Read Baibul, Mizo 1 Lalte 22 Bible Online

1 Lalte 22 - Baibul, Mizo bible

1 Lalte 22

¹Tin, kum thum chhung chu Suria ho le Israel-hote chu indo loin an awm a.

²Tin, a kum thum kum chuan heti hi a ni a, Juda lal Jehosaphata chu Israel lal hnena a zuk kal a.

³Tin, Israel chuan a puipate hnenah, "Ramoth-gilead kua hi keimahni ta ani tih hre reng sia engtia Suria lal hi chhusak loa awm mai mai kan i nge le?" a ti a.

⁴Tin, Jehosaphata hnena chuan, "Ramoth-gilead khua mi han beipui ve duh ang emaw chu?" a ti a. Tin, Jehosaphatan Israel lal hnena chuan, "Kei leh nang, ka mite leh mite chu pumkhat kan ni a, ka sakawrte leh i sakawrte chu pumkhat an ni alawm," a ti a.

⁵Tin, Jehosaphata chuan Israel lal hnenah, "LALPA thu ngaichang rih zet la maw le," a ti a.

⁶Chutichuan Israel lal chuan zawlneiho mi zali lai a ko khawm a, an hnenah, "Ramoth-gilead kua bei turin ka han tawk ang nge thawk lo ang?" a ti a. Tin, anni chuan, "Han thawk rawh, Lalpa'n lal kutah a pe dawn a ni," an ti a.

⁷Nimahsela Jesaphatan, "Hetah hian LALPA zawlnei dang tu emaw tal kan han rawn tur an awm lo em ni le?" a ti a.

⁸Tin, Israel lal chuan Jehosapahata hnenah, "LALPA min rawnsak tur mi pakhat Imla fapa Mikaia zawng a la awm kha maw; nimahsela ani hi chu ka huatzawng tak a ni; ka chungchang thu hi a chhe lam ngawt lo chu a tha reng reng a sawi ngai si lo a," a ti a. Tin Jehosaphata chuan, "Lal chuan chutiang chuan ti teh suh se a," a ti a.

⁹Tichuan Israel lal chuan hotu pakhat a han ko a, "Imla fapa Mikaia han hruai thuai teh," a ti a.

¹⁰Tin, Israel lal leh Juda lal Jehosaphata chu Samari kulh kawngka luhna bula hruih zawlah an lal puana intuamin, an lalthutthleng ve veah an thu a; tin, zawlnei zawng zawngte chuan an hmaah thu an sawi a.

¹¹Tin, Kenaana fapa Zedekian thir kite a siamsak a, "LALPA'n heti hian a ti, 'Hengte hian Suria-hote chu boral der kawpin i si ang,' tiin," a ti a.

¹²Chutiang bawkin zawlnei zawng zawngte chuan, Ramoth-gilead-ah chuan han cho la, han hlawhtling rawh khai. LALPA'n lal kutah hian a pe dawn a ni," tiin an sawi a.

¹³Tin, Mikaia va ko tura an tirha chuan a hnenah, "Ngai teh khai, zawlnei hian thukhat vuain a tha lamin lal hnena thu a sawi theuh a; an sawi tak theuh ang chuan han sawi ve la, a tha lamin han sawi ve rawh aw," tiin a sawi a.

¹⁴Tin, Mikaia chuan, "LALPA nunna chhalin ka sawi e, LALPA'n ka hnena a sawi chu ka ni, ka han sawi dawn ni," a ti a.

¹⁵Tin, lal hnen a han thlen chuan, lal chuan a hnenah, "Mikai, Ramoth-gilead khua bei turin kan han thawk ang nge, thawk lo ang?" a ti a. Tin, ani huan a chhang a. "Han thawk la, han hlawhtling rawh khai; LALPA'n lal kutah a pe dawn a ni," a ti a.

¹⁶Tin, lalin a hnenah, "Thutak ngawt lo ka hnena LALPA hminga sawi lo turin vawi engzat nge maw chia ka chhamtir dawn che le?" a ti a.

