Read Baibul, Mizo 1 Lalte 7 Bible Online

1 Lalte 7 - Baibul, Mizo bible

1 Lalte 7

¹Tin, Solomona chuan ama in chu kum sawm leh kum thum a sa a, a in chu a peih vek a.

²Lebanon Ngawpui In sidar ban tlar li, ban chunga sidar thingphel chungah chuan a sa bawk a; a dung lam chu tang za ani a, a vang lam chu tawng sawmnga a ni a, a san lam chu tawng sawmthum a ni.

³Tin, chu chu bana innghat pindan sawmli leh panga chung lamah chuan sidar thingphela khuh ania ; tlar khatah chuan sawm leh pa nga zel.

⁴Tin, tlar thumin tukverh a awm a, eng leh engte chu tlar thumin a inep vek a.

⁵Tin, kawngkhar leh ban zawng zawngte chu thingphelin kil lia siam a ni a: eng leh engte chu tlar thumin a inep vek a.

⁶Tin, hulhliap chu ban neiin a siam a; a dung lam chu tawng sawmnga ani a, a vang lam chu tawng sawmnag a ni a, a vang lam chu tawng sawmthum a ni a; tin, chung hmaahte chuan hulhliap a siam a; bante leh ahmaa luhna kailawnte nen.

⁷Tin, a rorelna tur lalthutthleng hulhliap, rorelna hulhliap chu a siam bawk a: chu chu chhuat lehlam atanga a lehlam thlenga sidar thinga khuh a ni.

⁸Tin, a awmna tur in, hulhliap chhung, hungchhung kawtlai danga awm chu chutiang bawka siam a ni. Pharaoa fanu (Solomona nupuia neiha chu) chu hulhliap ang bawk chuan a in a saksak bawk a.

⁹chung zawng zawng chu lung man tam tak tak, lung a tawk chiah zela chher, zainaa zaia sak a ni a, chhung lam pawh, pawn lam pawh a lungphum atanga a ler thlengin, tin, chutiang bawkin pawn lamah hungchhung kawtlai zau tak thlengin.

¹⁰Tin, lungphu chu lung man tam tak tak, lung lian pui pui, lung tawng sawmte, lung tawng riattea rem a ni a.

¹¹Chu mi chung lam chu lung man tam tak tak, lung a tawk chiah zela chher, leh sidar thing a ni a.

¹²Tin, a velin hungchung kawtlai zau tak chu lung chher chhawng thum leh sidar thingphel thuah khata hung a ni a; LALPA in hungchhung kawtlai chhungril zawk leh, in hulhliap ang bawk khan.

¹³Tin, Lal Solomonan mi a tir a, tura khua ata Hirama a ko a.

¹⁴Chu mi chu Naphtali hnam hmeithai fa a ni a, a pa chu tura khuaa mi, dar chher mi a ni a; ani chu dar chher kawngah reng reng chuan a fingin a hrethiamin a themthiam hle mai a. Lal Solomona hnenah chuan a kal a, a hna zawng zawng chu a thawhsak vek a.

¹⁵tin, tawng riata sang dar ban pahnih a siam a; a lehlam chu tawng sawm leh tawng hnih a ni ve ve a.

¹⁶Ban chhipa dah tur dar chhun bawk pahnih a siam a: bawk pakhat san lam chu tawng nga ani a, tin, bawk pakhat san lam pawh chu tawng nga a ni.

¹⁷Ban chhipa bawk atante chuan tial chik chek leh herh chin chiante hi a awm a; bawk pakhat atan chuan pasarih, tin, bawk pakhat atan pawh chuan pasarih bawk.

¹⁸Tichuan bante chu a siam a; chung ban chhipa bawkte tuamna tur chuan tial chik cher pakhat chungah a velin tlar hnih a awm a: tin, chutiang bawk chuan bawk pakhat chungah pawh a awmtir bawk a.

¹⁹Tin, hulhliap chhipa bawkah chuan lili lem hi a chuang a, tawng li.

²⁰Tin, ban pahnih chhipa bawkahahte chuan a tlangah, tial chik chek bul lawkah chuan pawmgranet te a awm bawk a: tin, pawmgranet chu chu mi bawkahte chuan a tlangah, tial chik chek bul lawkah chuan pawmgranet te a awm bawk a: tin, pawmgranet chu chu a bawkahte chuan zahnih ve ve a tlarin a awm a.

²¹Tin, biak in hulhliapah chuan bante chu a dintir a: ding lam ban chu a dintir a, a hmingah Jakin a vuah a: tin, vei lam ban chu a dintir a, a hmingah Boaz a vuah a.

²²Tin, a ban chhipah chuan lili lem a chuang a: tichuan ban lam hna chu peih a ni ta a.

²³Tin, dar tuizem lianpui, tawng sawm tla, a san lam tawng nga a chhung a: a tlang chu tawng sawmthum bial vel a ni.

²⁴Tin, a tlang hnuaiah chuan kuhmum leh hian a vel chhuak a, tawng sawm a ni a, zem vel chuan a awm a: chung kuhmumte chu tlar hnihin a awm a, chhung tel nghal a ni.

²⁵chu chu bawngpa sawm leh pahnih chungah a innghat a, pathumin hmar lam an hawi a, pathumin thlang lam an hawi a, pathumin chhim lam an hawi a, pathumin chhak lam an hawi a. Tin, tuizem chu an chungah chuan a inhung a, an mei lam chuan chhung lam a hawi a,

²⁶tichuan kutphah bawka chhah a ni a; a tlang chu lili pangpar ang, no tlang anga siam ani a: bath sanghnih dawng a ni.

