Read Baibul, Mizo Genesis 9 Bible Online

Genesis 9 - Baibul, Mizo bible

Genesis 9

¹Tin, Pathianin Nova leh a fapate chu mal a sawmsak a, an hnenah, "Chi tam tak thlaha lo pungin, lei hi luah khat rawh u.

²Nangmahni tihna leh hlauhna leia sa tinreng leh chungleng sava tinrengin an nei ang; chungte leh leia bawkvaka kal zawng zawng leh tuifinriat sangha zawng zawngte chu, in kuta pek an ni vek tawh.

³Thil nung che thei tinrengte chu in tan ei tur an ni ang a; thlai hring ka pek che u ang khan engkim ka pe vek a che u.

⁴Amaherawhchu sa a nunna (a thisen) chawpin in ei tur a ni lo.

⁵Tin, in thisen, in nunnate thisen phuba chu ka la ngei ngei ang: sa tinreng lakah ka la ang: mihring lakah pawh, mi tin an unaute lakah chuan, mihring nunna phuba chu ka la theuh ang.

⁶Tupawh mihring thisen chhuahtu chu mihring vekin ama thisen chu an chhuah ve tur a ni: Pathian anpuiin mihring a siam si a.

⁷Tin, nangni chu chi tam tak thlahin lo pung rawh u; leiah hian fa tam tak hring ula, a chungah hian lo pung rawh u," a ti a.

⁸Tin, Pathianin Nova hnenah leh a hnena awm a fapate hnenah chuan,

⁹Tin, ngai teh u, keimah ngeiin in hnenah leh in hnua in thlahte hnenah pawh ka thuthlung chu ka tinghet a ni;

¹⁰in hnena thil nung tinreng awm, in awmpui sava te, ran te, ram sa tinreng hnenah lam chuan.

¹¹Tin, in hnenah ka thuthlung chu ka tinghet ang; tisa zawng zawng tuileta tihboralin an awm tawh hek lo ang a; lei tichhe turin a let tawh hek lo ang," tiin a sawi a.

¹²tin, Pathian vekin, "Hei hi kei leh nangni leh in hnena thil nung tinreng awmte kara chhuan tawp nei loa awm zelte tan, ka thuthlung chhinchhiahna chu a ni ang.

¹³Chhumah ka chhimbal ka zamtir a, chu chu kei leh lei kara thuthlung chhinchhiahna tur a ni ang.

¹⁴Tin, heti hi a ni ang a, lei chunga chhum ka zamtirin chhimbal chu chhumah chuan a lang ang a,

¹⁵kei leh nangni leh tisa zawng zawng zinga mi thil nung tinrengte kara ka thuthlung awm hi ka hre reng ang; tichuan tui chu tisa zawng zawng tiboral turin a lo let leh tawh lo ang.

¹⁶Tin, chhimbal chu chhumah a zam thin ang; tichuan Pathian leh lei chunga tisa awm zawng zawng zinga mi thil nung tinrengte kara kumkhaw thuthlung awm chu ka hriat reng theihna turin ka en thin ang," a ti a.

¹⁷Tin, Pathian vekin Nova hnenah chuan, "Chu chu kei leh lei chunga tisa awm zawng zawng kara ka thuthlung tihngheh chhinhhiahna a ni," a ti leh a.

¹⁸Tin, Nova fapa lawng atanga chhuakte chu Sema te, Hama te, Japhetha te an ni: Hama chu kanaana pa a ni.

¹⁹Chu mite laka chhuakte chuan lei zawng zawng hi an dap zo ta a ni.

²⁰Tin, Nova chu lo neituah a awm tan a, grep hrui huan a siam a:

²¹uain chu a in a, a rui a; tichuan a puan inah chuan a mu sual ta a.

²²Tin, Hama, Kanaana pa chuan a pa mu sual chu a hmu a, pawna a unaute pahnih chu a hrilh a.

²³Tichuan Sema leh Japhetha chuan puan an la a, kokia inzawnin hnung tawlhin an kal a, an pa mu sual chu an khuh ta a; an hmai chu lehlam hawiin a awm a, an pa mu sual chu an hmu lo a.

²⁴Tin, Nova chu a uain rui chu a lo harh a, a fapa naupang berin a chunga a tihzia chu a lo hre ta a.

²⁵Tichuan, "Kanaana chu anchhe dawngin awm rawh se; A unaute chhiahhlawhte chhiahhlawh a ni ang," a ti a.

²⁶LALPA, Sema Pathian chu fakin awm rawh se; Kanaana chu a chhiahhlawhah awm rawh se.

²⁷Pathianin Japhetha chu tilian se la, Sema puan inahte awm rawh se; Tin, Kanaana chu a chhiahhlawhah awm rawh se," a ti bawk a.

²⁸Tin, Nova chu tui let hnu chuan kum 350 a dam a.Tichuan Nova dam chhung zawng zawng chu kum 950 a ni a, tin, a thi ta a.

²⁹Tichuan Nova dam chhung zawng zawng chu kum 950 a ni a, tin, a thi ta a.