¹⁷Tin, ani chuan, "Israel-ho zawng zawngte chu vengtu nei lo beram angintlangahte an darh vek ka hmu a; LALPA'n, 'Hengho hian hotu an nei ta lo a, mi tin, mahni in lamah thlamuang takin haw dial mai rawh se,' a ti a ni," a ti a.

¹⁸Tin, Israel lal chuan Jehosaphata hnenah, "Ka chungchang thu hi a chhe lam ngawt lo chu a tha lam reng reng zawng a sawi lo ang tih ka hrilh che ani lawm ni kha?' a ti a.

¹⁹Tin, ani chuan, "Chuvangin LALPA thu hi ngaithla teh, LALPA chu a lalthutthlenga thu ka hmu a, vana mipuiho zawng zawng, a dinglam leh veilama dingte nen.

²⁰Tin, LALPA'n, 'Aaba hi Ramoth-gilead khuaa han kala rala thi turin tuin nge thlem ang?" a ti a ni. Pakhatin hetiang hian a ti a, mi dangin chutiang chuan a ti a.

²¹Tichuan thlarau pakhat hi a lo chuak a, LALPA hmaah a ding a, 'Keima'n ka thlem ang e,' a ti a.

²²Tin, LALPA'n a hnenah, 'Engin maw?' a ti a. Tin, ani chuan 'Ka va kal ang a, a zawlnei zawng zawngte hmuiah chuan thlarau dawtheiah ka va chang ang,' a ti a. Tin, anin, 'I thlem ngei ang a, hlawh pawh i hlawhtling bawk ang; va kal ta la, chutiang chuan va ti tawh le,' a ti a.

²³Chutichuan ngai teh, LALPA'n he'ng i zawlneiho zawng zawng hmuiah hian tlarau dawthei a dah a, i chungchang thu hi a tha lo lamin LALPA'n a sawi tawh a ni," a ti a.

²⁴Tichuan Kenaana fapa Zedekia chuan a rawn naih a, Mikaia bianga a rawn beng a, "LALPA thlarau chuan i hnena thu sawi turin khawi lamah nge mi kalsan?" a ti a.

²⁵Tin, Mikaia chuan, "Ngai rawh, pindan chhungrila biru tura i luh niin i la hria ang," a ti a.

²⁶Tin, Israel lal chuan, "Mikaia hi hruai u la, khawpui awptu Amona leh lal fapa Joasa hnena kalpui leh tawh u;

²⁷tin, 'Lalin heti hian ati, He mi hi lung ina khung u la, thlamuang taka ka lo haw leh hma lo chuan chaw leh tui tlemte chauh pe raw u, tiin,' ti rawh u," a ti a.

²⁸Tin, Mikaia chuan, "Thlamuang taka i lo haw leh hrim chuan LALPA'n kei mi hmangin thu a sawi lo ani ang le," a ti a. Tin, amah vek chuan, "Nangni, mipuite u, in vaiin lo hre rawh u," a ti a.

²⁹Chutichuan Israel lal leh Juda lal Jehosaphata chu Ramoth-gilead khuaah chuan an han cho a.

³⁰Tin, Israel lal chuan Jehosapahta hnenah, "Ka inbawl danglam ang a, inbeihnaah chuan ka han kal ve ang e; nang erawh chuan i lal puan sin ang che," a ti a. Tichuan Israel lal chu a inbawl danglam a, inbeihnaah chuan a han kal a.

³¹Tin, Suria lal chuan a tawlailir chunga hotu sawmthum leh pahnihte hnenah chuan, "Israel lal ngawt lo chu mi te pawh, mi lian pawh a tuama bei su ang che u," tiin thu a pe a.

³²Tin, tawlailir chunga hotute chuan Jehosaphata an han hmuh chuan, heti hi a ni a, "Israel lal a ni ngei mai le," an ti a; tichuan beih tumin an hual ta a; tin, Jeosaphata chu a au chuak a.

³³Tin, tawlailir chunga hotute chuan Israel lal ani lo tih an hriat chuan heti hi a ni a, an um chu an let leh ta a.

³⁴Tin, mi pakhat hian tum bik nei loin a thalngul a kuai a, Israel lal chu awmphaw leh awmphaw inkara a kap a: tichuan a tawlailir khalhtu hnenah, "Kai her la, sipaiho zing ata hi mi chauhpui rawh khai, hliam na tak ka tawh tak hi," a ti a.

