Read Baibul, Mizo 2 Samuela 18 Bible Online

2 Samuela 18 - Baibul, Mizo bible

2 Samuela 18

¹Tin, Davida chuan a hnena mi awmte chu a chhiar a, sipai sang chunga hotute, za chunga hotute a siam a.

²Tin, Davida chuan mite chu a tir chhuak a, hmun thuma thena hmun khat chu Joaban a ho a, tin, hmun thuma thena hmun khat chu Joaba unaupa Zeruia fapa, Abisaian a ho a, tin, hmun thuma thena hmun khat chu Git mi Itaian aho a. Tin, lal chuan mipui hnenah, "Keima ngei pawh in hnena ka kal ve ngei ngei ang," a ti a.

³Nimahsela mipuite chuan, "Kal ve lo e; keiniho hi chu tlan bo ta pawh ni i la, pawi an ti lo ang a; tin, a chanve lai pawh hi va thi mah i la, pawi an ti hek lo ang: nang chu keiniho sing tlukin i hlu si a; chuvangin khawpui atanga min tanpui tura inpeih renga i lo awm chu a tha zawk a ni," an ti a.

⁴Tin, lal chuan an hnenah, "Tha in tih ang apiang chuan ka ti ang," a ti a. Chutichuan lal chu kulh kawngka bulah chuan a ding a, tin, mipui zawng zawng chu za tel tel leh sang tel telin an chuak ta zut zut mai a.

⁵Tin, lal chuan Joaba leh Abisaia leh Itaia chu, "Keimah vangin, tlangval Absaloma chu dim takin va ti ang che u," tiin thu a pe a. Mipui zawng zawngin Absaloma chungchang thua lalin sipai hotute zawng zawng thu apek lai chu an hria a.

⁶Chutichuan mipuite chu Israel mite do turin indona hmun lamah chuan an kal ta a: tin, an indona chu ephraim ram ngaw a ni a.

⁷Tin, chutah chuan Davida mite hmaah chuan Israel mite chu an tlawm ta a. tin, chuta chuan chu mi ni chuan mi singhni zet an that a.

⁸An indona chuan chu mi lai ram zawng zawng chu a huam vek mai si a; chu mi ni chuan khandaih ai mahin ram ngawin a lem hnem zawk a ni.

⁹Tin, Absaloma chuan Davida mite chu a va tawk ta thut a. Tin, Absaloma chu a sabengtung chunga a chuang a, tin, sabengtung chu sasaw thing zar buk tak hnuaiah a lut a, a lu chu sasaw thingah chuan a tang ta a, lei si lo, van si loin a uai ta reng mai a; tin sabengtung chu a tlan ta zel a.

¹⁰Tin, tuin emaw hian a hmu a, Joaba a hrilh a, "Ngai teh, sasaw thingah Absaloma inkhai reng ka hmu," a ti a.

¹¹Tin, Joaba chuan a hrilhtu hnenah chuan, "Ngai teh, chu chu i hmu si a, engati nge i tihhluma leiah i tihthlak nghal loh? Chutiang chuan ti la chu tangka sawm leh kawnghren ka pe tur che a," a ti a.

¹²Tin, mi chuan Joaba hnenah, "Tangka sang pawh hmu dawn mah i la, lal fapa chunga ka kut ka thlak lo reng reng ang; ka beng riat ngeiah lalin nang leh Abisaia leh Itaia hnenah, 'tlangval Absaloma chu tumahin khawih hlek suh se,' tiin thu ape si che u a.

¹³Rinawm loh thlak takin lo that ta ringawt mai ang i la, (lal lakah chuan engmah thup theih ani awm si lo va) nang chu i inthiarfihlim leh mai awm si a," a ti a.

¹⁴Chutichuan Joaba chuan, "Hetiang chuan i kianga ka awm reng thei tawp lo mai," a ti a, fei pathum a keng a, sasaw thing zinga dama lo la awm Absaloma thinhnun takah chuan a chhun a.

¹⁵Tin, Joaba ralthuam kengtu talngval sawm chuan an rawn hual a, Absaloma chu an chhun a, an that ta a.

¹⁶Tin, Joaba chuan tawtawrawt a ham a, Israel ho umtu mipuite chu an lo kir ta a: Joaba chuan mipuite chu a dang ta tlat mai a.

¹⁷Tin, Absaloma ruang chu a la a, ngawah khuarkhuruk thuk takah chuan an paih a, a chungah chuan lung an tiang khawm thur a; tin, Israel mi zawng zawngte chu mahni puan in teuvah an tlan haw ta a.

¹⁸Absaloma chuan a dam laiin lal ruama lung tian alo tiang tawh diam a; "Ka hming daih lohna turin fapa pawh ka nei si lo a," a ti a. Chu mi lung tian hmingah chuan ama hming a puttir a; tun thlengin Absaloma hriatrengna tih a ni.