²⁷Tin, hunchhan swm darin a siam a; hunchhan pakhat sei lam chu tawng li ani a, a vang lam chu tawng li bawk a ni a, a a san lam chu tawng thum a ni.

²⁸Tin, hunchhan siam dan chu hetiang hi a ni: chung chuan khuar a nei a, a khuarte chu a tlangte inkarah a awm a:

²⁹tin, a tlangte inkar khuarahte chuan sakeibaknei te, sebawngpa te, cherub te a chuang a; a tlang chungahte chuan ahunchhan a awm a: tin, sakeibakneite leh sebawngpate hnuai lamah chuan cheimawina te tete pawh a awm thliah a.

³⁰Tin, hunchhanahte chuan dar tawlailir pali leh dar tlung a awm theuh va: a kil liahte chuan innghahna a awm theuh va: insilna bel hnuai lamah chuan a innghahna chhun a awm a, a sir theuhvah chuan cheimawina a awm theuh a.

³¹Tin, belval kual chhung kotlang chu tawng khat tla a ni a: a rawng kotlang chu belval anga bial a ni a, tanwg khat leh a chanve a ni: tin, a rawng tlang vel chu tial mawi ani a, a khuarte chu kil li a ni a, a bial lo.

³²Tin, tawlailir palite chu a khuar hnuai lamahte chuan a awm a; tin, tawlailir tlungte chu hunchhanah chuan a awm a: tawlailir san lam chu tawng khat leh a chanve a ni.

³³Tin, chu tawlailir siam dan chu sakawr tawlailir ke siam dan ang hi a ni a: a tluing te, a belval kual te, a chhunkalhna te, a lai bawkte chu chhun vek a ni.

³⁴Tin, hunchhan kil li theuhvah chuan innghahna pali a awm a: chu mi innghahnate chu hunchhan nen pumkhat vek a ni.

³⁵Tin, a hunchhan chungah chuan belvalkuial, tawng chanvea sang hi a awm a: hunchhan chunga a hunna kete leh akhuarte chu pumkhat vek a ni.

³⁶Tin, a hunna ke phekahte leh, a khuarahte chuan a zau angzia ziain cheub te, sakeibaknei te, tum thingte a hchuantir a, a vel chuan cheimawina hi a awm thliah a.

³⁷Chutiang vek chuan hunchhan sawmte chu a siam a: a vai chuan pumkhata chhun a ni theuh a, intiat thiau, siam dan inang chiah vek a ni.

³⁸Tin, insilna bel sawm darin a siam a: insilna bel pakhat chuan bath sawmli a dawng a: insilna bel chu tawng li theuh a ni: hunchhan sawm chungah chuan insilna bel pakhat a inhung theuh a.

³⁹Tin, buhchhante chu in ding lampangah panga a hung a, in vei lampangah panga: tin, tuizem chu in ding lampangah chhak lamah chhim chhawngin a hung a.

⁴⁰Tin, Hirama chu insilna bel te, vut lawhna te, maihunte a siam a. Chutichuan Hirama chuan LALPA in atan Solomona a siamsak zawng zawng chu a peih ta vek a:

⁴¹ban pahnih te, ban chhipa bel anga bawk pahnih te, ban chhipa bel anga bawk pahnih tuamna tial chik chek pahnih te,

⁴²chu mi tuamna tial chik chek pahnih atana pawmgranet zali te, ban chhipa bel anga bawk pahnih tuamna tur tial chik chek ve ve atana pawmgranet tlar hnih te kha;

⁴³tin, hunchhan sawm leh hunchhan chunga insilna bel sawm te,

⁴⁴tuizem leh a hnuaia sebawngpa sawm leh pahnih te,

⁴⁵belte leh, vut lawhnatte leh, maihunte nen: chung bungbel zawng zawng LALPA in atana Hiraman lal Solomona a siamsak chu dar nawh tleta siam vek a ni.

⁴⁶Jordan phai zawlah Sukkoth leh Zarethan inkar bellei hmunah a ni, lal chuan a chhun ni.

⁴⁷Tin, Solomona chuan chung bungbel zawng zawngte chu a tam em em avangin buk chhuah lohin a dah mai a: dar buk zat chu hriat chhuah rual a ni lo.

⁴⁸Tin, Solomona chuan LALPA ina bungbel awm zawng zawng chu a siam a; rangkachak maicham leh chhangdah awmna dawhkan chu, rangkachakin.

⁴⁹Tin, biakna hmun hma zawn khawnvar dahna dinglama panga leh vei lama panga chu rangkachak hlir hlakin; pangpar te, khawnvarte leh chaichete leh rangkachakin;

⁵⁰no te, khawnvar puan chehna te, maihun te, fian te, meilakna te chu rangkachak hlir hlakin; in chhun gril zawk , hmun thianghlim ber kawngkhara mite leh in (biak in chu) kawngkhar vuahnate chu rangkachakin.Chutichuan lal Solomonan LALPA in atana a siam zawng zawng chu a lo peih ta vek a. Tichuan Solomona chuan a pa Davida lo hlan sa tawh - tangkarua te, rangkachak te, bungbel te chu a la lut a, LALPA ina rote zingah a dah ta a.

⁵¹Chutichuan lal Solomonan LALPA in atana a siam zawng zawng chu a lo peih ta vek a. Tichuan Solomona chuan a pa Davida lo hlan sa tawh - tangkarua te, rangkachak te, bungbel te chu a la lut a, LALPA ina rote zingah a dah ta a.