Read Baibul, Mizo 1 Lalte 9 Bible Online

1 Lalte 9 - Baibul, Mizo bible

1 Lalte 9

¹Tin, heti hi a ni a, Solomonan LALPA in leh lal in a saka Solomonan chak taka a tum zawng zawng a tihzawh vek hnuah chuan,

²Gibeon khuaa a hnena a inlar ang khan LALPA chu Solomona hnenah a rawn inlar leh a.

³Tin, LALPA chuan a hnenah, "I tawngtaina leh i dilna ka hmaa i rawn thlente kha ka lo ngaithla a: he mi in i sak hi kumkhuaa ka hming awmtirna'n ka tithianghlim tawh e; ka mit leh ka thinlung chu chutah chuan a awm kumkhua tawh ang.

⁴Tin, nang pawh hi thu ka pek apiang che anga ti tura i pa Davida awm anga thinlung tha tak pu leh rilru dik tak pua ka mite hmuha i awm a, ka thuruatte leh ka rorelte i pawm reng zangin,

⁵Israelte chungah hian i ram lalthutthleng chu kumkhua atan ka tinghet ang; i pa Davida hnenah 'Israelte lalthutthlenga thu tur i hmai lo ang,' tia ka lo tiam tawh ang khan.

⁶Amaherawhchu nangin emaw, in thlahten emaw mi zui chu min kirsan a, ka thupekte leh ka thuruate ka hriattir che u hi in pawm loh a, pathian dangte rawng in va bawl a, in vabiak chuan,

⁷Israel hote hi ram ka pek ata ka tiboral ang a; tin, he mi in ka hming atana ka tihthianghlim tawh sa hi ka mithmuh phak loah ka sawn bo daih ang; tichuan Israelte hi hnam tinrengte zingah tihelna leh a chhe lam tehkhinnaah hman an la ni ang a:

⁸tin, he in i sang teh mah se la, a kal pel apiangte chuan maik tiin an la faifuk ang a, 'Engati nge LALPA'n he ram leh he in hi heti taka a tih le?' an ti ang.

⁹Tin, miten, 'LALPA an Pathian, an pute Aigupta ram ata hruai chhuaktu kha an kalsan a, pathian dangte an vuan a, an bia a, an rawngte an bawl tak vang a ni; chuvangin LALPA'n he'ng chhiatna zawng zawngte hi an chungah a rawn thlentir ta anih hi,' tiin an la chhang ang," a ti a.

¹⁰Tin, heti hi a ni a, Solomonan in pahnih, LALPA in leh lal in a sak chhung, kum sawmhnih a vei hnuin

¹¹(tura lal Hiraman Solomona chu sidar thin te, far thing te, rangkachakte a mamawh apiang a tum vek ani a,) lal Solomona chuan Hirama chu Galili rama khaw sawmhnih a pe a.

¹²Tin, Hirama chu tura khua atangin Solomonan khua apekte chu en turin a chhuak a; a duhzawng a ni lo hle a.

¹³Tin, ani chuan, "Ka unaupa, he'ng i kawh mi pekte hi khaw eng nge maw ni ngai le?" a ti a. Tichuan tun thleng hian Kabul ram an ti ta a ni.

¹⁴Tin, Hirama chuan lal chu rangkachak talent 120 a thawn a.

¹⁵Lal Solomonan hnathawka rawih lui pawl a siam chhan chu hei vang hi a ni: LALPA in leh ama in satu atan leh, Millo te, Jerusalem kulh te, Hazor khua te, Megiddo khua te, Gezer khua te siamtu atan a ni.

¹⁶Aigupta lal Pharaoa chu a han chho a, Geer khua han la a, a hal a, chu khua a awm Kanaan hote chu a that a, a fanu Solomona nupui chu inthlahna thilpek atan alo pe tawh a ni.

¹⁷Tin, Solomonan Gezer khua te, Beth-horon thlangta zawk khua te,

¹⁸Baalath khua te, Israel rama thlaler Tamar khua te,

¹⁹Solomonan thil dah khawmna khua neih zawng zawng te, a tawlailir dahna khua te leh, a sakaw chungchuang mi dahna khua te, Jerusalem khuaah te, Lebanon-ahte leh a rorelna ram chhung zang zanga Solomonan chak taka siam a tum zawng zawngte chu a siam a ni.

²⁰Tin, Israela thlahte ni ve lo, Amor-ho te, Hit-ho te, Periz-ho te, Hebus-ho la awm chhun zawng zawngte kha chu,

²¹an thlah, chung rama la awm Israela thlahten an tihboral zawh vek theih lohvate zingah chuan Solomonan chhiahhlawh, hnathawka rawih luih pawl a siam a, tun thleng hian.

²²Israela thlahte erawh chu Solomonan chhiahhlawhah a siam ve lo va: indo mi te, a puipa te, a mi lian te, a sipai hotu te, a tawlailir leh a sakaw chungchuang mi hotute an ni zawk a ni.

²³Chungte chu Solomona hna chunga hotu bik 550, hnathawk vengtute chu an ni.

²⁴Pharaoa fanu erawh chu Davida khaw pui ata chu ama in, Solomonan a saksakah chuan a chho ta a: tichuan Millo chu a siam ta a.

²⁵Tin, Solomona chuan LALPA tana maicham a siamah chuan kum tin, vawi thum halral thilhlan leh remna thilhlan a hlan thin a, LALPA hmaa maichamah chuan rimtuite a hal tel bawk thin a. Chutichuan in chu a peih ta a.

²⁶Tin, lal Solomona chuan Edom rama Tuirinfiat Sen kam Eloth bula awm Eziongeber hmunah lawng rual a siam a.

²⁷Tin, Hioraman a chhiahhlawh lawng mite tuifinriata che thang, lawnga Solomona chhiahhlawhte kalpuiah a ti ra.Chumite chu Ophir-ah an va kal a, chuta mi chu rangkachak talent 420 an rawn hawn a, lal Solomona hnenah an rawn thlen a.

²⁸Chumite chu Ophir-ah an va kal a, chuta mi chu rangkachak talent 420 an rawn hawn a, lal Solomona hnenah an rawn thlen a.