Read Baibul, Mizo 1 Lalte 2 Bible Online

1 Lalte 2 - Baibul, Mizo bible

1 Lalte 2

¹Tin, Davida thih hun chu a lo hnai ta a: a fapa Solomona chu thu a pe a,

²Leilung zawng zawng dan angin ka kal ve dawn ta a ni: tichuan chak takin awm la, patling takin awm rawh;

³I thil tih apiang leh, i hawina lam apianga i hmuingil theihna'n Mosia Dana ziak anga, LALPA i Pathianin a kawngte zawh tur leh, a thuruat te, a thupek te, a rorelte leh a thuhriattirte pawh tura thu apekte hi zawm rawh:

⁴LALPA'n ka chungchang thua, 'I thlahten an thinlung tak leh, an rilru taka ka mithmuha thutaka awm tura an awm dana an fimkhur chuan Israrelte lalthutthlenga thu tur i hmai lo ang,' tia a sawi kha a tinghe dawn nia.

⁵Tin, Zerui fapa Joaba mi tihzia, Isralte sipai hotu pahnih Nera fapa Abnera leh, Jethera fapa Amasate a tihzia ngei kha i hria e. Khatia a thah a, inrem laia indo thisen chhuaha a chhuah a, a taia kawnghrenah leh a pheikhawk buan indo thisen a tih kaiziate kha.

⁶Tichuan i rem hriat dan angin ti langin, a lua kelsam to hi thlanah thlamuang takin liamtir suh ang che.

⁷Gilead mi Barzilaia fate chungah erawh chhuan khawngaihna lantir langin, i dawhkana chaw kiltuah teltir ve ang che: i unau Absaloma laka ka tlanbo lai khan ka hnenah an lo kal si a.

⁸Tin, ngai teh Bahurim khuaa mi Benjamina thlah, Gera fapa Simeia hi i hnenah a awm a, ani chuan Mahanaim hmuna ka kal lai khan anchhe tha lo tak min lawh a: amaherawhchu Jordan-ah mi hmauk turin a lo chhuk a, chutah chuan, 'Khandaihin ka that lo ang che,' tiin lalpa hming chhalin a hnenah chhia ka lo chham tawh a.

⁹chutichuan thiam chang zawngin chhuah suh, mi fing i ni si; a chungah engtia i tih tur nge ni tih zawng i hre mai ang a; a lua kelsam to chu thisen nen thlanah i liamtir dawn nia," a ti a.

¹⁰Tin, Davida chu a puteho hnenah a muhil ve ta a, Davida khawpuiah an phum a.

¹¹Israel -hote chuang Davida lal chhung chu kum sawmli a ni: Hebron khuaah kum sarih a lal a, Jerusalem khuaah kum sawmthum leh kum thum a lal a.

¹²Tin, Solomona chu apa Davida lalthutthlengah chuan a thu a: tichuan a ram chu nasa taka tihnghehin a lo awm ta a.

¹³Tin, Hagithi fapa Adonija chu Solomona nu Bat-sebi hnenah a kal a. Ani chuan, "Tha lam thua lo kal em i nih le?" a ti a. Anin, "Tha lam thuah ni e," a ti a.

¹⁴Tin, "I hnenah eng emaw sawi tur ka nei a ni," a ti leh a. Ani chuan, "Sawi ta che," a ti a.

¹⁵Tin, ani chuan, "Ram hi ka ta ani tawh tih leh, Israel-ho zawng zawngte pawh hian keimah hi lal atan mi thlir reng a ni tih i hria a; nimahsela ram chu ka unaupa tan a lo inlet leh ta zawk a: LALPA lo ruat danah a ta ani reng a ni.

¹⁶Tunah hian thil pakhat dil tur che ka nei a, mi remtih lohsak lul suh ang che," a ti a. Tin, ani chuan a hnenah, "Sawi ta che," a ti a.

