Read Baibul, Mizo Genesis 47 Bible Online

Genesis 47 - Baibul, Mizo bible

Genesis 47

¹Tichuan Josefan Pharaoa chu a han hrilh a, a hnenah, "Ka pa te, ka unau te, an Beram rual te, an Bawng rual te, an neih zawng zawngte nen Kanaan ram ata an lo thleng thla ta a: tin, ngai teh, Gosen ramah an awm," a ti a.

²tin, a unaute zinga mi, mi panga a hruai a, Pharaoa chu a hriattir a.

³Tin, Pharaoa chuan a unaute hnenah, "Eng hna nge in thawh thin?" a ti a. Tin, anni chuan Pharaoa hnenah, "I chhiahhlawhte hi kan thlahtute chenin Beram vengtute kan ni," an ti a.

⁴Tin, anni vek chuan Pharaoa hnenah, "He rama awm rih tur hian kan lo kal a ni; kan ramah i chhiahhlawhteho Beram rualte tan ei tur a awm ta si lo; tam hi Kanaan ramah a tla nasa hle si a; chutichuan khawngaih takin i chhiahhlawhte hi Gosen ramah min awmtir ang che," an ti a.

⁵Tin, Pharaoa chuan Josefa a bia a, "I pa leh i unaute hi i hnenah an lo kal ta a:

⁶Aigupta ram chu a awm duai alawm: i pa leh o unaute chu ram tha lai apiangah hian awmhmun khuartir ta che; Gosen ramah awmhmun khuar rawh se: tin an zingah mi thil tithei tak hriat i neih phei chuan ka ran chunga hotuahte siam ang che," a ti a.

⁷Tin, Josefan a pa Jakoba chu a hruai lut a, Pharaoa hmaah chuan a dintir a: tichuan Jakoba chuan Pharaoa chu mal a sawmsak ta a.

⁸Tin, Pharaoa chuan Jakoba hnenah, "Kum engzat nge i nih tawh?" a ti a.

⁹Tin, Jakoba chuan Pharaoa hnenah, "Ka khualzin kum chin chu kum 130 a ni a: ka dam chhung kumte hi a tlemin a hreawm a ni, mi thlahtute an khualzin laia an dam chhung kum pawh a zat ve hek lo," a ti a.

¹⁰Tin, Jakoba'n Pharaoa chu mal a sawmsak leh a, Pharaoa hnen ata chu a chhuak ta a.

¹¹Tichuan Jasefan a pa leh a unaute chu awmhmun a khuartir a, Pharaoa thupek angin Aigupta rama ram tha ber laiah, Rameses ramah chuan ro atan ram a pe ta a.

¹²Tin, Josefan a pa leh a unaute leh a pa chhungte zawng zawng chu an chhungkua ang zelin ei tur a pe a, a chawm ta a.

¹³Tin, chu mi ram zawng zawngah chuan ei tur reng reng a awm ta lo a; tam a tla nasa em em si a, chutichuan tam avang chuan Aigupta ram leh Kanaan ram chu a chau ta a.

¹⁴Tin, Josefa chuan an buh leina manah, Aigupta ram leh Kanaan rama tangka awm zawng zawng chu a khawmsak ta vek a; tin, Josefan chu tangka chu Pharaoa inah chuan a la ta a.

¹⁵Tin, Aigupta mi zawng zawng leh Kanaan rama tangka zawng zawng an deh ram zawh chuan, Aigupta mi zawng zawng chu Josefa hnenah an lo kal a, "Ei tur min pe rawh khai; i hmaah hian kan thi mai dawn em ni ang le? Tangka lah a awm tawh si lo," an ti a.

¹⁶Tin, Josefa chuan, "In rante rawn pe mai rawh u; tangka a awm tawh loh chuan in ran manah ei tur ka pe ang che u," a ti a.

¹⁷Tichuan an rante chu Josefa hnenah an hruai a: tin, Josefan chung sakawr manah te, Beram rual manah te, Bawng rual manah te, sabengtung manah te chuan ei tur a pe zel a: chu mi kumah chuan an ran zawng zawng manah ei tur a pe a, a chawm ta hlawm a.

