Read Baibul, Mizo 1 Lalte 3 Bible Online

1 Lalte 3 - Baibul, Mizo bible

1 Lalte 3

¹Tin, Solomonan Aigupta lal Pharaoa nena inkungkaihna a siam a, Pharaoa fanu a nei a, ama in leh LALPA in a sak hma leh Jerusalem khua kulha a hung vel hma loh chuan Davida khawpuiah a awmtir a.

²Mipuihote chu hmunsangahte an inthawi mai thin a, chu mi hma chuan LALPA hming atan in sak a la awm rih loh avangin:

³Solomona chuan LALPA chu a hmangaih a, a pa Davida thuruatte chu a zawm thin a: hmun sangahte a inthawi a, rimtuite a hal mai thin pawh a.

⁴Tin, lal chu inthawi turin Gibeon khuaah a kal a; chu chu hmun sang pawimawh taka chu ani si a; Solomona chuan chu mi maicham chungah chuan halral thilhlan sangkhat zet a hlan a.

⁵Tin, Gibeona khuaah chuan LALPA Solomona hnenah zanah a mumangah a rawn inlar a: tin, Pathianin, "Dil teh, eng nge ka pek ang che?" a ti a.

⁶Tin, Solomona chuan, "I chhiahhlawh ka pa Davida kha i mithmuhah thutakah leh, felnaah leh, thinlung dik tak pua a awm ang zel khan nang chuan a hnenah khawngaihna nasa tak i lantir a; nangin k he khawngaihna nasa tak hi a tan i vohsak a, nangin a lalthutthlenga thu tur fapa i pe a, vawiina a lo awkm ta ngei ang hian.

⁷Tichuan aw LALPA ka pathian, nangin i chhiahhlawh hi ka pa Davida aiah chuan lalah i lo siam ta a: kei zawng naupang chhia mai ka ni a; thu haw lam leh kal lam pawh hi ka la hre lo a.

⁸I chhiahhlawh hi mite i thlanho, mi tam tak, an tam avanga chhiar sen rual loh leh, a zat hriat sen rual lohte zingah hian a awm a ni a.

⁹Chutichuan i mite rorelsakna turin i chhiahhlawh hi hriatna thinlung pe ang che, a chhia leh a tha ka thliar theihna'n; i mi heti zozai hi tuin nge rorelsak thei ang le?" a ti a.

¹⁰Tin, Solomona chu thil chu a dil avangin, chu thu sawi chuan LALPA a tilawm hle mai a.

¹¹Tin, Pathianin a hnenah, "Nangin i tan dam reina dil lo a, hetiang hi i dil zawk avang leh, i tan hausaknate pawh dil lo a, i hmelmate thihna pawh dil lo a, i tan rorel thiamna i dil zawk avangin,

¹²ngai teh, i dil ang chuan ka ti ta a: ngai teh, finna leh hriatna thinlung ka pe a che; tichuan i hmaah nangmah ang reng reng tumah an awm lo a, i hnuah pawh nangmah ang reng reng chu tumah an lo awm tawh hek lo ang.

¹³Tin, i dil loh, hausakna leh ropuina pawh ka pe bawk ang che; tichuan i dam chhungin lal zingah chuan nangmah ang reng reng an awm lo ang.

¹⁴I pa Davida'n a zawh anga ka thuruatte leh ka thupekte pawm tura ka kawngte i zawh chuan ka dam reitir bawk ang che," a ti a.

¹⁵Tin, Solomona chu a han harh a, ngai teh, mumang a lo ni a: tin, Jerusalem-ah a kal a, LALPA thuthlunna bawm hmaah a ding a, halral thilhlan leh remna thilhlante a hlan a, a puipa zawngte tan ruai a theh a.

¹⁶Hmeichhe pahnih, nawhchizuar, lal hnenah chuan an kal a, ahmaah an han ding a.

¹⁷Tin, hmeichhe pakhat chuan, "Aw ka pu, hmeichhia nen hian in khata cheng dun kan ni a; chu mi ina a awm ve lai chuan nau ka hring a.

¹⁸Tin, heti hi a ni a, ka nau hrin achin ni thum hnuah chuan he hmeichhia pawh hian a hring ve a; a awmdun kan ni a; chu ina awm keimahni pahnih ngawt lo chu, chu inah chuan tumah mikhual awm an awm lo a.

¹⁹Tin, he hmeichhe fa hi zanah a lo thi a; a delhhlum a ni.

²⁰Tichuan zan laiah a tho a, i bawihnu hi a muthilh hlanin, ka fapa ka bula mi chu a la a, a pawm a, a fa thia chu mi pawmtir a.

²¹A tuk zinga ka fa hnute pe tura ka han thawh chuan, ngai teh, a thi a lo ni reng mai a: nimahsela zingah ka han en chian chuan, ngai teh, ka fapa, ka hrina kha kha a lo ni hauh lo mai a," a ti a.

²²Tin, hmeichhe dang chuan, "Ni lo, a dam zawka hi ka fapa ani a, a thia hi i fapa a ni," a ti ve a. Pakhata chuan, "Ni lo, a htia hi i fapa a ni a, a dama hi ka fapa ani zawk," a la ti tlat bawk a. Chutiang chuan lal hmaah chuan an sawi ve ve a.

²³Tichuan lal chuan, "Pakhatin, 'A dam zawka hi ka fapa ni a, a thia hi ifapa ni' a ti a: tin, pakhatin, 'Ni lo a htia hi i fapa a ni a, a dama hi ka fapa ani zawk,' a ti bawk si a," a ti a.

²⁴Tin, lal chuan, "Khandaih mi han lak teh u," a ti a. Tichuan khandaih chu lal hmaah chuan an rawn la a.

²⁵Tin, lal chuan, "Naute dama kha bung hnihah chhuah u la, a chanve chu pakhat kha pe u la, a chanve chu pakhat kha pe rawh u," a ti a.

²⁶Tichuan naute dama nu chuan a fa chu alainat em em mai si a, lal hnenah chuan, "Aw ka pu, naute dama hi mah pe mai rawh, a thah zawng that lul suh ang che," a ti a. Pakhat zawk erawh chuan, "Ka ta ni bik hek suh, i ta ni bik hek suh; bung mai rawh," a ti a.

²⁷Tichuan lal chuan a chhang a, "Naute dama kha pe rawh u, that hlek suh u: amah ngei kha anu a nih kha," a ti a.Tin, Israel-ho zawng zawng chuan chu thua lal rel dan chu an lo hria a; lal chu an tih ta hle mai a: rorelna turin Pathianin finna chu amahah chuan a awm tih an hre ta si a.

²⁸Tin, Israel-ho zawng zawng chuan chu thua lal rel dan chu an lo hria a; lal chu an tih ta hle mai a: rorelna turin Pathianin finna chu amahah chuan a awm tih an hre ta si a.