Read Baibul, Mizo Genesis 42 Bible Online

Genesis 42 - Baibul, Mizo bible

Genesis 42

¹Tin, Jakoba'n Aigupta ramah buh a awm tih a lo hre ta a, tichuan Jakoba chuan a fapate hnenah, "Engati nge in inen mai mai ni?" a ti a.

²Tin, amah vek chuanin, "Ngai teh u, Aigupta ramah buh a awm tih ka lo hre ta: thi loa kan nun chhuah theihna turin chutah chuan zuk kal u la, chuta ta chu kan tan zuk lei rawh u khai," a ti a.

³Tichuan Josefa uteho sawm chu Aigupta ram ata buh lei turin an zuk kal ta a.

⁴Josefa nau Benjamina erawh chua ute hnenah chuan Jakoba'n a kaltir ve lo a; "Tawhsual a zuk tawk hlauh dah ang e," a ti a ni.

⁵Tichuan Israela fapate chu mi kalho zingah chuan buh lei turin an kal ve a: Kanaan ramah pawh tam a tla ve si a.

⁶Tin, Josefa chu Aigupta ram chungah chuan hotu a ni a; amah chu mi rama mi zawng zawng hnenah a hralhtu a ni: tichuan Josefa uteho chu an lo kal a, lei siin amah chibai an buk hlawm a.

⁷Tin, Josefa chuan a uteho chu a lo hmu a, anni chu a lo la hre hlawm a, nimahsela an lakah chuan chi dang angin a insiam a, ram takin a bia a; tin, an hnenah, "Khawia lo kal nge in nih?" a ti a. Tin, anni chuan, "Buh lei turin Kanaan ram atanga lo kal kan ni," an ti a.

⁸Tin, Josefa chuan a uteho chu a lo la hria a, anni erawh chuan ani chu an hre si lo.

⁹Tin, Josefa chuan anmahni chungchang thu mumanga a hmuhte kha a lo hre chhuak ta a, an hnenah, "Enthlatute in nih hi; ram ruahzia en turin in lo kal a nih hi le," a ti a.

¹⁰Tin, anni chuan a hnenah, "Ka pu, ni suh e, i chhiahhlawhte hi buh lei tura lo kal kan ni a sin.

¹¹Mi pakhat fa vek kan ni; mi dik tak kan ni a, i chhiahhlawhte hi enthlatute kan ni awzawng lo e," an ti a.

¹²Tin, ani chuan an hnenah, "Ka awih lo, ram zuahzia en tura lo kal in nih hi maw," a ti a.

¹³Tin, anni chuan, "Keini i chhiahhlawhte hi unau sawm leh pahnih, Kanaan rama awm mi pakhat fa kan ni' tin, ngai teh, kan tlum ber chu tunah chuan kan pa hnenah a awm a, pakhat chu a awm ta lo a ni," an ti a.

¹⁴Tin, Josefa chuan an hnenah, "Enthlatute in ni,' ka tih che u kha, in nih ngei hi:

¹⁵heti hian fiahin in awm ang: in tlum ber chu heta a lo kal loh chuan Pharaoa nunna chhalin heta ta hi in chhuak lo ang ka ti che u a ni.

¹⁶Nangmahniah thutak a awm nge awm lo in thu fiahna'n in zinga pakhat tir u la, in nau chu rawn hruai rawh se, nangni erawh chu phuarin in lo awm rih ang: chutilochuan Pharaoa nunna chhalin, 'enthlatute in ni ngei mai,' ka ti dawn che u a ni," a ti a.

¹⁷Tin, an za chuan ni thum a tanhotir hlawm a.

¹⁸Tin, a ni thum ni-ah chuan Josefan an hnenah, "Hei hian ti u la in nung ang, Pathian ka tih si a;

¹⁹mi dik tak in nih chuan in unau zingah hian pakhat phuarin awm rawh se; nangni erawh chu kal ta u la, in chhungteho tam tan chuan buh phur rawh u:

²⁰tin, in tlum ber chu ka ka hnenah rawn hruai ang che u; chutichuan in thu chu a fiah ang a, in thi dawn lo nia," a ti a. Tichuan chutiang chuan an ti ta a.

²¹Tin, anni chuan, "Kan nau chunga kan thiltih kha kan thiam lo tak tak a nih hi, khawngaih tura min ngen tawk tawk laia a thinlung manganzia hmu reng chunga kan ngaihthlaksak duh loh kha; chuvangin he manganna hian min tlakbuak a nih hi," an inti a.

