Read Baibul, Mizo 1 Chronicles 28 Bible Online

1 Chronicles 28 - Baibul, Mizo bible

1 Chronicles 28

¹Tin, Davida'n Israel hotu zawng zawng - hnam puipa te, lal rawngbawla intlak thin pawl hotu te, sipai sang hotu te, za hotu te, lal leh a fapate sum le thil neih zawng zawng chunga hotu te, mi lian leh mi chak, mi chak huaisen zawng zawngte nen- Jerusalemah a ko khawm a.

²Tichuan lal Davida chu a ding a, "Ka unaute leh ka mite u, ka thu hi lo ngaithla teh u: kei chuan LALPA thuthlunna bawm dahna leh kan Pathian ke nghahchhan tur in sa i la tih ka lo rilru thin a; tin, sakna tur pawh ka ngah tawh diam a.

³Nimahsela Pathianin ka hnenah, 'Nang zawng indo mi, thisen chhuah mi i niha vangin ka hming atan i sa lo ang,' a ti a.

⁴Amaherawhchu LALPA, Israelte Pathianin ka pa chhungte zawng zawng zing ata Israelte lala kumkhuaa awm turin mi lo thlang ta a; Juda hnam chu puipa atan a lo thleng ta a; tin, Juda hnamte zingah ka pa chhung te; tin, ka pa fapate zing ata Israel zawng zawng lalah mi lo thlang chhuak ta bik a;

⁵tin, ka fapa zawng zawngte zingah chuan (LALPA'n fapa tam tak mi pe a) Israaelte lal atan LALPA ram lalthutthlenga thu turin ka fapa Solomona hi a lo thlang ta a.

⁶Tichuan ka hnenah, 'I fapa Solomonan ka in lehka kawtlaite chu a din ang; ka fapa atan ka thlang tawh a, tichuan a pa ka ni ang.

⁷ka thupekte leh ka rorelte a pawm reng chuan - tunah in tih reng ang hian - a ram chu kumkhua atan ka tinghet ang,' a ti a.

⁸chutichuan LALPA mipui, Israel-ho zawng zawng mithmuhah leh ka Pathian hriata hian LALPA in Pathian thupek zawng zawngte hi pawm tur leh ngaihven turin ka fuih a che u; tichuan he ram tha tak hi in lua ang a, in hnua in thlahte kum khua atan in rochun chhawntir zel ang.

⁹Tin, nang ka fapa Solomon, i pa Pathian hi hria la, thinlung tha famkim leh rilru phur takin a rawng bawl ang che; LALPA chuan thinlung a en thin a, rilrua suangtuah zawng zawngte hi a hre vek a ni; amah i zawn chuan i hmu ang a, i hawisan erawh chuan kumkhuain a thlauhthla ang che.

¹⁰Fimkhur rawh khai; hmun thianghlim atana in sa turin LALPA'n a lo ruat tak che hi; hak takin awm la, bei rawh, a ti a.

¹¹Chutichuan Davida chuan a fapa Solomona ch biak in hulhliap lem te, a in lem te, sum dah khawmna in lem te, a pindan chungnung lem te, a chhung pindam lem te, zahngaihna thutphah lem te,

¹²a rilrua a suangtua ang zawng zawng, LALPA in hungchhung kawtlai lem te, a vel pindan zawng zawng lem te, Pathian ina sum dah khawmna in lem te, thil serh dah khawmna in lem te chu a pe a;

¹³puithiamte le Levi-hote a pawl pawla an awmna tur lem te, LALPA ina rawngbawlna lam tur zawng zawng lem te, LALPA ina rawngbawlna tur bungbel zawng zawng lem te pawh;

¹⁴rawngbawlna lam atana bungbel chi tin, rangkachak bungbel tur, rangkachak hman zat tur te, rawngbawlna lam atana tangkaraw bungbel tur tangkaraw hman zat tur te,

¹⁵Rangkachak khawnvar dahna leh a khawnvar tur rangkachak hman zat tur te, khawnvar dahna leh a khawnvar tur zel atana hman zat tur te, khawnvar dahna hman tulna theu ang zela tangkaraw khawnvvar dahna tur zel atana hman zat turte nen;

¹⁶chhang chiahna dawhkan tur, pakhat zela tana rangkachak hmanzat tur te, tangkaraw dawhkan atan tangkaraw hman zat tur te.

¹⁷Rangkachak hlir hlak sa thurna thir kawm te, maihun te, note nen; rangkachak berhbu tur, berhbu pakhat zel atana hman zat tur te, tangkaraw berhbu tur, berhbu pakhat zel atana hman zat tur te;

¹⁸Rangkachak thianghlima siam, rimtui halna maichamtur te; cherub-te an thla zara LALPA thuthlunna bawm tuam chuanna lem ang siamna tur rangkachak te nen.

¹⁹Davida chuan, "Hengte hi tih dan tur rem a ruat sa tichiang tura LALPA'n ama kut ngeia a ziak ang kha a ni," a ti a.

²⁰Tin, Davida'n a fapa Solomona hnenah chuan, "Chak tak leh huai takin awm la, bei rawh; hlau suh la, zam hek suh; LALPA Pathian, ka Pathian hi i hnenah a awm e; LALPA in lam hna zawng zawng hi peih vek a nih hma loh chuan a kalsanin a thlahthlam lo ang che.Tin, ngai teh, Pathian in hna tinreng thawktu pawl puithiamte leh Levi-hote na awm a, eng hna pawh kawng tinrenga hna thiam, chak tak theuha tanpuitu tur che i hnenah an awm zel ang; a hotute leh mipui zawng zawng pawhin i thupek apiang chu an zawm zel bawk ang," a ti a.

²¹Tin, ngai teh, Pathian in hna tinreng thawktu pawl puithiamte leh Levi-hote na awm a, eng hna pawh kawng tinrenga hna thiam, chak tak theuha tanpuitu tur che i hnenah an awm zel ang; a hotute leh mipui zawng zawng pawhin i thupek apiang chu an zawm zel bawk ang," a ti a.