Read Baibul, Mizo Genesis 43 Bible Online

Genesis 43 - Baibul, Mizo bible

Genesis 43

¹Tin, chu mi ramah chuan tam a tla nasa hle a.

²Tin, heti hi a ni a, Aigupta ram ata buh an phurh chhoh kha an ei zawh chuan an pa chuan an hnenah, "Kal leh tawh u la," buh tlem tal kan tan zuk lei leh rawh u," a ti a.

³Tichuan Juda chuan a hnenah, "Chu mi chuan, 'In nau in hnena a tel loh chuan ka hmel in hmu lo ang,' tiin min tiam tlat a ni.

⁴Kan nau hi kan hnenah i tirh chuan buh kan zuk leisak ang che;

⁵i tirh loh erawh chuan kan zuk kal lo ang: chu mi chuan kan hnenah, 'In nau in hnena a tel loh chuan ka hmel in hmu lo ang,' a ti miau si a," tiin a sawi a.

⁶Tin, Israela chuan, "Eng vangin nge nau dang in la neih thute lam in hrilh kher a, ka tana tha lo tak in tih ni?" a ti a .

⁷Tin, anni chuan, "Chu mi chuan, 'In pa chu a la dam em? Unau in la nei em?" tiin kan chanchin leh kan laichinte chanchin min zawt tlat si a; tichuan chung a thu min zawh ang zel chu kan hrilh a ni: 'In nau rawn hruai chhuk rawh u,' a ti ang tih tu nge hre kher ang i?" an ti a.

⁸Tin, Juda chuan a pa Israela hnenah, "Taitea chu ka hnenah kaltir rawh, tichuan kan tho ang a, kan kal mai ang e; keini leh nang leh kan fanau te tete pawh hi thi loa kan nun theihna turin.

⁹A chungchang thuah hian keima'n a bul ka tum zel ang; keima lakah ngei amah phut ang che: ani chu i hnenah ka rawn hruai leh loh a, i hmaah hian ka dintir leh loh chuan a mawh chu kumkhuain ka phur nang e:

¹⁰awm rei suh i la chuan tunah pawh kan lo thleng leh tawh ngei tur a ni," a ti a.

¹¹Tin, an pa Israela chuan an hnenah, "Chutiang a nih si chuan heti hian ti rawh u; in bawmahte khan he rama thil tha tha thenkhat-thinghnai damdawi te, khawizu te, englo rimtui te, murra te, theipil sak te, vai umkhal te tlem theuhin-chu mi tan chuan lawmmanah sin thlak rawh u:

¹²tin, tangka a leh hnihin keng u la, in ip rawng bula tangka a pek kir che u pawh khan keng leh rawh u; a tihpalh a ni mahna:

¹³in nau pawh chu hruai u la, tho u la, chu mi hnenah chuan kal leh rawh u:

¹⁴tichuan in nau pakhat leh Benjamina hi a chhuahsakna tur che uin, Pathian Engkimtitheia chuan chu mi chu khawngaihtir che u rawh se. Tin, ka fate chu chan a nih leh ka chan mai a ni ang chu," a ti a.

¹⁵Tichuan anni chuan lawmman chu an keng a, tangka chu as leh hnih an keng bak a, Benjamina pawh an hruai a; tin, an tho a, Aigupta ramah an zuk kal a, Josefa hmaah chuan an ding leh ta a.

¹⁶Tin, Josefan Benjamina an hnena awm chu a hmuh veleh, a in enkawltu hnenah chuan, "Saw mite saw in chhungah hruai lut la, sa talh la, buatsaih rawh; saw mite sawn chhunah ka hnenah chaw an ei dawn a ni," a ti a.

¹⁷Tichuan ani chuan Josefa thupek angin a ti ta a; Josefa inah chuan a hruai lut a.

