Read Baibul, Mizo Genesis 48 Bible Online

Genesis 48 - Baibul, Mizo bible

Genesis 48

¹Tin, chung hnuah chuan heti hi a ni a, Josefa hnenah, "Ngai teh, i pa a dam lo ve," an ti a. Tichuan a fapate pahnih Manasea leh Ephraima chu a hnenah a hruai ve a.

²Tin, Jakoba hnenah "Ngai teh, i fapa Josefa i hnenah a lo kal e," tiin an hrilh a: tichuan Israela chu a intiharh a, khumah chuan a thu ta a.

³Tin, Jakoba'n Josefa hnenah, "Pathian Engkimtitheia chu Kanaan rama Luz khuaah chuan ka hnenah a inlar a, mal mi sawm a,

⁴ka hnenah, 'Chi tam tak ka thlahtir ang chia, ka tipung bawk ang chia, chi hrang hrang awm khawmah ka siam ang che; tin, he ram hi i hnua i thlahte hnenah chuan kumkhaw ro atan ka pe ang,' mi ti a.

⁵Tin, i fapate pahnih, Aigupta rama i hnena ka lo kal hmaa Aigupta rama i neihte hi ka ta an ni; Ephraima leh Mansea hi, Reubena leh Simeona ang bawkin ka ta an ni ang.

⁶Tin, he mite hnua fa i neihte chu i ta an ni ang, an rochanah chuan an ute hming chu an tawm mai ang.

⁷Tin, keia thu zawng, Paddan ram atanga ka lo kal lai khan Rakili chu Kanaan ramah kawng lakah, Ephrath khua chu a la hlat fe laiin ka bulah a thi a: chuta Ephrath khaw kawngah chuan ka phum ta a (chu chu Bethlehem khua a ni)," a ti a.

⁸Tin, Israelan Josefa fapate chu a en a, "Heng hi tute nge ni?" a ti a.

⁹Tin, Josefa chuan a pa hnenah, "Heng hi ka fapa, Pathianin heta mi pekate chu an ni," a ti a. Tin, ani chuan, "Khawngaih takin ka hnenah hian han hruai rawh, tichuan anmahni mal ka lo sawmsak ang e," a ti a.

¹⁰Israela mit chu a upat avangin a fiah lo a, a hmu thei lo a ni. Tin, a han hruai hnai a, tin, ani chuan a lo fawp a, a lo pawm a.

¹¹Tin, Israelan Josefa hnenah, "I hmel hmuh hi ka beisei tawh lo a, nimahsela ngai teh, Pathianin i thlahte hmel lam pawh mi hmuhtir ta a nih hi," a ti a.

¹²Tin, Josefa chuan anni chu a pa kapkar ata chu a kai chhuak a, a hmaia lei siin chibai a buk a.

¹³Tin, Josefan an pahnih chuan a kai a, Epraima chu a kut ding lamin Israela kut vei lamin Israela kut ding lam pangah a kai a, a rawn hruai hnai a.

¹⁴Tin, Israela chuan a ban kawkalh lui a, a kut ding lam chuan a ban a, Ephraima, a naupang zawk chhipah a nghat a; Manasea chu fa tir a ni si a.

¹⁵Tin, Josefa chu mal a sawmsak a, "Mi thlahtu Abrahama leh Isaaka, a hmaa an awm thinna Pathian, vawiin thlenga ka damchhung zawng zawnga mi chawmtu Pathian,

¹⁶sual zawng zawng laka mi tlantu Vantirhkoh chuan naupangte hi malsawm rawh se, tin, ka hming leh mi thlahtu Abrahama leh Isaaka hming chu anmahni hmingah pu rawh se; tin, khawvel lailiah mipui tam tak ni turin lo pung rawh se," a ti a.

¹⁷Tin, Josefan a pain a kut ding lam Ephraima chhipa a nghat chu a hmuhin a lung a ni ta lo a; tichuan a pa kut Ephraima chhip ata chu Manasea chhipa sawn turin a chawi kang a.

¹⁸Tin, Josefan a pa hnenah, "Ka pa, hetiang tur a ni lo: hei hi a sin fa tir chu ni, i kut dinglam hi a chhipah nghat zawk rawh," a ti a.

¹⁹Nimahsela a pa chuan a duh lo a, "Ka hria e, ka fapa, ka hria e: ani pawh hnama sawi thamin a awm bawk ang a, ani pawh a ropui bawk ang: amaherawhchu a nau hi a aiin a ropui zawk ang a, a thlahte pawh chi hrang hrang tam tak mai an lo la ni ang," a ti a.

²⁰Tichuan Jakoba'n, "Israel-ho chuan Ephraima leh Manasea angin Pathianin awmtir che rawh se,' tiin nangmahni hming lamin mal an sawmsak thin ang," tiin chu mi ni chuan anni chu mal a sawmsak a: tichuan Ephraima chu Manasea hmaah a awmtir ta a.

²¹Tin, Israela vek chuan Josefa hnenah, "Ngai teh, ka thi dawn ta e: nimahsela Pathian chu in hnenah a awm ang a, in thlahtute ramah chuan a hruai leh ang che u.Chu mi lo pawh chu, i unaute chanvo aiin chan khatin ka pe chuang a che, ka khandaih leh ka thalngula Amor-ho kut ata ka laksaka kha," a ti a.

²²Chu mi lo pawh chu, i unaute chanvo aiin chan khatin ka pe chuang a che, ka khandaih leh ka thalngula Amor-ho kut ata ka laksaka kha," a ti a.