Read Baibul, Mizo Genesis 39 Bible Online

Genesis 39 - Baibul, Mizo bible

Genesis 39

¹Tin, Josefa chu Aigupta ramah an hruai chhuk a; tin, Pharaoa hnuaia hotu pakhat, vengtu pawl hotu, Aigupta mi, Potiphara chuan chuta rawn hruai chhuktu Ismael-hote kut ata chu a lei ta a.

²Tin, LALPA chu Josefa hnenah a awm a, tichuan ani chu mi vannei tak a ni a; tin, a pu Aigupta mi inah chuan a awm a.

³Tin, a pu chuan LALPA chu a hnenah a awm a, a thiltih apiang LALPA'n a kutah a hlawhtlintir tih a lo hre ta a.

⁴Tichuan Josefa chuan a pu mit a tlung a, a rawng a bawl thin a: tin, ani chuan a chhungte chungah chuan hotuah a siam a, a neih zawng zawng a kutah a dah ta vek a.

⁵Tin, heti hi a ni a, inah chuan hotuah a siam a, a neih zawng zawng chunga hotua a siam a chinah chuan Josefa avangin LALPA chuan Aigupta mi chhungte chu mal a sawm ta a; in lam leh ram lama a neih zawng zawng chu LALPA'n mal a sawm thin a.

⁶Tichuan a neih zawng zawng chu Josefa kutah a dah tlat a, a hnena thil awm reng reng chu a hriatpui hauh lo a, ama chaw ei chauh lo chu a hre lo. Tin, Josefa chu mi tlawntlai tha tak a ni a, a hmel pawh a tha hle a.

⁷Tin, chung hnuah chuan heti hi a ni a, a pu nupui chuan Josefa chu a ngaihmelh a; tin, "Mi mutpui rawh," a ti a.

⁸Ani erawh chuan a duh lo a, a pu nupui hnenah chuan, "Ngai teh, ka pu chuan he inah hian ka hnenah eng eng nge awm a hre si lo a, a neih zawng zawng ka kutah hian a dah vek a;

⁹he inah hian ka aia lian zawk tumah an awm loa; a nupui i nih avangin nangmah chauh lo chu ka lakah engmah ui a nei hek lo: chutichuan engtin nge he sual lian tak hi tiin Pathian chunga thil ka tihsual theih ang?" a ti a.

¹⁰Tin, heti hi a ni a, ni tin maiin Josefa chu be thin mah se la, amah mutpui lam thu emaw ama hnena awm lam thu emaw a pawm duh lo a.

¹¹Tin, chu mi lai vel chuan heti hi a ni a, a hna chu thawk turin in chhungah a va lut a; tin, chutah chuan an in awm reng reng tumah an awm lo a.

¹²Tichuan ani chuan, "Mi mutpui rawh," tiin a silhfenah a lo man a: tin, ani chuan a silhfen chu a kutah chuan a hnutchhiah a tlansan a, a chhuak ta daih a.

¹³Tin, heti hi a ni a, a silhfen chu a kuta hnutchhiahin a tlan chhuak ta tih a hriat veleh,

¹⁴a in awmte chu a ko a, an hnenah, "En teh u, min timualpho turin Hebrai mi pakhat kan hnena a hruai luh tak hi; mi mutpui tumin ka hnenah hian a lo lut a, tichuan aw ring takin ka au ta a ni:

¹⁵tin, heti hi a ni a, aw chhuahin ring takin ka au tih a hriat veleh ka kiangah a silhfen hi a tlansan a, a chhuak ta daih a ni," a ti a.

¹⁶Tin, Josefa pu a lo hawn hma loh chuan a silhfen chu a kiangah a lo dah reng a.

¹⁷Tin, a hnenah hetiang thu hi a lo sawi a, "Hebrai chhiahhlawh kan hnena i rawn hruai kha, mi tihmualpho tumin ka hnenah a lo lut a:

¹⁸tin, heti hi a ni a, aw chhuaha ka au veleh ka kiangah a silhfen hi hnutchhiahin a tlan chhuak ta a ni," a ti a.

¹⁹Tin, heti hi a ni a, Josefa pu chuan a nupuiin a hnena, "I chhiahhlawh hian heti hian mi ti," tia a thusawi chu a hriat chuan a thin chu a lo ur ta thut a.

²⁰Tichuan Josefa pu chuan ani chu a hruai a, tan in, lal mi tang phuara an awmnaah chuan a khung ta a: tichuan chuta tan inah chuan a awm ta a.

²¹Nimahsela LALPA chu Josefa hnenah a awm zel a, a chungah ngil a nei a, tan in vengtu pawh a khawngaihtir a.

²²Tichuan tan in vengtu chuan tan ina tangho awm zawng zawng chu Josefa kutah a kawltir ta vek a; tichuan chuta an tih apiang chu Josefa chu a titu a ni zel thin a.LALPA chu Josefa hnenah a awm a, a thiltih apiang chu LALPA chuan a hlawhtlintir thin avangin tan in vengtu chuan a kuta thil awm reng reng chu a en duh ta lo a.

²³LALPA chu Josefa hnenah a awm a, a thiltih apiang chu LALPA chuan a hlawhtlintir thin avangin tan in vengtu chuan a kuta thil awm reng reng chu a en duh ta lo a.