²²Tin, Reubena chuan, "'Naupang chungah thil tisual suh u,' tiin in hnenah ka sawi lo em ni? In ngaithla duh lo a nih kha: chuvangin ngai teh u, a thisen phuba chu an la a nih hi," tiin anni chu a chhang a.

²³An karah tawng letlingtu a awm avangin Josefan an thusawi chu a hria tih an hre lo.

²⁴Tin, ani chuan a leh hawisan a, a va tap ta a; tin, an hnenah a kir leh a, anni chu a bia a, an zing ata Simeona chu a hruai hrang a, an mithmuhah chuan a phuar ta a.

²⁵Tin, Josefa chuan an bawmte chu buha tikhat tur leh an tangkate chu an ipa dah leh theuh tur leh kalkawng atan ei tur pe turin thu a pe a: tichuan chutiang chuan an tihsak ta a.

²⁶Tin, an buh chu an sabengtungte chu an phurhtir a, chuta ta chu an chhuak ta a.

²⁷Tin, an zinga mi pakhatin riahbukah a sabengtung chaw pe tura a ip a han hawn chuan a tangka chu a hmu ta mai a; ngai teh, a ip rawng bulah chuan a lo awm ta a.

²⁸Tichuan a unaute hnenah chuan, "Ka tangka kha an lo dah leh a nih hi maw le; ngai teh u, ka ipa hi a lo awm reng mai," a ti a: tin, an thin a thawng zawk a, "Pathianin hetia min tih hi engtizia nge ni aw?" tiin khur chungin an inen ta hlawm a.

²⁹Tin, Kanaan rama an pa Jakoba hnen chu an lo thleng a, an chunga thil thleng zawng zawng chu an hrilh a;

³⁰Chu mi ram hotu chuan ram takin min bia a, ram enthlatuah min ruat a.

³¹Tin, keini chuan a hnenah, 'Mi dik tak kan ni; enthlatu kan ni awzawng lo e:

³²unau sawm leh pahnih kan ni, kan pa fapate kan ni vek a; pakhat chu a awm ta lo a, kan tlum ber chu tunah hian Kanaan ramah kan pa hnenah a awm a ni,' kan ti a.

³³Tin, chu mi, an ram hotu chuan kan hnenah, 'Heti hian mi dik tak in ni tih ka la hria ang; in unau pakhat ka hnenah hnutchhiah u la, in chhungteho tam tan chuan buh phur u la, kal tawh rawh u:

³⁴tin, in tlum ber chu ka hnenah rawn hruai ang che u: tichuan enthlatu in ni lo a, mi dik tak in ni zawk tih ka hria ang: chutichuan in unaupa hi ka pe leh ang che u a, he ramah hian in sumdawng dawn nia,' min ti a," an ti a.

³⁵Tin, heti hi a ni a, an ipte chu an bun ruah laiin, ngai teh, an tangka fun theuh chu an ipah chuan a lo awm ta theuh va: tin, anniho leh an pa chuan an tangka funte chu an hmuh chuan an hlau hle a.

³⁶Tin, an pa Jakoba chuan an hnenah, "Nangni hian ka fate i chantir a nih hi: Josefa a awm tawh lo a, Simeona pawh a awm tawh hek lo, Benjamina lam pawh hruai bo in tum leh zel a: chung thil zawng zawng chuan mi tlakbuak a nih hi," a ti a.

³⁷Tin, Reubena chuan a pa hnenah, "I hnena ka rawn hruai leh loh chuan ka fapate pahnih hi that mai ang che: ani chu ka kutah mi kawltir la i hnenah ka rawn hruai leh mai ang," tiin a sawi a.Tin, ani chuan, "Ka fapa hi in hnenah a chhuk ve lo ang; a u a thi tawh a, amah chauh hi a ni tawh si a: in kalna kawng lakahte tawhsual a zuk tawh chuan ka lu tuak hi lungngaihnain thlanah in liamtir dawn a ni," a ti a.

³⁸Tin, ani chuan, "Ka fapa hi in hnenah a chhuk ve lo ang; a u a thi tawh a, amah chauh hi a ni tawh si a: in kalna kawng lakahte tawhsual a zuk tawh chuan ka lu tuak hi lungngaihnain thlanah in liamtir dawn a ni," a ti a.