¹⁹Chutichuan Zadoka fapa Ahimaaza chuan, "Ka va tlan ang a, LALPA'n a hmelma phuba a laksak dan chanchin hi lal chu ka va hrilh ang e," a ti a.

²⁰Tin, Joaba chuan a hnenah, "Vawiinah zawng chanchin chu va la hrilh suh, ni dangah chanchin chu la hrilh zawk ang che, lal fapa chu a thih atak avangi, vawiinah zawng chanchin engmah va hrilh suh ang che," a ti a.

²¹Tichuan Joaba chuan Kus mi hnenah chuan, "Kal la, i thil hmuh ve hrilh rawh le," a ti a. Tin, Kus mi chuan Joaba chu kunin chibai a buk a tlan ta a.

²²Chutichuan Zadoka fapa Ahimaaza chuan Joaba hnenah," Engpawh ni se la, Kus mi kha ka va um ta'ng e," a ti leh a. Tin, Joaba chuan, "Ka fapa, chanchin hrilh man i hmu dawn si lo a, engah nge i tlan ang?" a ti a.

²³Nimahsela ani chuan, "Engpawh ni se la ka tlana ng e," a ti a. Tin, ani chuan a hnenah, "Tlan mai rawh le," a ti a. Chutichuan Ahimaaza chu phaizawl lam kawngah a tlan a, Kus mi chu a lehpel a.

²⁴Tichuan Davida chu kulh kawngka chhawng inkarah chuan a lo thu a: tin, ralvengtu chu kulh kawngka pawnta zawk chung lamah chuan a chho a, a han hawi vel ruai ruai a, tin, ngai teh, mi pakhat amah chauhin a lo tlan a.

²⁵Tin, vralvengtu chu a au a, lal chu a hrilh a. Tin, lal chuan, "Mi pakhat mai ani h chuan chanchin rawn sawi tur a nei a ni ang," a ti a. Tin, a lo kal thuai thuai a, a lo hnai ta telh telh a.

²⁶Tin, ralvengtu chuan mi dang lo tlan a hmu leh a: tin, ralvengtu chuan kawngkar vengtu a au a, "Ngai teh, mi dang amah chauhin a lo tlan leh e," a tia . Tin, lal chuan, "Ani pawh chuan chanchin a rawn thlen ve dawn a nih chu," a ti a.

²⁷Tin, ralvengtu chuan, "A hmasa zawka tlan danc hu Zadoka fapa Ahmiaaza tlan dan ng hlein ka hria," at ia . Tin, lal chuan, "Ani chu mi tha tak a ni a, chanchin tha a rawn thlen dawn ani ang," a ti a.

²⁸Tin, Ahimaaza chuan a au a, lal hnenah, "A fel vek e," a ti a. Tin, a maia lei siin lal hmaah chuan chibai bukin a kun a," Lalpa, ka pu beih tuma kut thlak tumtute dangchattu LALPA i Pathian chu fakin awm rawh se," a ti a.

²⁹Tin, lal chuan, "tlangval Absaloma chu a dam alawm maw?" a ti a. Tin, Ahimaaza chuan a chhang a, "Joaban lal chhiahlawh, kei i chiahlawh ngei hi min tirh chhuah laiin an buai mur mur ka hmu a, nimahsela eng nge ni tih erawh chu ka hre lo," a ti a.

³⁰Tin, lal chuan, "Ka sirah hian lo ding rih rawh," a ti a. Tin, a sirah a lo ding a.

³¹Tin, ngai teh, Kus mi chu a lo thleng a; tin, "Kus mi chuan, "Lalpa ka pu tan chanchin ka rawn thlen e' i chunga helho zawng zawng phuba chu vawiinah hian LALPA'n a laksak ta che a ni," a ti a.

³²Tin, lal chuan Kus mi hnenah chuan, "tlangval Absaloma chu a dam a lawm maw? a ti a. Tin, Kus mi chuan a chhang a, "Lalpa ka pu hmelmate leh i chiatna zawngtute zawng zawng chu chu tlangval ang chuan awm vek rawh se," a ti a.Chutichuan lal chu a mangang ta hle mai a, kulh kawngka chunga pindanah chuan a chho a, a tap a: tin, a chhoh pah chuan, "Aw, ka fapa Absalom, ka fapa, ka fapa Absalom, i aiah han thi teh zawk i la aw, aw Absalom, ka fapa, ka fapa!" a ti a.

³³Chutichuan lal chu a mangang ta hle mai a, kulh kawngka chunga pindanah chuan a chho a, a tap a: tin, a chhoh pah chuan, "Aw, ka fapa Absalom, ka fapa, ka fapa Absalom, i aiah han thi teh zawk i la aw, aw Absalom, ka fapa, ka fapa!" a ti a.