¹⁷Tin, ani chuan, "Khawngaih takin lal Solomona mi biaksak la, (i thu zawng a hnial awm si lo a,) Sunam mi Abisagi hi nupuiah mi neihtir rawh se," a ti a.

¹⁸Tin, Bat-sebi chuan, "Aw le, lal chu ka lo biaksak ang che," a ti a.

¹⁹Chutichuan Bat-sebi chu Adonija biaksak turin lal Solomona hnenah chuan a kal ta a. Tin, lal chu amah lawm turin a tho a, a hmaah a kun a, a lalthutthlengah chuan a thu a, tin, lal nu tan chuan lalthutthleng ahuntir a; adinglamah hchuan a thu ta a.

²⁰Tichuan, "Thil pakhat te takte ka dil dawn che ani min remtih lohsak lul suh ang che," a ti a. Tin, lal chuan a hnenah, 'Dil ta che, ka nu: ka remtih lohsak hauh lo ang che," a ti a.

²¹Tin, ani chuan, "Sunam mi Abisagi hi i unaupa Adonija nupui atan neihtir rawh," at i a.

²²Tin, lal Solomona chuan chuan a chhang a, a nu hnenah chuan, "Eng tiziaa Sunam mi Abisagi hi Adonija tana dil nge maw i nih le? Ram pawh hi dilsak ta nghal law law che; ani chu ka u a ni alawm; ama tan leh puithiam Abiathara leh Zeruii fapa Joaba tan pawh chuan dil ta che," a ti a.

²³Chutichuan lal Solomona chuan LALPA hming chhalin, "Adonija thil dil hian ama chungah thihna thu sawi aniha a nih loh na chuan Pathianin a tih tihin min ti mai se la, chu aia nasa pawhin.

²⁴Tichuan LALPA, a thutiam anga mi tinghet a, ka pa Davida lalthutthlenga mi thuttir a, chhungkua mi lo dinsaktu nunna chhalin ka sawi e, Adonija hi vawiin ni la la hian tihhlum ngei ngei tur a ni," tiin chhia a chham ta a.

²⁵Chutichuan lal Solomona chuan Jehoiada fapa Benaia chu a tir a ani chuan a va bei a, a that ta a.

²⁶Tin, puithiam Abiathara hnenah chuan lalin, "Anathoth khuaah nangma in leh loah haw daih tawh; thi mai tlak zawng i ni a: nimahsela ka pa Davida hmaa lalpa PATHIAN bawm i lo zawn thin avang leh, ka pa hreawm tuarna zawng zawngahte chuan i lo tuar ve tawh thin avangin tunah zawng ka tihlum rih lo ang che," a ti a.

²⁷Chutichuan Solomona chuan Abiathara chu LALPA puithiam anihna a ban ta a; LALPA'n Silo khuaa Elia chhungte chungchang thu a sawi kha a thlentir theihna turin.

²⁸Tin, chu mi thu chu Joaban a lo hria a : Joaba chu Absalima lamah khan a tang lo na a, Adonija lama tang a ni si a. Tichuan Joaba chu LALPA Puan inah a tlan a, maicham kite chu a vuan ta a.

²⁹Tin, "LALPA Puan ina Joaba a tlan a, ngai teh, maicham bulah a awm," tiin lal Solomona chu an hrilh a. Tichuan lal Solomona chuan Jehoiada fapa Benaia chu, "Han bei tawh," tiin a tir a.

³⁰Tin, Benaia chu LALPA Puan inah a han kal a, a hnenah chuan, "Lalin lo chhuak rawh se,' a ti e," a ti a. Tin, ani chuan, "Ni lo e; hetah hian ka thi mai ang e," a ti a. Tin, Benaia chuan, "Joaban hetiang hian a lo ti a, hetiang hian mi lo chhang a ni," tiin lal hnenah thu a thlen leh a.

³¹Tin, lal chuan, a hnenah, "A sawi ang chuan han ti la, han bei la, phum rawh," a vang awm hauh loa Joaban thisen a chhuah lak ata kha kei leh ka pa chhungte hi i tihfihlim theihna turin.

