Read Baibul, Mizo 2 Chronicles 11 Bible Online

2 Chronicles 11 - Baibul, Mizo bible

2 Chronicles 11

¹Tin, Rehoboama chuan Jerusalem a han thlen chuan, Israel-hote do a, Rehoboama ram la leh turin Juda leh Benjamina chhung te, mi huaisen thiau thlan chhuah, nuaikhat leh singriat zet a khawm a.

²Nimahsela Pathian mi Semaia hnenah LALPA thu a lo thleng a,

³Judai ram lal Solomona fapa Rehoboama hnenah leh Judai ram leh Benjamin rama Israel mi zawng zawngte hnenah,

⁴LALPA'n heti hian a ti, In han kal tur a ni lo a, in unaute chu han do hek suh u: mahni in lamah haw leh vek rawh u; hei hi keimah tih a ni e,' tiin sawi rawh," tiin. Chutichuan LALPA thu chu an awi a, Jeroboama do tura an kal tur chu an kir leh ta a.

⁵Tin, Rehoboama chu Jerusalem khuaah a awm a, Judai ramah invenna'n khuate a siam a,

⁶Bethlehem khua te, Etam te, Tekao te,

⁷Bethzur te, Soko te, Adulam te,

⁸Gat te, Maresa te, Zip te,

⁹Adoraim te, Lakis te, Azeka te,

¹⁰Zora te, Aijalon te, Hebron khuate; chung chu Judai leh Benjamin rama kulh nei khuate a ni.

¹¹Tin, chung kulhte chu a tinghet a, hotute a dah a, ei tur te, hriak te, uain te a chek khawm a.

¹²Tin, khawtinah chuan phaw te, fei te a dah a, khaw nghet takah a siam hlawm a. Tin, Judai leh Benjamin ram chu a ta a ni.

¹³Tin, Israel ram zawng zawnga puithiamte leh Levi-hote chu an ram atang theuhin a hnenah an kal a.

¹⁴Levi-hote chuan an ram leh an awmnate an chauhsan a, Judai ram leh Jerusalem-ah an kal a: Jeroboama leh a fapaten LALPA tana puithiam hna thawk lo turin a bantir a,

¹⁵a hmun sang atan le kelpa leh bawng no lem a siam atana puithiamte a ruat tak zawk avangin.

¹⁶Tin, Israel hnam, LALPA Israelte Pathian lama riltu thle zawng zawngte chuan an zui a, LALPA an pi leh pute Pathian hnena inthawi turin Jerusalem-ah an kal a.

¹⁷Chutichuan Judai ram chu an tinghet a, kum thuum chung chu Solomona fapa Rehoboama chu an tinghet a: kum thum chhung chu Davida leh Solomona kawng chu an zawh a ni.

¹⁸Tin, Rehoboama chuan Davida fapa Jerimotha fanu Mahalathi nupuiah a nei a, chu chu Jesea fapa Eliaba fanu Abihaili fanu a ni:

¹⁹fapate a hrinsak a; Jeusa te, Semaria te, Zahama te.

²⁰Ani hnuah chuan Absaloma fanu Maakai a nei a; ani chuan Abija te, Ataia te, Ziza te, Selomitha te a rinsak a.

²¹Tin, Rehoboama chuan Absaloma fanu Maakai chu a nupuite leh a hmeite zawng zawngah chuan a hmangai bik a; (nupui sawm leh pariat leh hmei sawmruk a nei a, fapa sawmhnih leh pariat leh fanu sawmruk a nei a.)

²²Tin, Rehoboama chuan maakai fapa Abija chu a unaute zinga chungnung berah a dah a; lala siam a rilruk nghe nghe a ni a.Fing takin rem a ruat a, a fapate zawng zawng chu Judai ram leh Benjamin ram zawng zawnga kulh nei khuaahte a awm darhtir vek a: ei tur tam tak a pe a. Nupui tam tak a zawn sak hlawm a.

²³Fing takin rem a ruat a, a fapate zawng zawng chu Judai ram leh Benjamin ram zawng zawnga kulh nei khuaahte a awm darhtir vek a: ei tur tam tak a pe a. Nupui tam tak a zawn sak hlawm a.