Read Baibul, Mizo Genesis 40 Bible Online

Genesis 40 - Baibul, Mizo bible

Genesis 40

¹Tin, chung thil hnuah chuan heti hi a ni a, Aigupta lal uain petu leh a chhang siamtu te chuan an pu Aigupta lal chu an tivui a.

²Tichuan Pharaoa chu a chhiahhlawh hotu pahnih chungah, a uain pe hotu ber chungah leh a chhang siam hotu ber chungah chuan a thinur ta a.

³Tichuan vengtu pawl hotu inah, tan in, Josefa phuara a awmnaah chuan an tantir ta a.

⁴Tin, vengtu pawl hotu chuan Josefa chu anmahni a enkawltir a, tichuan ani chuan an rawng a bawl ta a: tin, ni engzat emaw lai an tang rih a.

⁵Tin, tan ina phuara awm, Aigupta lal uain petu leh chhang siamtu chuan an pahnihin zan khatah mumang awmze hrang ve ve an nei a.

⁶Tin, atuk zingah chuan Josefa chu an hnenah a va lut a, anni chu a va hmu a, tin, ngai teh, an lo lungngai hle a.

⁷Tichuan ani chuan, "Engtizia nge vawiin chu lungngai hmel in va pu ve?" tiin Pharaoa chhiahhlawh hotu, a pu ina tang vete chu a zawt a.

⁸Tin, anni chuan a hnenah "Mumang kan nei a, min hrilhfiah thei tumah an awm si lo a ni," an ti a. tin, Josefa chuan an hnenah "Mumang hrilhfiahnate chu Pathian ta a ni vem ni? Khawngaih takin mi han hrilh teh u," a ti a.

⁹Tichuan uain pe hotu ber chuan a mumang chu Josefa a hrilh a, a hnenah, "Ka mumangah chuan ngai teh, ka hmaah hian grep hrui a lo awm a;

¹⁰grep hruiah chuan peng pathum a awm bawk a: tin, chawr chhuak angin a lo awm a a parte a lo chhuak a; a par bawrte chuan grep hminte a rawn chhuah ta a:

¹¹tin, Pharaoa no chu ka kutah hian a lo awm a; tichuan grep rahte chu ka lo a, Pharaoa noah chuan ka sawr a, no chu Pharaoa kutah ka lo pe a," a ti a.

¹²Tin, Josefa chuan a hnenah, "Hei hi a hrilhfiahna a ni: peng pathum chu ni thum a ni;

¹³tun a chin ni thumah chuan Pharaoan i lu a chawi kang ang a, i hnathawh chu a thawhtir leh ang che: tichuan a uain petu i nih laia i pek dan pangngai ang khan Pharaoa no chu a kutah i pe leh dawn a nih chu.

¹⁴Amaherawhchu i chan that leh hunah chuan mi han hre reng la, khawngaih takin khawngaihna ka chungah rawn lantir la, Pharaoa hnenah ka chanchin han sawi la, he in ata hi mi hruai chhuak ang che:

¹⁵Hebrai-ho ram ata min ruka mi ruk bo ka ni a: he ramah pawh hian rip chhunga mi khungna khawp engmah ka tisual hek lo," a ti a.

¹⁶Chhang siamtu chuan hrilhfiahna chu a tha tih a hriatin Josefa hnenah chuan, "Kei pawh mumang ka nei a, ngai teh, chhang var fawng pathumin ka lo chhipchhuan a:

¹⁷tin, fawng chungnung berah chuan Pharaoa chaw, chhang siamtu siam, chi tinreng hi a lo awm a; tin, chung chu savaten ka fawng chhipchhuan ata chu an lo ei noh noh a," a ti a.

¹⁸Tin, Josefa chuan a chhang a, "Hei hi a hrilhfiahna a ni: fawng pathum chu ni thum a ni;

¹⁹tun achin ni thumah chuan Pharaoan i taksa ata i lu a chawi kang ang a, thing lerah a khai ang che; tichuan savaten i sa chu an ei noh noh dawn a nih chu," a ti a.

²⁰Tin, heti hi a ni a, a ni thum ni, Pharaoa pian champhaphak niah chuan, ani chuan a chhiahhlawh zawng zawngte tan ruai a theh a: tin, a chhiahhlawhte zinga mi uain pe hotu ber lu leh chhang siam hotu ber lu a chawi kang ta a.

²¹Josefan anmahni a hrilhfiah ang takin, uain petuah a tantir leh a; tichuan no chu Pharaoa kutah chuan a pe ta a:

²²Chhang siam hotu ber erawh chu a khai hlum ta a.Nimahsela uain pe hotu ber chuan Josefa chu a hre reng ta awzawng lo a, a theihngilh ta mai a.

²³Nimahsela uain pe hotu ber chuan Josefa chu a hre reng ta awzawng lo a, a theihngilh ta mai a.