Read Baibul, Mizo 2 Lalte 4 Bible Online

2 Lalte 4 - Baibul, Mizo bible

2 Lalte 4

¹Zawlneite fapaho nupuite zinga hmeichhe pakhat hian Elisa hnenah, "I chiahhlawh, ka pasal chu a thi ta a; tin, i chiahhlawh khan LALPA chu a tih thin tih i hria : ei a leibatna chu ka fate pahnih bawih atana hruai turin a lo kal a ni," tiin a mangan thu a sawi a.

²Tin, Elisan a hnenah, "Engnge i neih?" a ti a. Tin, ani chuan, "I bawinu sahriak um khat chauh lo chu inah engmah ka nei lo," a ti a.

³Tichuan ani chuan, "Va kal a la, i thenawmteho zawng zawng bel, bel ruak va hawh khawm tawh khai: tlemte mai zawng hawh suh.

⁴Tin, lut la, nang leh i fapate nen kawng inkhar khum u la, chung bel zawng zawngah chuan thun langin; a khat chu dah hrang zel ang che," a ti a.

⁵chutichuan a hnen ata chu a kal ta a, ama leh a fapate nen chuan kawng an inkhar khum a; anni chuan belte chu an rawn la a, ani chuan a lo thun zel a.

⁶Tin, belte chu a khah hnu chuan, heti hi a ni a, a fapaa hnenah, "Bel mi han lak leh rawh," a ti a. Tin, ani chuan, "Bel a awm tawh lo," a ti a. Tin, sahriak chu a kang ta a.

⁷Tichuan Pathian mi chu a va hrilh a. Tin, ani chuan, "Va kal la, sahriak chu va zuar ta la, i leiba chu va rul langin, a bak chuan i fapate nen va khawsa tawh u," a ti a.

⁸Tin, ni khat chu Elisa chu Sunem khuaah a va zin a, chutah chuan hmeichhe neinung tak a awm a; ani chuan chaw ei turin a lo kai lut a. Chutichuan a kal apiangin chutah chuan chaw ei turin a lut thin a.

⁹Tin, ani chuan a pasala hnenah, "Ngai teh hei, he mi mi rawn pal fo thintu hi Pathian mi thianghlim a ni tih ka hria e.

¹⁰Hawh teh, in chhawng te i siamsak ang khai, khum te, dawhkan te, thutphah te, khawnvar dahna te i dahsak ang; tichuan kan hnena a lo kal apiang hian alut thin dawn nia," a ti a.

¹¹Tin, ni khat chu a va kal leh a, chu mi in chhawngah chuan a va lut a,a mu a.

¹²Tin, a chhiahlawh Gehazia hnenah, "He Sunam nu hi han ko teh," a ti a. Tin, a va koh hnu chuan a hmaah a lo ding a.

¹³Tin, anichuan a hnenah, "Ngai teh, nangin hei theihtawpin min duat a, eng nge kan tihsak ve ang che, lal emaw, sipai hotu emaw biaksak che i duh em?' tiin a hnenah hian sawi teh," a ti a.

¹⁴Tin, ani chuan, "Eng emaw chu kan tihsak tak ang?" a ti a. Tin, Gehazia huan a chang a, "Gapa chu a nei hauh lo mai ale, a apsal lah chu a tar tawh si a," a ti a.

¹⁵Tin, ani chuan, "Va ko teh," a ti a. Tin, a va koh hnu chuan kawngkaah a lo ding a.

¹⁶Tin, ani chuan, "Tun ang hun a lo thlen leh tikah chuan fapa i pawm tawh ang," a ti a. Tin, ani chuan, "A, ka pu, nang Pathian mi, i bawihnu lakah hian daw ma ta che," a ti a.

¹⁷Tin, hmeichhia chu a rai a. Elisan a hnena a sawi ang ngei khan chu mi hun a lo thlen leh chuan fapa a hring ta a.

¹⁸Tin, nausen chu a lo sei lian a, ni khat chu a pa hnenah buh latute hnenan a kal ve a.

¹⁹Tin, a pa hnenah chuan, "Ka lu, ka lu," a ti a. Tin, a ni chuan a chhiahhlawh hnenah, "A nu hnenah pawm tawh," a ti a.

²⁰Tin, a hruai a, a nu hnen a thlen chuan a mal chungah chuan tlai thlengin a thu a, tichuan a thi ta a.

²¹Tin, a chho a, Pathian mi khumah chuan a han mut a, kawng a kharkhum a, a chhuak ta a.

²²Tin, a pasal chu a au a, "Chhiahhlawh tu emaw leh sabengtung pakhat emaw mi han ngaihtuahsak teh, Pathian mi hnenah ka va tlan ang a, ka lo kir leh ang e," a ti a.

²³Tin, ani chuan, Eng atan nge vawin khera a hnena kal i tum? Thla thar pawh a la ni lo a, chawlhni pawh a la ni si lo a," a ti a. Tin, a ni chuan, "A rem mai ang," a ti a.

²⁴Tichuan sabengtung a thuam a, a chhiahhlawh hnenah, "Tlantir la, kal zel rawh khai; thu ka pek loh che chuan mi timuang hauh suh a ti a.