³²Tichuan amah aia mi fel zawk leh tha zawk mi pahnih, Nera fapa Abnera, Israel sipai hotu leh Jethera fapa Amasa, Judate sipai hotu kha ka pa David hriat loha a beih a, khandaiha a thah avangin LALPA a thisen chu ama lu chungah ngei a rawn lettir ang.

³³Chutichuan thisen chu Joaba lu chungah leh a thlahte lu chungah kumkhuain a let ang a: Davida chungah te, a thlahte chungah te, a chhungte chungah te, a lalthutthleng chungahte erawh chuan LALPA hnen atanga thlamuanna kumkhuain a awm reng ang," a ti a.

³⁴chutichuan Jehoiada fapa Benaia chu a han chho a, a han bei a, a that ta a; tin, thlalerah ama inah chuan an phum ta a.

³⁵Tin, lalin Jehoiada fapa Benaia chu sipaihote chungah a ai a awhtir a: tin, puithiam Zadoka chu lalin Abiathara ai a awhtir a.

³⁶Tin, lalin Simeia chu a kohtir a, a hnenah, "Jerusalem-ah hian in sa la, chutah chuan awm la, chuta ta chu khawi dangah mah chhuak suh.

³⁷I chhuah ni, Kidron lui i kan ni la la chuan i thi ngei ngei ang tih hre rawh khai: i thisen chu nangma lu chungah ngei a awm ang," a ti a.

³⁸Tin, Simeia chuan lal hnenah, "A dik alawm: lalpa ka puin a sawi ang chuan i chhiahhlawhin a ti zel ang," a ti a.

³⁹Tin, Simeia chu Jerusalem-ah chuan rei fe chu a awm a. Tin, heti hi ani a, kum thum a lo vei hnu chuan Simeia chhiahhlawhte zinga pahnih chu gath khaw lal Maaka fapa Akisa hnenah an tlan a. Tin, 'Ngai teh, i chhiahhlawhte chu Gath khuaah an awm e," tiin Simeia chu an hrilh a.

⁴⁰Tin, Simeia chu a tho a, a sabengtung a thuam a, a chhiahhlawhte zawng turin Gath khuaah Akisa hnenah chuan a kal ta a: tin, Simeia chuan gath khua ata a chhiahhlawhte chu a va hruai ta a.

⁴¹Tin, Simeia chu Jerusalem khua ata a chhuak a, gath khuaah a va kal a, a lo haw leh tih Solomona chu an hrilh a.

⁴²Tin, lal chuan Simeia chu a kohtir a, a hnenah, "I chhiah ni, ram danga i chhuah ni la la chuan i thi ngei ngei ang,' ti khan LALPA hming chhalin chhia ka chhamtir chein, ka hriattir che ani lo'm ni? Tin, nang pawhin ka hnenah khan, 'I thu sawi ka hriat hi a tha e," i tih kha.

⁴³Eng vanga LALPA chhechham leh thu ka pek che kha hlen lo nge i nih?" a ti a.

⁴⁴Tin, lal vek chuan Simeia hnenah, "I thinlung chhungril suahsualzia, ka pa Davida chunga i tihziate kha i hre vek a: chutichuan LALPA'n i suahsualna hi nangma lu chungah ngei a rawn lettir ang.

⁴⁵Lal Solomona erawh chu malsawmin a awm ang a. Davida lalthutthleng chu LALPA hmaa kumkhuaa tihngheh ani ang," a ti a.Chutichuan lal chua Jehoiada fapa Benaia chu thu a pe a; ani chu a chuak a, a va bei a, a that ta a. Tichuan ram chu Solomona kutah tihnghehin a awm ta a.

⁴⁶Chutichuan lal chua Jehoiada fapa Benaia chu thu a pe a; ani chu a chuak a, a va bei a, a that ta a. Tichuan ram chu Solomona kutah tihnghehin a awm ta a.