Read Baibul, Mizo Genesis 44 Bible Online

Genesis 44 - Baibul, Mizo bible

Genesis 44

¹Tin, ani chuan a in enkawltu hnenah chuan , "Kha mite ip kha anphurh theih tawkin buhin tikhat la, an tangka theuh chu an ip rawng bulah dah theuh rawh.

²Tin, ka no, tangka no kha, an naupang ber ip rawng bulah dah rawh, a buh man tangka nen khan," tiin thu a pe a. Tichuan ani chuan Josefa thusawi ang chuan a ti ta a.

³Tin, khua a var veleh anni chu an sabengtungte nen chuan an kaltir ta a.

⁴Tin, khua ata an kal chhuak chu an la thlen hlat hma chuan Josefan a in enkawltu hnenah, "Tho la, mite kha va um rawh, 'Engtizia nge thil tha thil tha loa in rulh ni?

⁵Kha kha ka pu uain inna leh aienna ngei a ni lo em ni? Hetiang in tih hi in tisual a ni,' ti rawh," a ti a.

⁶Tin, a um phak a, chung thu chu an hnenah a sawi a.

⁷Tin, anni chuan a hnenah, "Ka pu, engtizia nge ni hetiang thu i sawi? i chhiahhlawhte hian chutiang thil kan tih loh turzia mai chu.

⁸Ngai teh, kan ip rawng bula tangka kan hmuhte pawh kha Kanaan ram atangin i hnenah kan rawn ken leh kha: engtin nge i pu ina mi tangka emaw rangkachak emaw kan ruk theih ang le?

⁹I chhiahhlawhte zingah hian tupawh i hmuhna apiang chu thi rawh se, keini pawh kan pu bawihah kan awm mai ang e," an ti a.

¹⁰Tin, ani chuan, "Aw le, in thu ang zel chuan ni ang hmiang; amaherawhchu tupawh ka hmuhna apiang chu ka bawihah awm rawh se; nangni erawh chu sawiselboin in awm ang," a ti a.

¹¹Chu veleh chuan hmanhmawh takin mahni ip chu leiah an la thla theuh a, mahni ip chu an hawng theuh bawk a.

¹²Tin, ani chuan an upa berah a tan a, an naupang ber thlengin a zawng a: tichuan no chu Benjamina ipah chuan a hmu ta a.

¹³Chu veleh chuan an silhfente chu an pawt thler a, mahni sabengtung chu an phurhtir leh theuh a, khuaah chuan an kir leh ta a.

¹⁴Tin, Juda leh a unaute chuan Josefa in chu an va thleng a; ani chu chutah chuan a lo la awm cheu va: tin, a hmaah chuan an bawkkhup ta hlawm a.

¹⁵Tin, Josefa chuan an hnenah, "Eng thil nge ni in tih tak ni? Keimah ang mi hian ai an en thiam ngei ang tih in hre lo em ni?" a ti a.

¹⁶Tin, Juda chuan, "Ka pu, i hnenah eng nge kan sawi tak ang? Engnge kan hrilh ang? Engtin nge kan insawiven tak ang le? Pathianin i chhiahhlawhte sualna chu a hmu chhuak ta a nih hi: ngai teh, ka pu, i bawihte kan nih tak hi, keimahni leh a kuta no an hmuhna pawh hi," a ti a.

¹⁷Tin, ani chuan, "Chutiang chuan ka tih loh turzia mai chu chu: a kuta no an hmuhna chauh hi ka bawihah a awm ang: nangni erawh zawng thlamuang takin in pa hnenah han kal rawh u," a ti a.

¹⁸Chu veleh Juda chuan Josefa chu a va hnaih a, "Aw ka pu, khawngaih takin, ka pu, i chhiahhlawh hi i beng hriatah thu kam khat mi sawitir la, i thinur chu i chhiahhlawh chungah hian alhtir suh ang che: nang zawng Pharaoa ang mai i ni si a.

¹⁹Ka pu, nangin, 'Pa emaw unau emaw in nei em?' tiin i chhiahhlawhte hi min zawt a.

²⁰Tin, ka pu, keinin i hnenah hian, 'Pa putar tak leh, a tar lam fa, naupang te ka nei a; chu mi u chu a thi a, a nu hrinah chuan amah chauh chu a la awm a, a pa chuan amah chu a hmangaih hle mai,' kan ti a.

²¹Tin, nangin i chhiahhlawhte hnenah hian, 'Amah chu ka mita ka hmuh theihna'n ka hnenah rawn hruai thla rawh u,' i ti a.

²²Tin, ka pu, keinin i hnenah, 'Taitea chuan a pa a kalsan thei lo ang: a pa a kalsan zawngin a pa chu a thi mai dawn si a,' kan ti a.

²³Tin, nangin i chhiahhlawhte hnenah hian, 'In tlum ber chu in hnena a lo chhuk ve loh chuan ka hmel in hmu leh tawh lo ang,' i ti a.

²⁴Tin, heti hi a ni a, i chhiahhlawh ka pa hnen kan han thlen chuan, ka pu, i thu chu kan hrilh a.

²⁵Tin, kan pa chuan, 'Kal leh tawh u la, buh tlem tal kan tan zuk lei leh rawh u,' a ti a.

²⁶Tin, keinin, 'Kan zuk kal thei tawh lo ang: kan tlum ber hi kan hnena a tel ve erawh chuan kan zuk kal mai ang: kan tlum ber hi kan hnena a tel loh chuan chu mi hmel chu kan hmu thei dawn lo a ni,' kan ti a.

²⁷Tin, i chhiahhlawh ka pa chuan kan hnenah, 'Ka nupui chuan fapa pahnih mi hrinsak tih in hria e:

²⁸tin, a pakhat chu ka hnen ata a kal chhuak a, pawh sawm vekin a awm a ni ngei ang, ka ti a; chu mi achinah chuan amah chu ka hmu ta lo ang vang a:

²⁹tichuan he mi pawh hi ka hnen ata in hruai bo a, tawh sual a zuk tawh chuan ka lu tuak hi lungngaihnain thlanah in liamtir dawn a ni,' a ti a.

³⁰Chutichuan Taitea hi kan hnena tel lo a, i chhiahhlawh ka pa hnen ka han thlen chuan a nunna chu Taitea nunna nen a inzawm tlat avangin,

³¹heti hi a ni ang a, Taitea hi a tel ve lo tih a hriat veleh a thi mai ang: tichuan i chhiahhlawhte hian i chhiahhlawh kan pa lu tuak chu lungngaihnain thlanah kan liamtir dawn a nih hi.

³²I chhiahhlawh hian, 'I hnena ka rawn hruai leh loh chuan a mawh chu kumkhuain ka pa lakah ka phur ang,' tiin ka pa lakah chuan Taitea chungchang thuah hian a bul tumtuah ka insiam tawh si a.

³³Chutichuan khawngaih takin i chhiahhlawh hi Taitea aiah, ka pu, i bawihah mi awmtir la, Taitea hi a ute hnenah chhohtir ang che.Taitea ka hnena tel loin ka pa hnenah engtin nge ka chhoh theih ang? Ka pa chunga chhiatna thleng tur chu ka hmu ang a sin," a ti a.

³⁴Taitea ka hnena tel loin ka pa hnenah engtin nge ka chhoh theih ang? Ka pa chunga chhiatna thleng tur chu ka hmu ang a sin," a ti a.