¹⁸Tin, Josefa inah hruai luha an awm avangin an hlau a, "Kal hmasak tuma kan ipa tangka min pek kirte avang khan a nih hi min hruai luh ni; kan chungah remchang zawnga min beiin, keimahni leh kan sabengtungte nen hian bawih atan min man a tum a nih hi," an ti a.

¹⁹Tin, Josefa in enkawltu kiangah chuan an va kal a, kawngka bulah chuan an bia a,

²⁰Aw ka pu, kan lo kal hmasak tum khan buh lei tur ngawta lo chhuk kan ni a:

²¹tin, heti hi a ni a, riahbuk kan thlen chuan kan ipte chu kan han hawng a, tin, ngai teh, kan tangka theuh chu kan ip rawng bulah a lo awm ta theuh a, kan tangka chu a buk ngai thenin a lo awm a: tichuan kan rawn keng leh a ni.

²²Tin, buh leina turin tangka dang pawh kan rawn keng a: kan tangka chu tuin nge kan ipah dah kan hre si lo," an ti a.

²³Tin, ani chuan, "Thlamuang takin awm u la, hlau suh u: in Pathian, in pa Pathian chuan in ipahte chuan ro a pe che u a nih chu: in tangka kha ka hmu si a," a ti a. Tin, Simeona chu an hnenah a rawn hruai chhuahsak ta a.

²⁴Tin, anni chu Josefa in chhungah a hruai lut a, tui a pe a, an ke an sil ta a; an sabengtungte pawh chu chaw a pe bawk a.

²⁵Tin, an lawmman ken chu Josefa, chawfaka a lo kal hmain an lo buatsaih lawk a: chutah chuan chaw an ei dawn tih an hre si a.

²⁶Tin, Josefa chu ina a lo hawn veleh, an kuta lawmman awm chu in chhungah a hnenah an keng lut a, lei siin chibai an buk hlawm a.

²⁷Tin, ani chuan an chanchin a zawt a, "In pa, a chanchin in sawi putar kha, a dam lai em ni? Mi nungdamin a la awm em? a ti a.

²⁸Tin, anni chuan, "Kan pa i chhiahhlawh chu a dam lai a ni a, nungdamin a la awm e," an ti a. Tin, an lu an kun a, chibai an buk leh a.

²⁹Tin, ani chu a dak a, a nau Benjamina, a nu fapa chu a hmu a, "Kha kha in tlum ber, a chanchin mi hrilha kha em ni?" a ti a. Tin, amah vekin, "Ka fapa, Pathianin khawngaih che rawh se," a ti a.

³⁰Tin, Josefa chuan a nau a hmuh chuan a lung a chhiat tak em em avangin hmanhmawh takin tahna hmun a zawng ta thuai a, a pindan chhungah a lut a, chutah chuan a tap chhuak ta a.

³¹Tin, a hmai a phih a, a va chhuak leh a, a insum hram hram a, "Chaw ei siam rawh u," a ti a.

³²Tichuan ama tan ahrangin, anniho tan ahrangin, Aigupta mi a eipuiteho tan ahrangin an siam ta a: (Aigupta-hoin Hebraiho chu an eipui thei si lo; chutiang tih chu Aigupta-ho tan chuan a thiang lo a ni.)

³³Tichuan upa ber chu fa tir nihna angin, naupang ber chu a tlum ber nihna angin Josefa hmaah chuan an thu zel a: chutichuan mak an ti hlawm theuh a.Tin, Josefa chuan a hnenah a mi chanvote chu an hnenah a hlan chhawntir a, Benjamina chanvo phei chu an chanvo zawng zawng ai chuan aleh ngain a tam bik a ni. Tin, uainte an in a, a hoin an hlim ta hle a.

³⁴Tin, Josefa chuan a hnenah a mi chanvote chu an hnenah a hlan chhawntir a, Benjamina chanvo phei chu an chanvo zawng zawng ai chuan aleh ngain a tam bik a ni. Tin, uainte an in a, a hoin an hlim ta hle a.