Read Baibul, Mizo Genesis 45 Bible Online

Genesis 45 - Baibul, Mizo bible

Genesis 45

¹Tin, Josefa chu a kianga ding zawng zawngte hmaah chuan a insum zo ta lo a, "Mi zawng zawng ka hnen ata hi kal chhuahtir vek rawh," tiin a au a. Tichuan Josefa a unaute hnenah a inhriattir chhung zawng a kiangah tumah an ding lo a.

²Tin, a tap ta rawih a, tichuan Aigupta-hoin an hria a, Pharaoa chhungte pawhin an hre bawk a.

³Tin, Josefa chuan a unaute hnenah, "Josefa kha ka ni; ka pa chu a la dam maw?' a ti a. Nimahsela a unaute chuan an chhang thei lo a, a hmaah chuan mangang takin an awm ta a ni.

⁴Tin, Josefa vekin a unaute hnenah, "Khawngaih takin mi rawn hnaih teh u," a ti a. tichuan an va hnaih a. Tin, ani chuan, "In unaupa Josefa, Aigupta rama luhpui tura in hralha kha ka ni.

⁵Nimahsela heta kal tura mi hralh avang hian lungngai suh u la, mahni inhaw duh hek suh u: mite nunna chhandam turin Pathianin in hmaah mi lo tir hmasa a nih hi.

⁶He kum hnih chhung hian he ramah hian tam a lo tla ta a: kum nga a la bak a, chu mi chhung zawng leileh hi a awm lo ang a, buh lak pawh a awm hek lo ang.

⁷Tichuan leiah hian chithlahte zuahsak tur che u leh chhandamna ropui takin nungdama ka awmtirna tur che uin Pathianin in hmaah hian mi lo tir hmasa a ni.

⁸Chutichuan heta mi kaltirtu hi nangni in ni lo a, Pathian a ni zawk e: ani chuan Pharaoa paah leh a chhungte zawng zawng hotuah leh Aigupta ram zawng zawng roreltuah mi siam ta a.

⁹Rang takin ka pa hnenah han kal u la, a hnenah, 'I fapa Josefa chuan heti hian a ti a, Pathianin Aigupta ram zawng zawng roreltuah mi siam ta: ka hnenah lo chhuk rawh, rei rawn rial suh:

¹⁰tichuan Gosen ramah i awm ang a, ka kiang ngeiah hian i awm dawn nia, nang leh i fate leh i tute leh i beram rualte leh i bawng rualte leh i neih zawng zawng nen:

¹¹chutah chuan keima'n ka chawm ang che; tam tur kum nga a la awm si a; chutilochuan i lo rethei dah ang e, nang leh i chhungte leh i neih zawng zawngte nen khan,' han ti ang che u.

¹²Tin, ngai teh u, nangmahni mit ngei leh ka nau Benjamina mit ngeiin keima ka ngeiin a sawi lai in hmu reng a ni.

¹³Tin, Aigupta rama ka ropuina zawng zawng thu leh in thil hmuh zawng zawng thu hi ka pa in hrilh ang a; ka pa chu rang takin hetah in rawn hruai thla tur a ni," a ti a.

¹⁴Tin, a ir leh a nau Benjamina ir chuktuahin a tap ta a; Berjamina pawh a ir chuktuahin a tap ta bawk a.

¹⁵Tin, a unaute zawng zawng chu a fawp a, a tah khum ta theuh va: chu mi hnu-ah chuan a unaute chuan thukhawchang an sawipui ta a.

¹⁶Tin, "Josefa unaute an lo kal," tih thu thang chu Pharaoa inah chuan an lo hre ta a: chu chuan Pharaoa leh a chhiahhlawhte chu a tilawm hle a.

¹⁷Tin, Pharaoa chuan Josefa hnenah, "I unaute hnenah, 'Heti hian ti rawh u; in sate chu buh phurhtir u la, chhuak u la, Kanaan ramah kal rawh u;

¹⁸tin, in pa leh in chhungte chu hruai u la, ka hnenah hian lo kal rawh u; tichuan Aigupta rama thil thate hi ka pe ang che u a, he rama thil awm tha berte hi in ei dawn nia, ti rawh.

¹⁹Thu ka pe a che, heti hian ti rawh u; in fanau te tete tan leh in nupuite tan Aigupta ram atang hian tawlailirte la u la, in pa hruaiin lo kal rawh u.

²⁰In bungrua pawh ngaihtuah duh suh u, Aigupta ram zawng zawnga thil tha apiang hi in ta a ni si a," a ti a.

²¹Tichuan Israela fate chuan chutiang chuan an ti a: tin, Josefan Pharaoa thupek ang chuan tawlailirte an hnenah a pe a, kalkawng atan ei tur a pe bawk a.

²²An zaa hnenah silhfen inthlakna te a pe theuh a; Benjamina hnenah phei chuan tangka zathum leh silhfen inthlakna panga a pe a.

²³Tin, a pa hnenah chuan hetiang hi a thawn a; sabengtung sawm Aigupta rama thil tha phur leh sabengtungnu sawm kalkawnga a pa tan buh leh chhang leh ei tur phur a thawn a.

²⁴Chutichuan a unaute chu a tir chhuak a, an kal ta a; tin, ani chuan an hnenah, "Kalkawngah inhau lo turin fimkhur rawh u," a ti a.

²⁵Tin, Aigupta ram ata chu an han chho a, Kanaan rama an pa Jakoba hnen chu an han thleng a.

²⁶Tin, a hnenah, "Josefa kha alo la dam a, Aigupta ram zawng zawng roreltu a ni," tiin an hrilh a. tin, a thin a mit sulh a, an thu chu a awih si lo.

²⁷Tin, an hnena Josefa thu sawi zawng zawng chu an hrilh a: tin, a chuanna tur tawlailir Josefan a thawnte chu a han hmuh chuan an pa Jakoba thinlung chu a harh ta huai a:tin, Israela chuan, "A tawk ta e; ka fapa Josefa chu mi nungdamin a lo la awm a nih tak hi: ka thih hmain amah ka zuk hmu ang," a ti ta a.

²⁸tin, Israela chuan, "A tawk ta e; ka fapa Josefa chu mi nungdamin a lo la awm a nih tak hi: ka thih hmain amah ka zuk hmu ang," a ti ta a.