nei leh a, a ute chu a hrilh leh a, "Ngai teh u, mumang ka nei leh ta a; ngai teh u, ni te, thla te, arsi sawm leh pakhatte khian chibai mi lo buk zuk nia maw le," a ti a.

¹⁰Tin, a pa chu a hrilh a, a uteho pawh; tichuan a pa chuan a zilh a, a hnenah, "Mumang i neih hi eng mumang nge maw ni? Kei leh i nu leh i ute hian lei siin chibai kan rawn buk tehlul dawn che maw?" a ti a.

¹¹Tin, a uten ani chu an itsik a; a pa erawh chuan a thusawi chu a rilruin a vawng reng a.

¹²Tin, a ute chu Sekem-ah chuan an pa ran rual chu thlahin an kal a.

¹³Tin, israel chuan Josefa hnenah, "I uten Sekem-ah alawm maw ran rual chu an thlah? Lo kal teh, an hnenah ka tir ang che, a ti a. Tin, ani chuan a hnenah mi tir ta che," a ti a.

¹⁴Tin, ani chuan a hnenah, "Va kal ta la, i ute chu an dam emaw, ran rualte pawh an dam emaw va chian ta la, chanchin min rawn hrilh leh ang che," a ` ti a. Chutichuan Hebron ruam ata chu a tir chhuak a, tin, ani chuan Sekem chu a va thleng a.

¹⁵Tin, mi tuin emaw amah chu a hmu a, ngai teh, phulah chuan a vak vak a: tichuan mi chuan, "Engnge i zawn le?" tiin a zawt a.

¹⁶Tin, ani chuan, "Ka ute ka zawng a ni: khawngaih takin ran rual an thahna chu mi hrilh teh khai," a ti a.

¹⁷Tin, mi chuan, "Heta tangin an chhuah tak kha, 'Dothan-ah i kal ang u,' an tih chu ka hria," a ti a. Dothan-ah chuan a va hmu a.

¹⁸Tin, anni chuan hla tak atangin an lo hmu a, tichuan an kiang hnai a thlen hmain, amah thah thu an phiar ta a.

¹⁹Tin, "En teh u, mang neia chu a lo kal saw. Haw u, that i la, khuarkhurum pakhatah i thlak ang u khai, tin, 'Sakawlhin a seh ta,' kan ti dawn nia.

²⁰Tichuan a mangte chu engtin nge a awm kan la hre mai ang," an inti hlawm a.

²¹Tin, Reubena chuan chu chu a lo hria a, an kut ata a chhanchhuak a; "A thah em chu i that suh ang u," a ti a.

²²Tin, Reubena vek chuan a pa hnena a hruai lehna turin an kut ata chu a chhanchhuah theihna'n an hnenah chuan, "Thisen chu chhuah suh u; thlalera khuarkhurumah hian thlak u la, kut zawng a chungah thlak suh u," a ti a.

²³Tin, heti hi a ni a, Josefa chuan a ute hnena va thlen chuan, Josefa chu a kawrfual, a kawrfual ze hrang hranga zia a hak chu an lo hlihsak a;

²⁴tin, an hruai a, khuarkhurumah chuan an thlak ta a: khuarkhurum chu a ruak a, tui awm tawh lo a ni a.

²⁵Tin, chaw ei turin an han thu hlawm a: tin, an han dak a, an en a, tin, ngai teh, ismael khualzinho Gilead ram atanga an sanghawngseia englo rimtui leh thing hnai damdawi leh murra phura Aigupta rama zuk kal turte an lo kal a.

²⁶Tin, Juda chuan a unaute hnenah, "Kan nau kan thah a, a thisen chhuak kan zep chuan eng nge hnenhnanna awm ang?

²⁷Hawh u, a chunga kut thlak loin, ismael-ho hnenah sawn i hralh zawk ang u; amah hi kan nau, kan tisa ngei a ni si a," a ti a. Tin, a unaute chuan a thu chu an zawm ta a.

²⁸Tin, Midian-ho sumdawngte an lo kal a; tichuan Josefa chu khuarkhurum ata chu an kai chhuak a, ismael-hote hnenah chuan, Josefa chu tangka sawmhnihah an hralh ta a. Tin, Jasefa chu Aigupta ramah an hruai ta a.

²⁹Tin, Reubena chu khuarkhurumah a lo kal leh a, tin, ngai teh, Josefa chu khuarkhurumah chuan a lo awm ta loa; tichuan a silhfente a pawt thler ta a.

³⁰Tin, a naute hnenah a kal leh a, "Taitea kha a awm ta lo; kei hi khawiah nge ka kal tak ang le aw?" a ti a.

³¹Tin, Josefa kawrfual chu an la a, kelpa an talh a, a thi-ah chuan kawrfual chu an hnim a:

³²tin, kawrfual ze hrang hranga zia chu an thawn a, an pa hnenah chuan an rawn la a; tin, "Hei hi kan hmu ngawt a, i fapaa kawrfual a ni nge ni lo en teh," an ti a.

³³Tin, ani chuan a lo hre mai a, "Ka fapaa kawrfual a nih hi; sakawlhin a seh ta zuk nia le; Josefa chu matheiloin pawh sawm vekin a awm a ni ngei ang," a ti a.

³⁴Tichuan Jakoba chuan a silhfente a pawt thler a, saiip puan a feng a, ni rei tak a fapa chu a sun a.

³⁵Tin, a fapate zawng zawng leh a fanute zawng zawng chu amah thlamuan turin an tho a; nimahsela ani chuan thlamuan a duh loa; "Lusun chungin thlanah ka fapa hnenah chuan ka liam dawn e," a ti a. tichuan a pa chu amah ngaiin a tap thin a.Tin, Midian-ho chuan Josefa chu Aigupta ramah an luhpui a, Pharaoa hnuaia hotu pakhat, vengtu pawl hotu Potiphara hnenah chuan an hralh a.

³⁶Tin, Midian-ho chuan Josefa chu Aigupta ramah an luhpui a, Pharaoa hnuaia hotu pakhat, vengtu pawl hotu Potiphara hnenah chuan an hralh a.