Read Baibul, Mizo Genesis 46 Bible Online

Genesis 46 - Baibul, Mizo bible

Genesis 46

¹Tin, Israela chu a neih zawng zawng nen a chhuak a, Beerseba chu a thleng a, a pa Isaaka Pathian hnenah chuan inthawinate a hlan a.

²Tin, Pathianin zana a mumangahte chuan Israela chu a bia a. "Jakob, Jakob," a ti a.Tin, ani chuan, "Heta hi ka awm," a ti a.

³Tin, ani chuan, "Kei Pathian, i pa Pathian chu ka ni: Aigupta rama zuk kal chu hlau suh; chutah chuan chi ropui takah ka siam dawn che a ni:

⁴Aigupta ramah chuan i hnenah ka zuk kal ve ang a; tin, ka hruai chho leh ngei ngei bawk ang che: tin, Josefa chuan i thih hunah i mit a siamsak dawn che nia," a ti a.

⁵Tichuan Jakoba chu Beer-seba atang chuan a chhuak a: Israela fapate chuan an pa Jakoba leh an fanau te tete leh a nupuite chu a chuan nana Pharaoa tawlailir thawnahte khan an chuantir a.

⁶Tichuan Jakoba leh a thlahte zawng zawng chuan Kanaan rama an dehchhuah an rante leh an bungruate chu an chhawm a, Aigupta ram chu an thleng ta a:

⁷a fapate, a tupate, a fanute, a tunute, a thlahte zawng zaqwng chu Aigupta ramah chuan a luhpui ta hlawm a.

⁸Tin, he'ng hi Israela thlah Aigupta rama lut Jakoba leh a fapate hming chu a ni: Reubena Jakoba fa tir chu.

⁹Tin, Reubena fapate chu Hanoka te, Pallua te, Hezrona te, Karmia te an ni a.

¹⁰Tin, Simeona fapate chu Jemuela te, Jamina te, Ohada te, Jakina te, Zohara te, Kanaan hmeichhe laka a fapa Saula te an ni a.

¹¹Tin, Levia fapate hu Gersona te, Kohatha te, Meraria te an ni a.

¹²Tin, Juda fapate chu Era te, Onana te, Sela te, Pereza te, Zera te an ni a: Era leh Onana erawh chu Kanaan ramah chuan an thi ta a ni. Pereza fapate chu Hezrona leh Hamula an ni a.

¹³Tin, Isakara fapate chu Tola te, Ouva te, Joba te, Simrona te an ni a.

¹⁴Tin, Zebuluna fapate chu Sereda te, Elona te, Jahleela te an ni a.

¹⁵Chungho zawng zawng chu Leaii fapa, a fanu Dinaii nen, Paddan-aram rama Jakoba a hrinsakate chu an ni a: a fapate leh a fanute zawng zawng chu sawmthum leh pathum an ni a.

¹⁶Tin, Gada fapate chu Ziphiona te, Hagia te, Sunia te, Ezbona te, Eria te, Arodia te, Arelia te an ni a.

¹⁷Tin, Asera fapate chu Imna te, Isvaa te, Isvia te, Beria te an ni, an farnu Seri nen: tin, Beria fapate chu Hebera leh Malkiela hi an ni a.

¹⁸Chungho chu Zilpaii Labanan a fanu Leaii hnena a peka fapate chu an ni, chungho chu Jakoba a hrinsak a, mi sawm leh parukte chu.

¹⁹Tin, Jakoba nupui Rakili fapate chu Josefa leh Benjamina an ni a.

²⁰Tin, Josefan Aigupta ramah fapa Manasea leh Ephriama chu a nei a, chu mite chu On khaw puithiam Potiphera fanu Asenathi chuan amah a hrinsak a ni.

²¹Tin, Benjamina fapate chu Bela te, Bekera te, Asbela te, Gera te, Naamana te, Ehia te, Rosa te, Mupima te, Hupima te, Arda te an ni a.

²²Chungho chu Rakili fapa Jakoba a hrinsakte chu an ni: an za chuan sawm leh pali an ni.

²³Tin, Dana fapa chu Husima a ni a.

²⁴Tin, Naphtalia fapate hu Jazeela te, Gunia te, Jezera te, Sillema te an ni a.

²⁵Chungho chu Bilhaii Labanan a fanu Rakiliu hnena a peka fapate chu an ni, chungho chu Jakoba a hrinsak a: an za chuan pasarih an ni.

²⁶Jakoba fapate nupuiho chhiar loin Jakoba hnena Aigupta rama lut ve, a thalbea chhuak zawng zawngte chu an za chuan sawmruk leh paruk an ni a;

²⁷tin, Josefan Aigupta rama fapa a neihte chu pahnih an ni. Jakoba chhungte zawng zawng Aigupta rama lutte chu sawmsarih an ni.

²⁸Tin, Jakoba'n Gosen ram lam kawng lo kawhhmuh turin Juda chu Josefa hnenah a kal hmasaktir a: tichuan Gosen ramah chuan an lut ta a.

²⁹Tin, Josefa chuan a tawlailir chu a buatsaih a, Gosen ramah chuan a pa hmuak turin a han kal ta a; tin, a hnenah a inhriattir a, a ir a chuktuah a, rei fe a ir chuktuahin a tap a.

³⁰Tin, Israela chuan Josefa hnenah, "Mi nungdama i lo la awm a, i hmel ka hmuh leh tak avang hian tunah chuan duh leh thi tawh rawh i," a ti a.

³¹Tin, Josefa chuan a unaute leh a pa chhungte hnenah, "Ka han kal ang a, Pharaoa ka hrilh ang a, a hnenah, 'Ka unaute leh ka pa chhungte, Kanaan rama awmte kha, ka hnenah an lo thleng ta;

³²anni chu ran vulhtute an nih avangin Beram vengtute an ni a; an Beram rualte leh an Bawng rualte leh an neih zawng zawng an rawn chhawm vek a ni,' tiin ka han sawi ang.

³³Tin, heti hi a ni ang a, Pharaoan a koh che u a, 'Eng hna nge in thawh thin?' a tih hunah chuan,nangnin 'I chhiahhlawhte hi kan thlahtute chenin, kan nuapan tet ata tun thlengin ran vulhtute kan ni,' ti ang che u: chutichuan Gosen ramah in awm thei dawn nia," a ti a. Beram vengtute reng reng chu Aigupta mite tenzawng tak an ni si a.

³⁴nangnin 'I chhiahhlawhte hi kan thlahtute chenin, kan nuapan tet ata tun thlengin ran vulhtute kan ni,' ti ang che u: chutichuan Gosen ramah in awm thei dawn nia," a ti a. Beram vengtute reng reng chu Aigupta mite tenzawng tak an ni si a.