³⁵Tin, chu mi ni chuan inbeihna chu a nasa ta hle mai a; lal chu a tawlailir chuan Suria-hote hmuhah an dintir a, tin, tlai lama chuan a thi ta a: tin, amah an hliamna atang chuan thisen chu tawlailir chhunga chuan a luang zawih zawih a.

³⁶Tin, ni tlak dawn vel lai chuan, sipaihote zingah, "Mi tin, mahni khaw lamah mi tin mahni ram lama haw vek tawh rawh se," tiin an au vel ta chiam a.

³⁷Chutichuan lal chu a thi ta a, Samari khuaah an luhpui a; tichuan Samari khuaah lal chu an phum ta a.

³⁸Tin, Samari khaw dil kama tawlailir chu an sil a; tin, LALPA thu sawi ang ngei khan uiin a thite chu an liak ta a; (chutah chuan nawhchizuarhote chu an insil thin).

³⁹Tichuan Ahaba chanchin dangte, a thiltih zawng zawng te, a saingo in sak te, a khaw siam zawng zawngte chu Israel lalte lal lai thu ziakna buah a chuang a ni lo'm ni?

⁴⁰Chutichuan Ahaba chu a pute hnena chuan a muhil ta a; tin, a fapa Ahazia chu a aiawhin a lal ta a.

⁴¹Tin, Israel lal Ahaba lal kum linaa Asa fapa Jehosaphata chu Judate chunga a lal tan a.

⁴²Jehosaphata chu a lal tan la chuan kum sawmthum leh kum nga a ni a; Jerusalem khuaa kum sawm hnih leh kum nga ro a rel a. A nu hming chu Azubi, Silhia fanu a ni.

⁴³Tin, a pa Asa kawng zaw zawng zawng chu a zawh ve a; pensan hauh loin LALPA mithmuha thil tha a ti thin a; hmun sangte erawh chu a thehthang bo lo a, hmun sangahte chuan mite chu an la inthawiin, rimtui an la hal reng thin.

⁴⁴Tin, Jehosaphata chuan Israel lal nena inremna a siam a.

⁴⁵Tichuan Jehosaphata chanchin dang te, a thiltihtheihzia a tilan thu te, a ral beih thute chu Juda lalte lal lai thu ziakna bua a chuang a ni lo'm ni?

⁴⁶Tin, a pa Asa dam laia mipa inzuarho la awmate kha a ram ata a hnawtchuak vek a.

⁴⁷Tin, Edom rama chuan lal an awm lo a, lal aiawhtuin ro a rel a.

⁴⁸Jehosaphata chuan Ophir-a rangkachak phur tur Tarsis lawngte a tu a; nimahse an kal ta lo; Ezion-geber hmunah lawngte chu a chhe ta vek si a.

⁴⁹Tichuan Ahaba fapa Ahazian Jehosaphata hnenah, "Ka mite hi i mite nen lawngahte kal za ang hmiang," a ti a. Nimahsela Jehosaphata chuan a remti lo.

⁵⁰Tin, Jeosaphata chu a pute hnena a muhil a, a pute zingah a pu Davida khawpuiah an phum ta a; tin, a fapa Jehorama chu a aiawhin a lal ta a.

⁵¹Tin, Juda lal Jehosaphata lal kum sawm leh kum sarih kumin Ahaba fapa Ahazia chu Samari kuaah Israelte chungah a lal tan a, Israelte chunga kum hnih a lal a.

⁵²Tin, LALPA mithmuhah thil tha lo a ti thin a, a nu leh a pa kawng zawh te, Nebata fapa Israel-hote tihsualtirtu Jeroboama kawng zawhte a zawh ve thin a.Tin, a pa ti ang apiang tiin Baala rawng a bawl a, a be thin a, LALPA, Israelte Pathian chu a tithinrim thin a.

⁵³Tin, a pa ti ang apiang tiin Baala rawng a bawl a, a be thin a, LALPA, Israelte Pathian chu a tithinrim thin a.