¹⁸Tin, chu mi kum chu a vei a, kum lo thar lehah chuan a hnenah an lo kal leh a, a hnenah, "Kan tangka zawng zawng kan deh ral tawhzia leh, ka pu, kan ran rualte i ta a nih tawhziate hi, ka pu, i lakah hian kan zep lo ang; ka pu, i mithmuhah hian kan taksa leh kan ramte chauh lo chu engmah a awm tawh hauh lo mai:

¹⁹i hmaah hian keini leh kan ram hi kan boral mai dawn em ni ang le? Keimahni hi kan ram chawpin ei turin min lei rawh, tichuan keini leh kan ram hi Pharaoa chhiahhlawhte kan ni mai ang e: tin, thi loa mi nungdama kan awm theihna tur leh ram hi a tiau lohna turin buh chi min pe ang che," an ti a.

²⁰Tichuan Josefa chuan Pharaoa tan Aigupta ram zawng zawng chu a leisak ta a; tam chu an chunga a thlen nasat em avangin Aigupta mite chuan an lo chu an hralh theuh si a: tichuan ram chu Pharaoa ta a ni ta vek a.

²¹Mihringte chu Aigupta ramri lehlam tawp atanga a lehlam tawp thlengin, khuaahte chuan an insawntir ta hlawm a.

²²Puithiamho ram chauh a lei lo a: puithiamhote chuan Pharaoa lakah chanvo an nei a, Pharaoan an chanvo a pek chu an ei thin a ni; chuvangin an ram chu an hralh ve lo a.

²³Chu mi hnuah chuan, Josefan mite hnenah chuan, "Ngai teh u, vawiinah hian nangniho hi in ram chawpin Pharaoa tan ka lei ta che u : hei, heta hi in tan buh chi a awm hi, leiah ching ang che u.

²⁴Tin, buh lak hunah te chuan heti hi a ni ang a, Pharaoa tan hmun ngaa thena hmun khat zel in pe ang a, a hmun li chu nangmahni ta a ni ang, chu chu loa chin lehah te, in fanau te te eiah te a ni ang," a ti a.

²⁵Tin, anni chuan, "Nangin kan nun hi i chhanhim tawh a: ka puin min khawngaih sela, Pharaoa chhiahhlawhte kan ni mai ang," an ti a.

²⁶Tichuan Josefan Pharaoa hmun ngaa hmun khat a hmuh zel tur thu hi Aigupta ram atan tun thlengin danah a siam ta: puithiamho ram chauh chu a ni, Pharaoa ta ni lo chu.

²⁷Tin, Israel-ho chuan Aigupta rama Gosen ramah chuan awm hmun an khuar ta a; chutah chuan an intimuk a, chi tam tak an thlah a, nasa takin an pung ta a.

²⁸Tin, Jakoba chu Aigupta ramah chuan kum sawm leh kum sarih a awm a: chutichuan Jakoba damchhung chu kum 147 a ni ta a.

²⁹Tin, Israela thih hun tur chu a lo hnai ta a: tichuan a fapa Josefa chu a ko a a hnenah, "I mit ka tlun chuan khawngaih takin i kut kha ka malpui hnuaiah rawlh la, mikhawngaihin ka chungah tih tak zetin ti ang che; khawngaih takin Aigupta ramah hian mi phum lul suh ang che:

³⁰mi thlahtute hnena ka muhilh hunah chuan nangin Aigupta ram ata hi mi zawn chhuakin, anmahni phumna hmunah chuan mi phum zawk tur a ni," a ti a. Tin, ani chuan, "I sawi ang hian ka rawn ti ang e," a ti a.Tin, ani chuan, "Ka hnenah chhia chham rawh le," a ti a: tichuan a hnenah chhia a chham ta a. Tin, Israela chu khum lu siin a kun ta a.

³¹Tin, ani chuan, "Ka hnenah chhia chham rawh le," a ti a: tichuan a hnenah chhia a chham ta a. Tin, Israela chu khum lu siin a kun ta a.