²⁵Chutichuan a kal ta a, Pathian mi hnenah chuan Karmel tlangah a va kal a. Tin, Pathian mi chuan hla tak atanga lo hmuh chuan, heti hi a ni a, a chhiahhlawh Gehazia hnenah, "En teh, sawta saw Sunam nu khaani;

²⁶amah hmuak turin va tlan la, a hnenah, "I dam em le? I pasal a dam em? Naupang kha a dam em? 'lo va ti tawh khai," a ti a. Tin, ani chuan a lo chhang a, "Dam e," a lo ti a.

²⁷Tin, tlanga Pathian mi hnen a han thlen chuan, a ke a han vuan ta tlat a. Tin, amah chu rawn nam kian tumin Gehazia chuan a va pan a; nimahsela Pathian mi chuan, "Engmah tih suh, a rilru a mangang a nih hi; LALPA'n ka lakah ala thup rih a, mi la hrilh rih lo e," a ti a.

²⁸Tichuan ani chuan, "Ka pu hi fapa ka dil che em kha? 'Mi tihder suh ang che,' ka ti lawm ni kha?" a ti a.

²⁹Tichuan Gehazia hnenah, "I puan veng la, ka tiang kengin va kal tawh khai; tupawh va hmu la, chibai buk suh ang che; tin, tupawh in chibai an buk che chuan buk ve kher suh ang che; tin, ka tiang hi naupang hmaiah nghat ang che," a ti a.

³⁰Tin, naupang nu chuan, "LALPA nunna leh i nunna chhalin ka sawi e, ka thlah dawn tawp lo che a ni," a ti a. Tin, a tho a, a zui ta a.

³¹Tin, Gehazia chuan anni chu a lo hmakhalh a, tiang chu naupang hmaia chuan a han nghat a; nimahsela awka leh hriat theihna reng reng a nei lo a. Chutichuan a be turin a kir leh a," naupang chu a meng hauh lo mai," tiin a hrilh a.

³²Tin, Elisa chu ina a va luh chuan ngai teh, naupang chu a lo thi tawh reng a, a khuma chuan an lo la mut a.

³³chutichuan a va lut a, an pahnih chuan kawng a khar hnan a, LALPA hnenah a tawngtai a.

³⁴Tin, a han lawn a, naupang chu a bawhkhuh a, a hmui leh a hmui, a mit leh a mit, a kut leh a kut a chuktuah a; tin, a chungah chuan a kaikun a; tichuan naupang taksa chu a lo lum ta tial tial a.

³⁵Chutichuan a zuk chhuk leh a, in chhungah chuan a han vei a; tin, a han lawn a, a chungah chuan a han kaikun leh a; tichuan naupang chu vawi sarih a han hahchhiau a, naupang chu a lo meng ta a.

³⁶Tin, Gehazia a ko a, "He Sunam nu hi han ko teh," a ti a. Chutichuan a va ko a. Tin, a hnena a va luh chuan, "I fapa hi pawm rawh," a ti a.

³⁷Tichuan a va lut a, a ke bulah a bawkkhup a, a hmaia lei siin chibai a buk a; tin, a fapa chu a pawm a, a chhuak ta a.

³⁸Tin, Elisa chu Gilgal-ah a kal leh a; chu mi rama chuan tam a tla a: tin, zawlneiho fapate a hmaah an thu khawm a; chhiahhlawh hnenah, "Bel lian tak kha chuang langin, zawlneiho fapate hi thil chhumkawi chhumsak rawh khai," a ti a.

³⁹Tin, mi pakhat ram lama chawhmeh zawng turin a va kal a, ram hrui a va hmu a, chuta mi ram awmpawng chu a puan tlin tawkin a rawn fun a, a zai sawm a, bela thil chhumkawia chuan a thlak ta a; eng tih an hre hauh lo mai a.

⁴⁰Chutichuan chu miteho ei atan chuan an han suak chuak a. Tin, thil chhumkawi chu an han ei chuan, heti hi a ni a, "E khai, Pathian mi, bel chunga ian thihna a awm alawm le," an ti ta chul mai a. Tichuan an ei thei ta lo a.

⁴¹Tin, ani chuan, "Chhangphut han la te u," a ti a. Tin, chu chu belah a han thlak a, "He mite eiah hian han suak chhuak te u," a ti a. Tichan bela chuan hlauhawm engmah a awm ta lo a.

⁴²Tin, Baal-salisa atangin mi pakhat a lo kal a, Pathian mi chu buh thar hmasa bera siam busanghar changper sawmhnih leh buh thar vui a ipin a rawn kensak a. Ani chuan, "He miteho ei atan hian pe ta che," a ti a.

⁴³Tin, a chhiahlaw chuan, "Eng a ni; hei hi mi za zet ka hlui ang maw?" a ti a. Ani erawh chuan, "He miteho ei atan hian pe rawh; LALPA'n heti hian a ti, 'An ei ang a, an ei bang bawk ang,' tiin," a ti a.Chutichuan a han hlui a, an ei a, LALPA tih ang ngeiin an ei bang bawk a.

⁴⁴Chutichuan a han hlui a, an ei a, LALPA tih ang ngeiin an ei bang bawk a.