Read Baibul, Mizo Genesis 38 Bible Online

Genesis 38 - Baibul, Mizo bible

Genesis 38

¹Chu mi lai chuan heti hi a ni a, Juda chu a unaute hnen ata a chhuak a, Adullam mi pakhat a hming Hira chu a zuk bel ta a.

²Tin, Juda chuan chutah chuan Kanaan mi pakhat a hming Sua fanu a hmu a; tin, ani chu a nei a, a pawl ta a.

³Tichuan a rai a, fapa a hring a; tin, Judan a hmingah chuan Era a sa a.

⁴Tin, a rai leh a, fapa a hring leh a; tin, a nuin a hmingah chuan Onana a sa a.

⁵Tin, fapa a hring leh pek a, a hmingah chuan Sela a sa a: chu mi chu a hrin lai chuan Juda chu Chezeb khuaah a awm a.

⁶Tin, Juda chuan a fa tir Era chu nupui a neihsak a, a hming chu Tamari a ni a.

⁷Tin, Juda fa tir Era chu LALPA mithmuhin mi sual a ni a; tichuan LALPA'n ani chu a tihlum ta a.

⁸Tin, Juda chuan Onana hnenah, "I u nupui chu pawl la, pasalte unau tih tur chu tihsak la, i u tan chuan chi thlahsak rawh," a ti a.

⁹Tin, Onana chuan chi thlah tur chu ama thlah a ni dawn lo tih a hria a; tichuan heti hi a ni a, a u nupui a pawl apiangin, a u tan chi a thlahsak lohna turin leiah chuan a titla thin a.

¹⁰Tin, a thiltih dan chu LALPA mithmuhah chuan sual tak a ni a: tichuan ani pawh chu a tihlum ta a.

¹¹Tin, Juda chuan a monu Tamari hnenah chuan, "Ka fapa Sela hi a puitlin hma loh chuan i pa in lamah pasal nei loin lo awm rih ang che," a ti a. "Chutilochuan ani pawh hi a ute angin a thi dah ang e," a ti a ni. Tichuan Tamari chu a pa in lamah chuan a va awm ta a.

¹²Tin, a nakinah chuan Sua fanu Juda nupui chu a thi a; tin, Juda chuan a ngaih a lo reh a, Timna khuaah a beram hmul mettute hnen lamah chuan amah leh a thian Adullam mi Hira chu an chho ta a.

¹³Tin, miin Tamari chu, "I pu chu a beram hmul met turin Timna khuaah a chho dawn," tiin an hrilh a.

¹⁴Tichuan ani chu a pasal sunna silhfente chu a hlip a, inkhuhna puanin a inkhuh a, a intuam tlat a, Timna khaw kawnga Enaim kulh kawngkaah chuan a lo thu a; Sela chu a puitling tawh si a, a pa chuan nupuiah a neihsak lo zo a ni tih a hria a ni.

¹⁵Tin, Juda chuan ani chu a hmuh chuan nawhchizuarah a ruat a; a hmai a inkhuh tlat si a.

¹⁶Tichuan kawng sira hmeichhe lam chu a va pan a, "Hawh, khawngaih takin i mu dun ang," a ti a: a mo kha a ni tih a hre si lo a. Tin, ani chuan, "Mi mutpui chuan eng nge mi pek ang?" a ti a.

¹⁷Tin, ani chuan, "Ran rual zinga mi kelno ka thawn ang che," a ti a. Tin, ani chuan, "Chu chu i rawn thawn hmaa lo hren tur eng emaw tal mi pe ang em?" a ti a.

¹⁸Tin, ani chuan, "Hren ter eng nge ka pek ang che?" a ti a. Tin, ani chuan, "I hming nemna leh i hrui, i tiang ken nen khan," a ti a. Tichuan a pe a, a mutpui ta a, tin a lakah chuan fa a pai ta a.

¹⁹Tin, a tho a, a inkhuhna puan chu a hlip a, a hmeithaina silhfente chu a inbel leh ta a.

²⁰Tin, a thil hren chu hmeichhe kut ata la turin a thianpa Adullam mi kutah chuan kel no chu a thawn a: nimahsela ani chuan amah chui a va hmu zo si lo a.

²¹Chutichuan hmeichhe awmna hmuna mite hnenah chuan, "Khawng sira Enaim nawhchizuar awm kha khawiah nge a awm tak?" tiin a zawt a. Tin, anni chuan, "Nawhchizuar reng reng hetah an awm lo e," an ti a.

²²Tin, Juda hnena chuan a kir leh a, "Amah chu ka hmu zo lo, a hmuna mite pawhin, 'Nawhchizuar reng reng hetah an awm lo,' an ti bawk a," a ti a.

²³Tin, Juda chuan, "Nei hlen mai rawh se, chutilochuan kan mualpho dah ang e; ngai teh, he kel no hi ka thawn a, amah i hmu zo si lo a," a ti a.

²⁴Tin, thla thum emaw lai chinah chuan miin Juda chu, "I monu Tamari chuan tlangval a ngai a; chu lo pawh chu, ngai teh, sawn a pai nghe nghe a sin," tiin an hrilh a. Tin, Juda chuan, "Hruai chhuak u la, halhlumin awm rawh se," a ti a.

²⁵Tin, an hruai chhuah chuan Tamari chuan, "Heng thil neitupa lakah hian a ni, nau ka pai ni," tiin a pu hnenah chuan mi a tir ta a: amah vekin, "Khawngaih takin he'ng hming nemna te, hrui te, tiang te hi tu ta nge ni, en chiang teh khai," a ti bawk a.

²⁶Tin, Juda chuan chung thil chu a ta a ni tih a lo hria a, "Ani chu ka aiin a fel zawk a ni; ka fapa Sela ka neihtir ta si lo a," a ti a. Tin, Juda chuan a ni chu a pawl leh ta hauh lo a.

²⁷Tin, nau a vei lai chuan heti hi a ni a, ngai teh, a chhulah chuan phir an lo awm a.

²⁸Tin, heti hi a ni a, nau a vei chuan pakhat chuan a kut a rawn zen chhuak a: tichuan nau chhar mi chuan, "Hei hi a chhuak hmasa zawk a nih hi," tiin a chelh a, a kutah chuan la sen a buntir a.

²⁹Tin, heti hi a ni a, a kut chu a lak luh leh lai chuan, ngai teh, a unau chu a lo chhuak ta a: tichuan nau chhar mi chuan, "Engati nge chhuahna i insiam ni?" a ti a, chuvangin a hmingah chuan Pereza an sa a.Tin, chu mi hnuah chuan a unau, a kuta la sen bun kha a lo chhuak leh a: a hmingah chuan Zera an sa a.

³⁰Tin, chu mi hnuah chuan a unau, a kuta la sen bun kha a lo chhuak leh a: a hmingah chuan Zera an sa a.